Almaty ǵalymdary Qazaqstan Prezıdentiniń Joldaýynda aıqyndalǵan basymdyqtardy talqylady

Qazaqstan Respýblıkasy Prezıdentiniń janyndaǵy Ulttyq ǵylym akademıasy men Qazaq ulttyq qyzdar pedagogıkalyq ýnıversıteti Memleket basshysy Qasym-Jomart Toqaevtyń Qazaqstan halqyna arnaǵan «Jańa tarıhı kezeńdegi Qazaqstannyń ózekti mindetteri» atty Joldaýyn talqylaýǵa arnalǵan kezdesý ótkizdi, - dep habarlaıdy alnews.

Kezdesýdiń taqyryby – «Joldaýdyń basymdyqtary: ulttyq memlekettilik jáne quqyqtyq sana».

İs-sharaǵa ǵylymı qaýymdastyq ókilderi, ýnıversıtettiń profesor-oqytýshylar quramy, Almaty qalasy ákimdiginiń ókilderi jáne QyzPU Stýdenttik Quryltaıynyń músheleri qatysty.

Kezdesý barysynda Qazaq ulttyq qyzdar pedagogıkalyq ýnıversıtetiniń Basqarma tóraǵasy – Rektory Beıbitgúl Kárimova Joldaýda belgilengen mindetterdi júzege asyrý akademıalyq qaýymdastyq pen memlekettik ınstıtýttardyń kúsh-jigerin biriktirýdi talap etetinin atap ótti. Ol ulttyq memlekettiliktiń tarıhı negizderin zertteý, zań ústemdigin nyǵaıtý jáne jastardyń quqyqtyq mádenıetin qalyptastyrý baǵytyndaǵy birlesken jumystyń mańyzdylyǵyna erekshe toqtaldy.

Prezıdent Joldaýynda elimizdiń áleýmettik-ekonomıkalyq damýyna, halyqtyń ál-aýqatyn arttyrýǵa, sıfrlyq ekonomıkany qalyptastyrýǵa jáne ınfraqurylymdy jańǵyrtýǵa baǵyttalǵan birqatar basym mindetter aıqyndalǵan.

Memleket basshysy 2027 jyldy «Jalpyhalyqtyq aýqymdy qurylys jyly» dep jarıalaýdy usynyp, eń tómengi jalaqy mólsherin 85 myń teńgeden 110 myń teńgege deıin arttyrýdy tapsyrdy.

Sonymen qatar, aýyl sharýashylyǵy ónimderin tereń óńdeýdi damytýǵa, agrarlyq sektorǵa jasandy ıntellekt tehnologıalaryn engizýge jáne sý resýrstaryn utymdy paıdalanýǵa erekshe nazar aýdaryldy.

Prezıdent bilim berý salasyndaǵy reformalar muǵalimderdiń jumysyn jeńildetýge jáne olardyń shamadan tys júktemesin azaıtýǵa baǵyttalýy tıis ekenin atap ótti.

Budan bólek, Joldaýda shaǵyn jáne mıkrobıznes sýbektilerin tekserýge úsh jyldyq moratorıı engizý múmkindigin qarastyrý, salyq zańnamasyna ózgerister ázirleý, jańa Azamattyq kodeksti qabyldaý jáne memlekettik kómekti shyn máninde muqtaj azamattarǵa ataýly túrde kórsetý máseleleri qozǵaldy.

Joldaýda belgilengen mindetterdi talqylaý barysynda Ulttyq ǵylym akademıasynyń, ǵylymı-zertteý ınstıtýttarynyń, Almaty qalasy ákimdiginiń ókilderi men ǵalymdar ulttyq memlekettilik, Quryltaı ınstıtýtynyń tarıhı mańyzy, zań ústemdigi jáne qoǵamdyq dıalog máseleleri boıynsha pikir almasty.

Kezdesý aıasynda memleket jáne qoǵam qaıratkeri Omarhan Óksikbaev pen túrkitanýshy ǵalym Zarıpbaı Orazbaıdyń avtorlyǵymen jaryq kórgen «Quryltaı fenomeni» kitabynyń tanystyrylymy ótti.

Sondaı-aq zańger, PhD doktory Baqytjan Saparovtyń «Konstıtýsıa saqshylary» atty tanymdyq komıksi kópshilik nazaryna usynyldy.

Aldyńǵy
Ýchenye Almaty obsýdılı prıorıtety Poslanıa Prezıdenta Kazahstana
Kelesi
Qazaqstan chempıonatynda Almaty quramasy taekvondodan 15 medal jeńip alyp, komandalyq esepte birinshi oryn ıelendi

Sońǵy jańalyqtar:

İzdeý