Astanada Qazaqstan men Qytaı mádenıetiniń toǵyspaly jylynyń jabylý saltanaty ótti, - dep habarlaıdy alnews.
Qalıbek Qýanyshbaev atyndaǵy Qazaq ulttyq mýzykalyq drama teatrynda eki eldiń óner sheberleriniń qatysýymen konsert ótti. Kópshilik Qazaqstan men Qytaıdyń baı mádenı dástúrin tanytatyn taqyryptyq kórmeni tamashalady.
İs-sharaǵa QR Mádenıet jáne aqparat mınıstri Arman Qyryqbaev, QHR-dyń Qazaqstandaǵy ýaqytsha senimdi ókili Chen Kefan, QR Syrtqy ister mınıstriniń orynbasary Arman Isaǵalıev, dıplomatıalyq korpýs ókilderi, mádenıet jáne óner qaıratkerleri qatysty.
Arman Qyryqbaev eki el arasyndaǵy qarym-qatynastyń tarıhy tereńde jatqanyn jáne halyqtar dostyǵyn nyǵaıtýda mádenıettiń orny erekshe ekenin atap ótti.
«Qazaqstan men Qytaı halyqtarynyń tarıhı baılanystary tereńnen bastaý alady. Myń jyldyq tarıhy bar Uly Jibek joly halyqtarymyzdy baılanystyryp, saýda-sattyqtyń damýyna, mádenıetterdiń yqpaldasýyna, bilim men ǵylym jetistikteriniń almasýyna zor yqpal etti. Osy ortaq tarıhı bekem baılanys búginde halyqtarymyz arasyndaǵy dostyq pen mádenı dıalogty nyǵaıtýdyń mańyzdy negizine aınalyp otyr.
Memleket basshylary Qasym-Jomart Kemeluly Toqaev pen tóraǵa Sı Szınpınniń dostyq pen ózara senimge negizdelgen qarym-qatynasy arqasynda ekijaqty yntymaqtastyq múldem jańa mazmunǵa ıe boldy. Bıylǵy mádenıetter toǵyspaly jyly aıasynda halyqtarymyzdyń bir-biriniń mádenıetine, dástúri men tarıhyna degen qyzyǵýshylyǵy arta tústi.
Óner – ult pen ultty, el men eldi jaqyndastyrady. Sondyqtan búgingi Qazaqstan men Qytaı mádenıetiniń toǵyspaly jylynyń jabylý saltanatyn belgili bir kezeńniń aıaqtalýy emes, kerisinshe jańa mádenı bastamalarǵa jol ashatyn mańyzdy beles dep bilemiz», – dedi mınıstr.
Chen Kefan mádenı-gýmanıtarlyq baılanysty odan ári damytýdyń mańyzyna toqtaldy. Óz sózinde ol kelesi jyly Qazaqstan men Qytaı arasynda dıplomatıalyq qatynas ornaǵanyna 35 jyl tolatynyn aıtyp, Qytaı tarapy mádenıet, týrızm, jastar saıasaty, ǵylym jáne bilim salalaryndaǵy yntymaqtastyqty tereńdetýge daıyn ekenin jetkizdi.
Jyl ishinde Qazaqstan men Qytaıda 40-qa jýyq mádenı is-shara uıymdastyryldy. Olardyń qatarynda Chjeszán provınsıasynyń mýzeıinde ótken «Uly dala kóshpelileriniń mádenıeti» kórmesi, Almatyda Shanhaı óner koleksıasy mýzeıimen birlesip uıymdastyrylǵan kórme, Beıjińde Ulttyq dombyra kúnine, Abaı kúnine jáne Jambyl Jabaevtyń 180 jyldyǵyna arnalǵan is-sharalar bar.
Mádenı ortalyqtardyń qyzmetin damytý –yntymaqtastyqtyń mańyzdy baǵyttarynyń biri. Beıjińdegi Qazaqstan mádenı ortalyǵy qytaı jurtshylyǵyn elimizdiń mádenıetimen tanystyryp keledi. Jyl sońyna deıin Astanada Qytaı mádenı ortalyǵy ashylmaq.
Konsertte Medet Shotabaev, Rýhıa Baıdúkenova, «Birlik» bı ansambli, Kúlásh Baıseıitova atyndaǵy Qazaq ulttyq óner ýnıversıtetiniń dombyrashylar ansambli, Nınbo qalalyq án jáne bı teatrynyń solıseri Chjao Lý men Súı Iýnszá óner kórsetti.
Konsert baǵdarlamasynda qazaq kompozıtory Baqytjan Baıqadamov pen kórnekti qytaı kompozıtory Sán Sınhaıdyń dostyǵy aıryqsha oryn aldy. Kompozıtorlardyń shyǵarmashylyq baılanysy – eki halyqtyń bir-birine kórsetken rıasyz qoldaýynyń jarqyn úlgisi. Keshte osy dostyq tarıhyna arnalǵan horeografıalyq qoıylym men fotokórme usynyldy.
Kópshilik Qytaıdyń dástúrli óneri men qolóner buıymdaryn, sonyń ishinde Nınbo farforyn, sándik shamdar men órip jasalǵan qońyraýlardy tamashalady.
Qazaqstan men Qytaı mádenıetiniń toǵyspaly jyly 2026 jylǵy 31 naýryzda Beıjińde ótken saltanatty gala-konsertpen ashylǵan bolatyn.
İs-sharany Qazaqstan Respýblıkasynyń Mádenıet jáne aqparat mınıstrligi Qytaı Halyq Respýblıkasynyń Mádenıet jáne týrızm mınıstrligimen birlesip uıymdastyrdy.
