GITEX AI Kazakhstan 2027: óńirge quıylatyn mıllıardtaǵan ınvestısıa aıasynda jasandy ıntellektini keńinen engizýge serpin beredi

2027 jyly 7-8 maýsymda Almatyda GITEX AI Kazakhstan kórmesi ekinshi ret ótedi, - dep habarlaıdy alnews.

Tehnologıa men jasandy ıntellekt salasyndaǵy óńirdegi eń iri is-shara halyqaralyq ınvestısıa tartýǵa, sondaı-aq JI ınfraqurylymyn, energetıka men ónerkásipti damytýǵa yqpal etedi.

Almaty, Qazaqstan. Ortalyq Azıa men Kavkaz tehnologıalyq damýdyń jańa kezeńine qadam basyp keledi. Jasandy ıntellekt salasyndaǵy mıllıardtaǵan dollarlyq jobalar naqty júzege asa bastady. Óńir Eýrazıanyń sıfrlyq ortalyǵyna aınalýdy kózdep otyr.

Óńir elderi sıfrlyq saladaǵy yntymaqtastyqty barǵan saıyn nyǵaıtyp keledi. Statista boljamyna sáıkes, 2029 jylǵa qaraı óńirlik IT-qyzmetter naryǵynyń kólemi 5,6 mlrd dollarǵa jetedi. Qazaqstan 2025 jyldyń qorytyndysy boıynsha IT-qyzmetter eksportynan alǵash ret 1 mlrd dollardan astam tabys tapty. Atap aıtqanda, bul kórsetkish 2020 jyly 33,5 mln dollardan 2025 jyly 1,142 mlrd dollarǵa deıin ósip, bes jyl ishinde 34 esege artty. Osyndaı jaǵdaıda GITEX AI Kazakhstan kórmesiniń ekinshi ret ótkizilýi sıfrlyq saladaǵy maqsat-mindetterdi jasandy ıntellektini keńinen engizý arqyly naqty iske asyrýǵa múmkindik beredi. Kórme ınfraqurylym, energetıka jáne ónerkásip salalaryn jańǵyrtýǵa yqpal etip, Qazaqstannyń JI ázirleý, ınvestısıa tartý jáne ınovasıalardy damytý baǵytyndaǵy Eýrazıanyń mańyzdy ortalyǵy retindegi ornyn nyǵaıtady.

GITEX AI Kazakhstan 2027 halyqaralyq kórmesi Qazaqstan Prezıdenti Qasym-Jomart Toqaevtyń qoldaýymen 7-8 maýsymda Almatydaǵy «Atakent» QİYO-da ótedi.

Ortalyq Azıadaǵy tehnologıa, jasandy ıntellekt jáne startap salasyndaǵy eń iri is-shara Qazaqstan Respýblıkasynyń Jasandy ıntellekt jáne sıfrlyq damý mınıstrliginiń qoldaýymen, Astana Hub jáne Almaty qalasy ákimdigimen seriktestikte uıymdastyrylady.

2026 jyly GITEX AI Kazakhstan Ortalyq Azıa men Kavkazdaǵy tehnologıa, jasandy ıntellekt jáne sıfrlyq ınvestısıa salasyndaǵy mańyzdy is-shara retinde tanyldy. Kórmeni álemdegi tehnologıa men JI ekojúıeleriniń eń iri jelisi sanalatyn GITEX-tiń jahandyq uıymdastyrýshysy inD kompanıasy uıymdastyrdy. Eki kún ishinde kórmege eksponent retinde 334 kompanıa men startap qatysyp, ony 86 elden kelgen 12 000 adam tamashalady. Kórmeni Prezıdent Qasym-Jomart Toqaev ashty. Sondaı-aq is-shara aıasynda Memleket basshysynyń tóraǵalyǵymen Jasandy ıntellektini damytý jónindegi keńestiń ekinshi otyrysy ótti.

Keńeıtilgen baǵdarlama men jańa ekspozısıalar damýdyń kelesi kezeńine jol ashady
GITEX AI Kazakhstan 2027 kórmesi ótken jylǵy jetistikterdi jalǵastyrady. Bıyl satyp alý jáne iskerlik kezdesýler baǵdarlamasy keńeıtilip, bes jańa taqyryptyq ekspozısıa usynylady. Olar: GITEX SuperComputeX, GITEX New EnergyX, GITEX RobotiX, GITEX Cyber Valley jáne GITEX Intelligent Cities x Connectivity.

