Almatyda Jastar saıasaty basqarmasynyń qoldaýymen qala volonterleri jaz boıy barlyq aýdandarda tegin otandyq fılmderdi kórsetip, ashyq aspan astyndaǵy erekshe jobany júzege asyrdy. Bıylǵy maýsym respýblıkalyq «Taza Qazaqstan» aksıasy aıasynda ótip, árbir kórsetilim aldynda kórermenderge ekologıalyq mádenıetti arttyrýǵa baǵyttalǵan túsindirme jumystary júrgizildi. Keıbir fılmderden keıin senbilik sharalary uıymdastyrylyp, jastar qala tazalyǵyna óz úlesin qosty.
Úsh aıdyń ishinde 50-den astam kınokórsetilim ótkizilip, myńdaǵan almatylyqtar jańa qazaqstandyq fılmderdi tamashalaý múmkindigine ıe boldy.
«Biz bul jobany tek mádenı demalys retinde ǵana emes, jastardyń ekologıalyq mádenıetin qalyptastyryp, áleýmettik jaýapkershiligin arttyratyn mańyzdy alań retinde qabyldaımyz. Kıno arqyly qoǵamǵa oı salýǵa, jastardyń belsendiligin arttyrýǵa múmkindik bar. Sondyqtan jobany aldaǵy jyly da jalǵastyrýdy josparlap otyrmyz», – dedi Almaty qalasy Jastar saıasaty basqarmasynyń basshysy Azız Kajdenbek.
«Men osy joba aıasynda úsh-tórt ret fılm kórdim. Eń keremeti – jańa qazaqstandyq kartınalardy alǵashqylardyń biri bolyp kórý múmkindigi boldy. Ár fılmnen keıin dostarymmen birge talqylap, jańa áser aldyq. Bul tek kıno emes, naǵyz mádenı kezdesý ornyna aınaldy», – dedi kórsetilimge qatysqan jas almatylyq Aıdos Erjanov.
Uıymdastyrýshylardyń aıtýynsha, ashyq aspan astyndaǵy kınokórsetilimder turǵyndardyń súıikti mádenı jobasyna aınalyp úlgerdi. Bul bastama keler jyly da jalǵasyn taýyp, qala turǵyndary men qonaqtaryna jańa qazaqstandyq fılmderdi tamashalaýǵa múmkindik beredi.
