Almatyda ALMATY THEATRE FEST teatr festıvali aıaqtaldy

Almatyda «Alataý» dástúrli óner teatrynyń 10 jyldyǵyna arnalǵan ALMATY THEATRE FEST respýblıkalyq teatr festıvali máresine jetti, - dep habarlaıdy alnews.

15-20 qarasha aralyǵynda alty kún boıy elimizdiń ár óńirinen kelgen kásibı teatr ujymdary bir sahnada bas qosyp, kórermenge túrli janr men baǵyttaǵy qoıylym usyndy.

Almaty ákimdiginiń qoldaýymen ótken festıválge 10 teatr ujymy qatysty. Baǵdarlamaǵa Ǵ. Músirepov, S. Seıfýllın, N. Bekejanov, B. Rımova, H. Bókeeva, S. Qojamqulov atyndaǵy teatrlardyń, Memlekettik akademıalyq qýyrshaq teatrynyń, A. Mámbetov atyndaǵy Memlekettik drama jáne komedıa teatrynyń, Asanáli Áshimov teatrynyń jáne Silk Stage shyǵarmashylyq keńistiginiń qoıylymdary endi.

Kórermen nazaryna «Voısek», «Sáıgúlik», «She is Aiel», «Jabaıy alma», «Naızaǵaı», «Qorǵansyz», «Tomırıs», «Orteke» jáne «Romeo men Djýletta» spektáklderi usynyldy. Bul qoıylymdar Qazaqstannyń qazirgi teatr ónerindegi janrlyq alýandylyqty, kórkemdik izdenister men shyǵarmashylyq tájirıbelerdi tanytty.

Festıvál aıasynda kásibı pikir almasýǵa da erekshe mán berildi. Ár qoıylymnan keıin teatrtanýshylar, synshylar, rejıserler men akterlerdiń qatysýymen talqylaýlar ótti. Onda rejıserlik sheshimder, qoıylymnyń kórkemdik tujyrymdamasy men akterlik sheberlik saralanyp, qatysýshylar ózara pikir jáne tájirıbe almasty.

Sonymen qatar «Dástúrli óner jáne zamanaýı teatr keńistigi» taqyrybynda respýblıkalyq dóńgelek ústel uıymdastyryldy. Onda ulttyq teatr ónerin damytý, dástúrdi saqtaý jáne ony qazirgi sahna keńistigimen ushtastyrý máseleleri talqylandy. Sala mamandary ulttyq teatrdyń búgingi úrdisteri men damý múmkindikterin, shyǵarmashylyq izdenistiń jańa baǵyttaryn ortaǵa saldy.

Festıvál qorytyndysy boıynsha 10 teatr ujymynyń barlyǵyna arnaıy músinshe, dıplom jáne 1 mln teńgelik sertıfıkat tabystaldy. Budan bólek, sarapshylar alqasy teatr óneriniń ókilderine arnaıy marapattar berdi. «Sahna ónerindegi kásibı sheberligi úshin» nomınasıasymen Qazaqstannyń halyq artıseri Lıdıa Kádenova men Keńes Jumabekov marapattaldy.

Sondaı-aq qazaqstandyq teatr óneriniń kórnekti ókilderi Serke Qojamqulov, Baıdilda Qaltaev, Aısha Abdýllına, Rahıa Qoıshybaeva, Habıba Elebekova, Káýken Kenjetaev, Bıken Rımova, Mákil Qulanbaev, Zámzágúl Sháripova, Ydyrys Noǵaıbaev, Farıda Sháripova jáne Altynbek Kenjekov atyndaǵy arnaıy marapattar tabystaldy.

ALMATY THEATRE FEST elimizdiń teatr ujymdary arasyndaǵy shyǵarmashylyq tájirıbe almasýǵa, kásibı baılanysty nyǵaıtýǵa jáne mádenı yntymaqtastyqty damytýǵa jol ashty. Festıvál qazaqstandyq sahna óneriniń dástúri men zamanaýı úrdisterin toǵystyrǵan mańyzdy mádenı alańǵa aınaldy.

Aldyńǵy
V Almaty proshól respýblıkanskıı ınklúzıvnyı festıvál DEAF MADE – 2026
Kelesi
V Almaty zavershılsá teatralnyı festıvál ALMATY THEATRE FEST

Sońǵy jańalyqtar:

İzdeý