Almaty qalasy Qoǵamdyq damý ortalyǵy qalalyq İshki saıasat basqarmasymen birlesip, Qazaqstan Respýblıkasy Ǵylym jáne joǵary bilim mınıstrligi Ǵylym komıtetiniń Fılosofıa, saıasattaný jáne dintaný ınstıtýtymen birge Dostyq úıinde «Prezıdent Joldaýy: memlekettik jáne qoǵamdyq damýdyń jańa baǵdarlary» taqyrybynda sarapshylyq dóńgelek ústel ótkizdi, - dep habarlaıdy alnews.
İs-sharaǵa ǵylymı jáne sarapshylyq qaýymdastyq ókilderi qatysyp, Memleket basshysynyń Joldaýynda aıqyndalǵan negizgi basymdyqtardy, eldiń áleýmettik-ekonomıkalyq damýynyń ózekti máselelerin, memlekettik basqarýdy jańǵyrtý jáne Prezıdent bastamalaryn iske asyrý perspektıvalaryn talqylady.
Saraptamalyq baıandamalarmen Qazaqstan strategıalyq zertteýler ınstıtýtynyń Almaty qalasyndaǵy ókildiginiń basshysy Ásel Nazarbetova, Fılosofıa, saıasattaný jáne dintaný ınstıtýtynyń bas ǵylymı qyzmetkerleri Vácheslav Dodonov pen Asqar Shomanov, ınstıtýttyń jetekshi ǵylymı qyzmetkeri Dına Eshpanova, Abaı atyndaǵy Qazaq ulttyq pedagogıkalyq ýnıversıtetiniń profesory, saıasattaný ǵylymdarynyń doktory Jomart Sımtıkov, ál-Farabı atyndaǵy Qazaq ulttyq ýnıversıtetiniń profesory, zań ǵylymdarynyń doktory Alýa Ibraeva, sondaı-aq Ulttyq memlekettik ǵylymı-tehnıkalyq saraptama ortalyǵy Ǵylymı-tehnıkalyq aqparat departamentiniń dırektory, saıasattaný ǵylymdarynyń kandıdaty Anton Morozov sóz sóıledi.
Talqylaý barysynda ekonomıkalyq damýdyń basym baǵyttaryna, áleýmettik ınfraqurylymdy jańǵyrtýǵa, bilim berý men ınovasıalardy damytýǵa, sondaı-aq memleket pen qoǵam arasyndaǵy tıimdi komýnıkasıa máselelerine erekshe nazar aýdaryldy.
Qazaqstan strategıalyq zertteýler ınstıtýtynyń Almaty qalasyndaǵy ókildiginiń basshysy Ásel Nazarbetovanyń pikirinshe, Prezıdent Joldaýy el damýynyń strategıalyq baǵdarlaryn aıqyndap qana qoımaı, memlekettik ınstıtýttar men qoǵamdyq qatynastardy odan ári transformasıalaýdyń naqty baǵyttaryn belgileıdi. Bul rette júıeli tásilge jáne qol jetkizilgen nátıjelerdi baǵalaýǵa negizdelgen bastamalardy dáıekti túrde iske asyrý mańyzdy mindet bolyp tabylady.
Óz kezeginde, Ulttyq memlekettik ǵylymı-tehnıkalyq saraptama ortalyǵy Ǵylymı-tehnıkalyq aqparat departamentiniń dırektory Anton Morozov Joldaýda belgilengen basymdyqtardy iske asyrýdaǵy ǵylymı jáne ınovasıalyq áleýettiń mańyzdylyǵyn atap ótti.
«Búginde eldiń damýy ǵylymı jetistikterdi, zamanaýı tehnologıalar men ınovasıalyq sheshimderdi ekonomıkaǵa jáne memlekettik basqarý júıesine ıntegrasıalaý múmkindigine tikeleı baılanysty. Osy turǵyda ǵylymı ázirlemelerdi tájirıbege engizýge jáne ǵylym, memleket pen qoǵam arasyndaǵy ózara is-qımyldy nyǵaıtýǵa qajetti jaǵdaılar qalyptastyrý erekshe mańyzǵa ıe», — dep atap ótti sarapshy.
Dóńgelek ústelge qatysýshylar Prezıdent bastamalarynyń mańyzdylyǵyna qatysty saraptamalyq baǵalaryn usynyp, olardy praktıkalyq turǵyda iske asyrý tetikterin talqylady jáne el damýynyń ózekti baǵyttary boıynsha pikir almasty.
Sarapshylyq kezdesý kásibı dıalog ornatýǵa, ǵylymı baǵalarmen almasýǵa jáne memlekettik saıasattyń strategıalyq mindetterin tereń zerdeleý tásilderin talqylaýǵa arnalǵan mańyzdy alańǵa aınaldy.