Almaty ákimdiginde qala ákimi Darhan Satybaldynyń tóraǵalyǵymen «Taza Qazaqstan» ekologıalyq baǵdarlamasyn júzege asyrý máseleleri boıynsha keńes ótti. Onda qalanyń sanıtarlyq jaǵdaıy, jalpy qalalyq senbilikke daıyndyq jáne ekologıalyq aılyqty ótkizý barysy talqylandy, - dep habarlaıdy alnews.
Qalalyq ekologıa jáne qorshaǵan orta basqarmasy habarlaǵandaı, 11 qazan men 11 qarasha aralyǵynda tazalyq, abattandyrý jáne ekologıalyq mádenıetti arttyrý baǵytynda 19 is-sharany qamtıtyn jospar bekitildi.
Aılyq aıasynda «Jasyl mektep» jáne «Jasyl aýla» aksıalary, kósheni, aryq jelisin, aıaldama men júrginshiler ótkelin sanıtarlyq tazalaý, sondaı-aq ekomádenıetke arnalǵan ınteraktıvti sabaqtar ótkiziledi.
11 qazanda Almatynyń barlyq aýdandarynda jalpy qalalyq senbilik uıymdastyrylady. Oǵan 5 myńnan astam adam qatysady dep josparlanǵan. Qala boıynsha 23 mekenjaıda aýmaqtardy tazalaý, aǵash pen buta otyrǵyzý jáne mádenı-tanymdyq is-sharalar ótedi.
Senbilik ótetin oryndardyń qatarynda: Boraldaı ózeni boıyndaǵy skver (Alataý aýdany), Abylaı han dańǵyly (Almaly aýdany), Seıfýllın dańǵyly men Jansúgirov kóshesiniń qıylysy (Jetisý aýdany), «Dostyq» saıabaǵy (Bostandyq aýdany), Esentaı ózeni (Medeý aýdany), «Tastybulaq» skveri (Naýryzbaı aýdany), «Jas qanat» shaǵynaýdany (Túrksib aýdany) bar.
Budan bólek, qyrkúıek aıynyń sońynan beri 100 myń buta otyrǵyzý jumysy júrgizilýde. Qazirgi ýaqytta 10,5 myńnan astam ósimdik egilip, 15 myń otyrǵyzý shuńqyry daıyndaldy. Jumys segiz aýdannyń 13 ýchaskesin qamtıdy.
Keńes barysynda jeke sektorlarmen yntymaqtastyqtyń jańa baǵyttary tanystyryldy. Fabriqa jobasy aıasynda toqyma qaldyǵyn jınaýǵa arnalǵan 32 konteıner ornatylyp, táýligine 1,5 tonnadan astam mata qaldyǵy shyǵarylady. Sonymen qatar «Baqytty otbasy» áleýmettik ortalyǵymen birlesip, áıelderdi jumyspen qamtý jáne qaıta óńdelgen materıaldardan ónim jasaý baǵdarlamasy iske asyrylyp jatyr.
Eco Network ekohabynyń jetekshisi Evgenıı Muhamedjanovtyń aıtýynsha, Almatyda qaldyqty bólek jınaý ınfraqurylymy damyp keledi. Qazirdiń ózinde 560 tonnadan astam materıal qaıta óńdeýge jiberilgen. Qalada 70 fandomat ornatylyp, olar arqyly 176 myń plasık bótelke men 45 myń alúmını qalbyr jınalǵan.
Keńes qorytyndysynda Darhan Satybaldy ekologıalyq aılyq sheńberindegi barlyq is-sharalardyń sapaly ótýin qamtamasyz etýdi tapsyrdy. Ásirese qoǵamdyq keńistikterdiń, aryq jelileriniń jáne aýlalardyń sanıtarlyq jaǵdaıyna erekshe nazar aýdarý qajettigin atap ótti.
Qala ákimi atap ótkendeı, «Taza Qazaqstan» baǵdarlamasy – tazalyq mádenıetin qalyptastyrýǵa jáne qorshaǵan ortaǵa jaýapkershilikpen qaraýǵa baǵyttalǵan mańyzdy bastama.
