Kemeron saparynyń eki el úshin de ózindik mańyzy bar. Ári bul dıplomatıalyq is-qımyl aımaqtaǵy saıası jaǵdaı úshin de óz salmaǵy bar oqıǵa. 

Brıtanıa elimizdegi iri ınvestor retinde: 

Sońǵy 20 jylda brıtandyq tikeleı ınvestısıa kólemi 17 mıllıard dollarǵa jetken. Bunymen Brıtanıa elimizdegi eń iri 10 ınvestordyń biri bolyp sanalady. Byltyr Ulybrıtanıanyń elimiz ekonomıkasyna salǵan ınvestısıasy 20 paıyzǵa ósip, 795 mıllıon dollardy quraǵan. Elimizde qazir 600-ge jýyq brıtandyq bıznestiń kapıtalymen qurylǵan kásiporyn jumys istep tur. Olardyń qatarynda Shell, RioTinto, Ernst and Young, AstraZeneca sıaqty álemge belgili iri kompanıalar da bar.

Qazaqstandaǵy jáne aımaqtaǵy aǵylshyn múddesi 

Birikken Koróldiktiń bas dıplomaty birlesken baspasóz jyıynynda elimizde bolashaqta ınvestısıa salýǵa bolatyn kóptegen múmkindikter bar ekenin aıtyp. «Biz mańyzdy paıdaly qazbalar boıynsha seriktestikke qol qoıdyq. Ári brıtandyq taý-ken kompanıalaryna osy salaǵa qatysýy boıynsha qyzyqty usynystarymyz da bar», - dedi Kemeron. Demek, Brıtan taraby elimizdegi tabıǵı resýrstardy ıgerý boıynsha da qyzyǵýshylyqqa ıe. 

Kemeronnyń kindik Azıadaǵy kezekti sapary Qazaqstanmen aqyrlaspaıdy. Sońǵy núktede Mońǵolıa tur. Másele, osy alyp aımaqtaǵy kún saıyn mańyzdy bola túsken geostrategıalyq salmaq London nazaryn aýdarmaı qoımaıdy. Onyń ústine aımaqta bolashaq energıa kózine qajetti mol tabıǵı baılyqtyń bar ekenin de eskerý kerek. Buny qazirshe jalpylama túrde sırek jer elementteri dep atap júrmiz. Klımat ózgerisine baılanysty álem elderi qorshaǵan ortaǵa barynsha az zıan keltiretin energıa óndirý jolyn qarastyrýda. AES úshin de aımaqta mol ýran qorynyń bar ekeni belgili. Bunyń bárinde damyǵan elder arasynda úlken báseke bar. Jáne osy básekelik qarym-qatynas aımaqtaǵy kúshter teńgerimine de óz ózgeristerin ákelýde. Brıtanıadan kelgen dıplomat bul joly bolashaqqa qatysty osy mańyzdy baǵyttar boıynsha óz eliniń jáne aımaqtyń múddesin toǵystyrýdy kózdegeni anyq.