Almatyda Qazaq sport jáne týrızm akademıasynyń jańa zamanaýı kúres sport kesheni ashyldy. Akademıanyń óz qarajatyna salynǵan bul nysan oqý ornynyń sport ınfraqurylymyn aıtarlyqtaı keńeıtip, bolashaq balýandarynyń kásibı daıyndyǵyn kúsheıtýdi maqsat etedi.
Jańa keshenniń jalpy aýmaǵy – myń sharshy metr. Keń ári jaryq zalda tórt bozkilem qatar ornalasqan, Qazaq kúresi, erkin jáne grek-rım kúresi, dzúdo men sambo sport túrlerin tolyqqandy damytýǵa qajetti barlyq jaǵdaı jasalǵan. Bir aýysymda 700-ge jýyq sportshy jattyǵa alady. Buǵan deıin Akademıada bir ǵana bozkilem ornalasqan shaǵyn zal jumys istegen edi.
Ashylý rásimine QR Ǵylym jáne joǵary bilim mınıstrligi Joǵary jáne joǵary oqý ornynan keıingi bilim komıteti tóraǵasynyń orynbasary Aqerke Abylaıhan, Olımpıada chempıony Iýrıı Melnıchenko, Parıj Olımpıadasynyń júldegeri Demeý Jadyraev jáne Paralımpıada oıyndarynyń júldegeri Zarına Raıfova qatysty. Shara barysynda sportshylar jas balýandarǵa sheberlik saǵatyn ótkizip, tájirıbelerimen bólisti.
Qazaq sport jáne týrızm akademıasy — qazaq kúres mektebiniń qalyptasýyna úlken úles qosqan oqý orny. Munda ár jyldary Olımpıada jáne álem chempıondary Jaqsylyq Úshkempirov, Shámil Serikov, Valerıı Rezansev, Anatolıı Kolesov jáne Iýrıı Melnıchenko sekildi talaı tanymal balýandar tárbıelendi. Olardyń jolyn búginde Dáýlet Turlyhanov, Asqat Jitkeev, Nurbaqyt Teńizbaev, Ǵusman Qyrǵyzbaev, Demeý Jadyraev jáne Paralımpıada júldegeri Zarına Raıfova jalǵastyryp keledi.
Akademıada jańa kúres bazasynyń ashylýy — oqý ornynyń sporttyq baǵyttaǵy múmkindikterin keńeıtip qana qoımaı, jas sportshylardyń halyqaralyq arenada básekege qabilettiligin arttyrýǵa yqpal etetin mańyzdy qadam retinde baǵalanyp otyr.
Kúres zaly ashylǵannan keıin Akademıanyń negizgi ǵımaratynda Ortalyq Azıa elderiniń Stýdenttik sport federasıasynyń quryltaı konferensıasy ótti. Jıynǵa Ortalyq Azıa memleketteri – Qyrǵyzstan, Ózbekstan, Tájikstannyń sport ókilderi qatysyp, Túrikmenstan men Mońǵolıanyń delegattary onlaın formatta qosyldy.
Plenarlyq otyrys «Stýdenttik sporttyń óńirlik yntymaqtastyqty damytý men jastar áleýetin nyǵaıtýdaǵy róli» taqyrybynda ótti. Jıynda stýdenttik sportty damytý, halyqaralyq áriptestik ornatý jáne aımaqtyq yntymaqtastyqty kúsheıtýge qatysty mańyzdy máseleler talqylandy.
Shara qorytyndysynda Ortalyq Azıa stýdenttik sport federasıasynyń quryltaı qujattaryna qol qoıyldy. Qaırat Zakıránov Ortalyq Azıa stýdenttik sport federasıasynyń Prezıdenti bolyp saılandy.
Stýdenttik sport — densaýlyqty nyǵaıtatyn, tárbıe beretin ári kóshbasshylyq qasıetti qalyptastyratyn mańyzdy baǵyt. Stýdenttik sportty damytý jastardyń sportqa qyzyǵýshylyǵyn arttyryp, olardyń áleýetin kóteredi. Sonymen qatar, halyqaralyq áriptestikti kúsheıtip, elder arasyndaǵy turaqtylyq pen ózara senimdi nyǵaıtýǵa yqpal etedi.
