Almaty oblysy Qarasaı aýdanyna qarasty Abaı aýylyndaǵy №2 orta mektepte «Tárbıe baspaldaǵy» atty ata-analar forýmy ótti, - dep habarlaıdy alnews.
Taǵylymdy sharanyń basty maqsaty – otbasy men mektep arasyndaǵy yntymaqtastyqty arttyrý, bala tárbıesindegi ortaq jaýapkershilikti nyǵaıtý jáne jas urpaqtyń boıyna ulttyq qundylyqtar men otansúıgishtik qasıetterdi sińirý.
Forýmnyń arnaıy qonaǵy – aqyn, aýdarmashy, pedagog, Halyqaralyq «Alash» ádebı syılyǵynyń laýreaty, «Serper» syılyǵynyń ıegeri, Qazaqstan Jazýshylar odaǵynyń múshesi Saıat Qamshyger boldy.
Mektep dırektory Samǵat Súıinbekuly forýmnyń ashylýynda sóz sóılep, bala tárbıesindegi ata-ana men bilim ordasynyń ózara baılanysyna erekshe toqtaldy.
«Biz árqashan mektep, ata-ana, oqýshy úshtaǵany arqyly jumys isteýdi jaqsy kóremiz. Byltyrǵy oqý jylynda Orazkúl Asanǵazymen kezdesý ótkizgen edik. Bıylǵy oqý jylyndaǵy forýmymyzdy Saıat Qamshygermen kezdesýden bastap otyrmyz. Bala tárbıesi – barshamyzǵa ortaq mindet. Sondyqtan bul baǵyttaǵy jumystardy birlese atqarýymyz qajet», – dedi mektep dırektory.
Forým barysynda Saıat Qamshyger jas urpaq tárbıesi, ádebıet pen rýhanı qundylyqtardyń mańyzy jóninde oı bólisti. Oqýshylar aqynnyń óleńderinen úzindiler oqyp, qonaqtyń shyǵarmashylyǵyna qurmet kórsetti. Sonymen qatar patrıottyq baǵyttaǵy ánder shyrqalyp, mektep oqýshylary hormen óner kórsetti. Ádebıet pen óner toǵysqan mazmundy baǵdarlama qatysýshylarǵa erekshe áser syılady.
Bala tárbıesi tek mekteptiń nemese ata-ananyń ǵana mindeti emes. Bul – eki taraptyń ózara túsinistigi men birlesken eńbegin talap etetin ortaq jaýapkershilik. Otbasynda qalyptasqan tárbıe mektep qabyrǵasynda jalǵasyn taýyp, ustaz ben ata-ananyń bir baǵyttaǵy jumysy arqyly nátıjesin beredi.
«Tárbıe baspaldaǵy» forýmy osy ortaq ustanymnyń mańyzyn aıqyndap, ata-analar men ustazdar arasyndaǵy baılanysty nyǵaıtýǵa, bala bolashaǵyna beıjaı qaramaýǵa úndegen taǵylymdy kezdesý boldy.