Darıǵa Badyqovany komedıalyq rólderinen ǵana tanyp júrgen kórermen bul joly aktrısany múlde basqa qyrynan kóre alady. «Taptym-aý seni» fılmindegi er minezdi qyz ben «Kelinjan» telehıkaıasyndaǵy Aısaranyń beınesine úırengen jurt úshin «Sońyra» tosynsyı bolǵaly tur. Birden eskerte keteıik: fılmnen keıin kózińizge jas alýyńyz ábden múmkin.
Otandyq kınoda tótenshe jaǵdaılar qyzmetkerleriniń, sonyń ishinde órt sóndirýshilerdiń ómiri men kásibine arnalǵan týyndylar kóp kezdese bermeıdi. Al Darıǵa Badyqova bul joly kórermen nazaryn kún saıyn ómirin qaterge tigip, ózgeni qutqarýǵa asyǵatyn jandardyń taǵdyryna aýdarǵan. Fılm kópshilik bile bermeıtin osy mamandyqtyń tasasynda qandaı ómir jatqanyn kórsetedi.
Biz órt sóndirýshilerdiń erligi týraly jıi estımiz. Biraq olardyń qyzmetten tys tirshiligi, otbasyndaǵy máseleleri men jan dúnıesindegi sezimderine úńile bermeımiz. «Sońyra» fılminiń basty ereksheligi – keıipkerlerdi tek batyr retinde emes, óz ýaıymy, armany, jaqyndary men sheshilmegen máseleleri bar qarapaıym adamdar retinde kórsetýinde. Bir qyzyǵy, ózgelerdiń ómirin arashalap júrgen jandardyń ózderi de keıde kómek pen qoldaýǵa muqtaj. Soǵan qaramastan, olar kún saıyn qaýipke bas tigip, bireýdiń ómirin saqtap qalý úshin otqa kiredi. Ózgeniń balasyn qutqarýǵa umtylǵan adamnyń óz balasyna aman oralatynyna eshkim kepildik bere almaıdy. Fılm osy shyndyqty kórermenge áserli jetkizedi.
Týyndyda tek órt sóndirýshilerdiń taǵdyry ǵana emes, basshylyq qyzmettegi adamdardyń jaýapkershiligi de sóz bolady. Biliksizdik, mansapqorlyq pen ataqqa degen qumarlyqtyń sońy qandaı jaǵdaıǵa ákelýi múmkin? Adam ómirine tikeleı jaýap beretin qyzmetke kásibı daıyndyǵy jetkiliksiz adam taǵaıyndalsa, onyń zardabyn kim tartady? Fılm osy saýaldardy kórermenniń oıyna salady. Óıtkeni kez kelgen salada basshynyń bilimimen qatar adamgershiligi men parasaty da mańyzdy. Keıbir qyzmettegi qateliktiń quny aqshamen ólshense, endi birinde adam ómirimen ólshenedi.
Bul joly Darıǵa Badyqova órt sóndirý bóliminiń kapıtanyn somdaıdy. Onyń keıipkeri – qaramaǵyndaǵy qyzmetkerlerin túsine biletin, máseleni aıqaımen emes, aqylmen sheshetin, qajet kezinde ózgeniń qateligi úshin de jaýapkershilik alýdan qashpaıtyn salmaqty áıel. Aktrısa bul róli arqyly kórermenge ózi burynnan tanys komedıalyq obrazdardan ózgeshe qyryn tanytady. Keıipkerdiń bolmysy men fılmdegi jaǵymsyz obrazdyń qarama-qaıshylyǵy arqyly naǵyz basshy men mansap qýǵan adamnyń aıyrmashylyǵy aıqyn kórinedi.
Darhan Súleımenovtiń akterlik sheberligin de erekshe atap ótken jón. Ol somdaǵan jaǵymsyz keıipker kórermenniń ashýyn týdyryp, ár áreketimen yzalandyrady. Keıipkerdi kórermenge sonshalyqty nanymdy ári jekkórinishti etip kórsete bilý – akterdiń sheberliginiń belgisi. Jalpy, fılmniń alǵashqy mınýttarynan-aq oqıǵaǵa enip ketesiz. Sújet qarqyndy órbip, kórermendi jalyqtyrmaıdy.
Darıǵa Badyqovanyń shyǵarmashylyǵyndaǵy taǵy bir jaqsy úrdis – jas akterlerge múmkindik berip, jańa esimderdi tanytýy. «Sońyra» fılminde de bul dástúr jalǵasyn tapqan. Solardyń biri – jas aktrısa Tamabaı Narqyz. Ol ózine berilgen róldi sátti alyp shyqqan. Ásirese Qazbek Tólenmen birge somdaǵan mahabbat jelisi erekshe áser qaldyrady. Eki jastyń arasyndaǵy názik sezim men shynaıy qarym-qatynasty akterler tabıǵı jetkize bilgen.
«Jaqynyńnyń ómirin jaryq qylamyn dep, ózińniń jaryǵyńdy sóndirip alma». Fılm afıshasyndaǵy osy bir sóılem týyndynyń negizgi oıyn tolyq ańǵartady. Keıde jaqyndarymyzǵa kóńil bólýdi, jaqsy kóretinimizdi aıtýdy, birge ýaqyt ótkizýdi keıinge qaldyryp jatamyz. Óz baqytymyzdy da erteńge ysyra beremiz. «Sońyra aıtamyn», «Sońyra kezdesemiz», «Sońyra baqytty bolamyz» degen sózderdi jıi qoldanamyz. Biraq sol «sońyranyń» keletinine kim kepil?
«Sońyra» – órt sóndirýshiler týraly ǵana emes, adamgershilik, paryz, jaýapkershilik jáne ómirdiń qadiri jaıly fılm. Bul – ózgeniń ómirin saqtap qalýdy mindetine aınaldyrǵanymen, keıde óz jaqyndaryna ýaqyt bólýge úlgermeıtin jandardyń taǵdyry týraly týyndy.
Eger Darıǵa Badyqovanyń komedıalyq rólderinen sharshap, kınoteatrdan tereń oı men shynaıy emosıa izdeseńiz, «Sońyrany» kórýge keńes beremiz. Fılm 19 qarashadan bastap kınoteatrlarda kórsetiledi.