Bul baǵyttar Qazaqstanda júzege asyrylyp jatqan jobalarmen tikeleı baılanysty. Olardyń qatarynda Ekibastuzdaǵy sýperkompúterlik qýattardy damytý jáne derekter ortalyqtarynyń jumysyna qajetti energetıkalyq ınfraqurylymdy qalyptastyrý bar.

Jańa ekspozısıalar ekonomıkalyq ósimdi jedeldetetin tehnologıalardy damytý úshin memlekettik organdardyń, halyqaralyq tehnologıalyq kompanıalardyń, ınvestorlar men startap negizin qalaýshylardyń basyn qosady. Bul álemdegi sıfrlyq ekonomıkasy qarqyndy damyp kele jatqan óńirlerdiń birinde halyqaralyq ınvestısıa tartýǵa, elder arasyndaǵy áriptestikti nyǵaıtýǵa jáne jasandy ıntellektini keńinen engizýge jańa múmkindikter ashady.

2027 jylǵy kórmeniń baǵdarlamasy men negizgi maqsattary Almatyda ótken netvorkıng kezdesýinde tanystyryldy. GITEX AI Kazakhstan uıymdastyrýshylary men qabyldaýshy tarap óńirlik seriktesterdi jáne tehnologıalyq kompanıalardyń basshylaryn shaqyryp, keńeıtilgen kún tártibimen tanystyrdy. Kezdesýde yntymaqtastyq, ınvestısıa tartý jáne jańa naryqtarǵa shyǵý múmkindikteri talqylandy.

Qazaqstan Respýblıkasy Premer-mınıstriniń orynbasary – Jasandy ıntellekt jáne sıfrlyq damý mınıstri Jaslan Mádıev eldiń Digital Qazaqstan ulttyq strategıasy aıasyndaǵy jasandy ıntellektini damytý jónindegi josparǵa toqtaldy.

 

«Qazaqstandaǵy JI transformasıasynyń kelesi kezeńi jasandy ıntellektini jaı ǵana engizýmen shektelmeıdi. Eń bastysy, ony keńinen qoldanýǵa qajetti búkil negizdi qalyptastyrý. Buǵan esepteý qýattary, energetıka, sıfrlyq baılanys, bilikti kadrlar, retteý tetikteri men kapıtal kiredi. Qazaqstan qazirdiń ózinde osy baǵyttaǵy jumysty qolǵa aldy. Digital Qazaqstan strategıasy bul ózgeristerdiń ulttyq deńgeıdegi negizgi baǵyttaryn aıqyndaıdy. Al GITEX AI Kazakhstan sıaqty alańdar elimizdiń ekojúıesin álemdik tehnologıa kóshbasshylarymen, ınvestorlarmen jáne seriktestermen baılanystyrady. Bizdiń maqsatymyz – Qazaqstandy jasandy ıntellektini ázirleý, engizý jáne keńinen qoldaný boıynsha Eýrazıadaǵy negizgi ortalyqtardyń birine aınaldyrý», – dedi Jaslan Mádıev.

 

Jasandy ıntellekt transformasıasynyń óńirlik baǵdary
GITEX AI Kazakhstan 2027 kórmesiniń keńeıtilgen baǵdarlamasy men halyqaralyq qatysýshylar sanynyń artýy jaqynda jarıalanǵan «Sıfrlyq Jibek joly» jobasynyń damýymen tuspa-tus keledi. Qazaqstan derekter ortalyqtaryn, ǵaryshtyq esepteý júıelerin, spýtnıkterdi jáne Transkaspıı talshyqty-optıkalyq baılanys jelisin biriktiretin biryńǵaı JI ınfraqurylymyn qurýdy josparlap otyr. Bul Kaspıı teńiziniń túbimen Ázirbaıjan men Qazaqstandy baılanystyratyn uzyndyǵy 380 shaqyrymdyq sýasty telekomýnıkasıalyq kabeli. 

Kórmeniń ekinshi ret ótkizilýi Ortalyq Azıa men Kavkazda jasandy ıntellektini damytýǵa jańa serpin beredi.

