Almatyda WorldSkills Kazakhstan 2026 respýblıkalyq chempıonatyna qatysatyn qala quramasyn shyǵaryp salý rásimi ótti, - dep habarlaıdy alnews.
Kezdesý barysynda jas mamandarǵa sáttilik tilep, kásibı sheberligin joǵary deńgeıde kórsetýine tilek bildirildi.
Astanaǵa attanar aldynda Almaty qalasy Bilim basqarmasynyń basshysy Sáken Aralbaev Almaty servıs jáne tehnologıalar kolejine bardy. Kolej dırektory Jarqyn Janıazova oǵan «Jas maman» jobasy aıasynda ashylǵan «Tigin isi» quzyrettilik ortalyǵynyń jumysyn tanystyryp, stýdentterdiń tájirıbelik daıyndyǵy men oqý ornynyń jetistikteri týraly baıandady.
Sapar aıasynda WorldSkills Almaty uıymdastyrý komıteti qala quramasynyń qatysýshylary jáne olardy chempıonatqa daıyndaǵan tálimgerlermen kezdesý ótkizdi. Qalyptasqan dástúr boıynsha Sáken Aralbaev komanda kapıtanyna Almatynyń týyn tabystap, qatysýshylarǵa senimdilik pen tabandylyq tilep, chempıonatta laıyqty óner kórsetýine tilektestik bildirdi. Konkýrsqa qatysýshylar qala basshylyǵy men tálimgerlerge qoldaý kórsetip, daıyndyqqa kómekteskeni úshin alǵys bildirdi.
25-30 qarasha aralyǵynda Astanada XI WorldSkills Kazakhstan 2026 respýblıkalyq kásibı sheberlik chempıonaty ótedi. Baıqaý EXPO halyqaralyq kórme ortalyǵynda uıymdastyrylyp, elimizdiń 20 óńirinen kelgen kolej stýdentterin biriktiredi. Qatysýshylar kásibı daǵdysyn naqty jumys ortasyna barynsha jaqyndatylǵan jaǵdaıda kórsetýge tıis.
Almatynyń atynan 43 quzyrettilik baǵyty boıynsha 53 stýdent pen 43 sarapshy qatysady. Qurama sapyna WorldSkills Almaty 2025 óńirlik chempıonatynyń jeńimpazdary men júldegerleri engen. Olar bıyl qyrkúıek aıynda ótken qosymsha irikteýden súrinbeı ótken.
Jalpy respýblıkalyq chempıonatqa Qazaqstannyń 20 óńirinen 850-den astam konkýrsqa qatysýshy pen 700 sarapshy qatysady.
Almaty quramasyna WorldSkills Kazakhstan resmı tehnıkalyq delegattary – Almaty kópsalaly kolejiniń dırektory A. K. Beısetbaev pen Almaty qurylys-tehnıkalyq kolejiniń dırektory B. S. Ahmetov jetekshilik etedi. Olar chempıonatqa qatysý barysynda komandanyń uıymdastyrý jáne tehnıkalyq jumystaryn úılestiredi.
WorldSkills Kazakhstan 2026 chempıonaty stýdentterge kásibı sheberligin kórsetýge, elimizdiń basqa óńirlerinen kelgen qatysýshylarmen tájirıbe almasýǵa jáne múmkindigin respýblıkalyq deńgeıde tanytýǵa jol ashady.