Almaty BBC Travel basylymynyń jyl saıyn jarıalanatyn «2027 jyly saıahattaýǵa arnalǵan eń úzdik 20 oryn» (The 20 best places to travel in 2027) tizimine engen Ortalyq Azıadaǵy jalǵyz týrısik baǵyt atandy, - dep habarlaıdy alnews.
Brıtandyq basylym İle Alataýynyń baýraıynda ornalasqan qalaǵa kelip, zamanaýı ónermen, qazaqtyń dástúrli qolónerimen jáne dala asqanasymen tanysýǵa keńes beredi.
Atalǵan tizimge Fransıanyń Býrgýndıa aımaǵy, Italıanyń Sardınıa araly, Kanadanyń Alberta provınsıasy jáne Jańa Zelandıanyń Kraıscherch qalasy da endi. Baǵyttardy irikteý barysynda redaksıa týrızmniń mádenı mura men tabıǵatty saqtaýǵa, sondaı-aq jergilikti qaýymdastyqtardyń damýyna tıgizetin oń áserine erekshe nazar aýdarǵan.
BBC Travel Almatynyń basty mádenı nysandary qatarynda Almaty Museum of Arts óner mýzeıi men «Selınnyı» zamanaýı mádenıet ortalyǵyn atap ótti. Basylym Ortalyq Azıadaǵy alǵashqy iri zamanaýı óner mýzeıi dep sıpattaǵan Almaty Museum of Arts 2025 jyly qyrkúıekte ashylǵan. Onyń qorynda Qazaqstan men óńirdiń ózge elderinen shyqqan sýretshilerdiń týyndylary usynylǵan. Al «Selınnyı» ortalyǵy brıtandyq sáýletshi Asıf Hannyń jobasy boıynsha qaıta jańǵyrtylǵan burynǵy kınoteatr ǵımaratynda ornalasqan. Qaıta qurý jumystary barysynda sýretshi Evgenıı Sıdorkınniń sgraffıto tehnıkasynda oryndalǵan kórkem týyndysy qalpyna keltirildi.
Basylym sýretshiler men dızaınerlerdiń óńirdiń kóshpeli mádenı murasyna jáne táńirshildikpen baılanysty beınelerge erekshe mán beretinin atap ótedi. Qalalyq galereıalarda dástúrli qazaq qolónerin zamanaýı turǵyda jańǵyrtyp júrgen almatylyq sheberlerdiń jumystarymen tanysýǵa bolady.
BBC Travel 2027 jyly jazda Almatyǵa kelýge taǵy bir sebep retinde The Spirit of Tengri halyqaralyq festıvalin ataıdy. Bul festıválde dástúrli mýzyka zamanaýı óńdeýde oryndalady. 2026 jyly maýsymda ótken festıvál Abaı alańyna 50 myńǵa jýyq kórermen jınaǵan.
Zamanaýı qazaq asqanasymen tanysý úshin BBC Travel Medeý shatqalynda ornalasqan Auyl meıramhanasyna barýǵa keńes beredi. Sáýleti kıiz úı pishinin eske túsiretin ǵımaratta qonaqtarǵa dala asqanasynyń taǵamdary zamanaýı úlgide usynylady. Redaksıa usynǵan taǵamdardyń qatarynda jylqy etinen daıyndalǵan tartar men shelpek qosylǵan jilik maıy bar. Meıramhananyń ıntererin jasaýǵa sáýletshiler, dızaınerler men qolóner sheberleri qatysqan. Bezendirý barysynda kilemder men qoldan jasalǵan buıymdar paıdalanylǵan. Taý kórinisi ashylatyn bul meıramhanaǵa Medeý men Shymbulaqqa saıahat kezinde soǵýǵa bolady.
2027 jyly Cathay Pacific áýe kompanıasy Gonkong pen Almaty arasynda tikeleı áýe reısterin iske qosýdy josparlap otyr. Gonkongtan alǵashqy reıs 9 qańtarǵa belgilengen.
BBC Travel bolashaǵy zor týrısik baǵyttardyń qatarynda Nú-Iorkti de atap ótedi. Qazaqstan Respýblıkasynyń Kólik mınıstrligi 2027 jyly sońyna deıin Qazaqstan men AQSH arasynda tikeleı áýe qatynasyn ashý jospary týraly habarlaǵan.
Derekqor: https://www.bbc.com/travel/article/20261111-the-20-best-places-to-travel-in-2027