Google tapsyrysy boıynsha júrgizilgen zertteýge sáıkes, aldaǵy on jyl ishinde generatıvti jasandy ıntellekt Armenıa, Ázirbaıjan, Grýzıa jáne Qazaqstan ekonomıkasyna jyl saıyn qosymsha 12-15 mlrd dollar ákelýi múmkin. Bul atalǵan elderdiń jıyntyq jalpy ishki óniminiń shamamen 4%-yna teń. KPMG derekterine sáıkes, óńirdegi kompanıalardyń 53%-y jasandy ıntellektini keń aýqymda engizip úlgergen. Bul álemdik ortasha kórsetkishten (24%) eki eseden astam joǵary. Sonymen qatar Qazaqstan kompanıalary bıznes sheshimderin qabyldaý kezinde jasandy ıntellekt usynymdaryna óńirdegi basqa elderge qaraǵanda kóbirek senim artady. Bul kórsetkish 86%.

Qazaqstan óńirdiń sıfrlyq transformasıasynda jetekshi ról atqaryp keledi. Digital Qazaqstan ulttyq strategıasy jasandy ıntellektini is júzinde engizýge baǵyttalǵan. Onyń aıasynda Ulttyq JI platformasyn damytý, JI tehnologıalaryn eGov memlekettik qyzmetterine ıntegrasıalaý jáne bilikti mamandar daıarlaýǵa aýqymdy ınvestısıalar salý kózdelgen. Jasandy ıntellekt týraly zań men Sıfrlyq kodeks kompanıalar men ınvestorlar úshin quqyqtyq retteýdiń aıqyndyǵyn qamtamasyz etedi.

NVIDIA jáne Firebird kompanıalarymen jasalǵan 10 mlrd dollarlyq kelisim Ekibastuzdaǵy Derekter ortalyqtary alqabynda shamamen 100 000 grafıkalyq prosesorǵa (GPU) negizdelgen táýelsiz ulttyq sýperkompúterlik qýattardy qurýǵa múmkindik beredi. Jergilikti tehnologıalyq ekojúıe de qarqyndy damyp keledi. Búginde Astana Hub-ta 2000-nan astam kompanıa jumys isteıdi. Al onyń rezıdentteriniń IT-qyzmetter eksporty 2025 jyly 633,8 mln dollar boldy.

Jasandy ıntellekt salasyndaǵy maqsattardy naqty ekonomıkalyq nátıjege qalaı aınaldyrýǵa bolady?
GITEX AI Kazakhstan Qazaqstannyń jáne tutastaı óńirdiń jasandy ıntellekt pen sıfrlyq ınfraqurylymdy damytý salasyndaǵy maqsattaryna saı keledi. Kórme jergilikti ekojúıeler men jahandyq tehnologıalyq qaýymdastyqtardy biriktirip, jasandy ıntellekt, úlken derekter, bulttyq tehnologıa, SaaS, derekter ortalyqtary, energetıkalyq tehnologıa, kıberqaýipsizdik, baılanys jáne jelilik ınfraqurylym baǵyttaryn qamtıdy.

 

«Ortalyq Azıa men Kavkaz elderi jasandy ıntellektini endi alys bolashaqtyń múmkindigi retinde qarastyrmaıdy. Olar naqty josparlardy júzege asyryp, memlekettik-jekemenshik áriptestikti damytyp, JI-di keń aýqymda engizýge qajetti esepteý, energetıkalyq, kadrlyq jáne normatıvtik negizdi qalyptastyryp jatyr. GITEX AI Kazakhstan osy úderistiń barlyq býynyn biriktiredi. Bul óńirlik basymdyqtardy ınvestısıa tartýǵa qolaıly jobalarǵa, komersıalyq kelisimderge jáne óńirdiń qalalarynda, ónerkásibi men ekonomıkasynda naqty qoldanylatyn tehnologıalarǵa aınaldyrýǵa múmkindik beredi», - dedi GITEX bas dırektory Trıksı Lo Mırmand.

Aldyńǵy
V Almaty prodoljaetsá realızasıa mer po stabılızasıı sen na sosıalno znachımye prodýkty
Kelesi
GITEX AI Kazakhstan 2027 ýskorıt masshtabnoe vnedrenıe ıskýsstvennogo ıntellekta na fone mnogomıllıardnyh ınvestısıı v tehnologıı regıona

Sońǵy jańalyqtar:

İzdeý