Jetisý aýdany ákimi apparatynyń tapsyrysy boıynsha aǵymdaǵy jóndeý aıasynda «Arbat» júrginshiler aımaǵy men Aınabulaq shaǵynaýdanyndaǵy Maqataev kóshesindegi júrginshiler joly tolyq kórkeıtildi, - dep habarlaıdy alnews.
Jumys Respýblıka kúnine deıin aıaqtalyp, aýdan turǵyndaryna jasalǵan syı ári qalalyq ortany jańǵyrtýdyń bir kórinisi boldy.
Joba aıasynda turǵyndarǵa qolaıly orta qalyptastyrý jáne qoǵamdyq keńistikti jańartý boıynsha keshendi jumys júrgizildi. Atap aıtqanda: aýmaǵy 9,5 myń m² jańa kespe tas tóseldi, 266 zamanaýı sham tiregi ornatyldy, 14,9 myń m² aýmaqqa kógal tóselip, uzyndyǵy 7,7 km avtosýarý júıesi júrgizildi, balalar alańy salyndy, 6 jańa aıaldama kesheni ornatyldy, 25 qoqys jáshigi, 40 oryndyq, 24 vazon qoıyldy, 8 shekteý baǵany ornatylyp, 274 p.m. jasyl aımaq qorshaýy ornatyldy.
Sonymen qatar júrginshiler aımaǵynda erekshe art-nysandar paıda boldy — kıiz úı pishinindegi sándik arka jáne shaǵynaýdan ataýy jazylǵan ınstallásıa. Balalar úshin jarqyn dızaındaǵy pıksel-alańsha jasalyp, otbasylyq demalystyń jańa tartymdy ornyna aınaldy.
Jobanyń júzege asyrylýy aýdandaǵy qalalyq ortanyń sapasyn arttyrýǵa, aýmaqtyń estetıkalyq kelbetin jaqsartýǵa jáne turǵyndar úshin qolaıly ınfraqurylym qalyptastyrýǵa baǵyttalǵan.
