Budan buryn Beıjińge Reseı Syrtqy ister mınıstri Sergeı Lavrov qysqa ýaqyttyq saparmen baryp qaıtqan. Sáýirdiń bas sheninde AQSH-tyń Qarjy mınıstri Djanet Iellen Qytaıǵa ekinshi saparyn aıaqtady. Bul barysta ol Qytaıdyń joǵary laýazymdy jetekshilerimen sanksıa máseleleri boıynsha sóılesken.
Al Blınken sapary Beıjińniń Ýkraına máselesinde sheshýshi tańdaý jasaýǵa shaqyrý úshin jasaldy dep túsinýge bolady. Blınkenniń Beıjińde aıtqan: “Eger Qytaı Reseıge kómek kórsetý máselesinde sheshim qabyldamasa, onda ol sheshimdi Vashıngton qabyldaıdy” dege sózi qazir qyzý talqyda tur.
Osydan keıin Blınken sapary qarsańynda qytaılyq aqparat keńistiginde ultshyl, solshyl sarapshylardyń mysqyl men kekesindi molaıtýynyń sebebin túsinýge bolady. Bylaısha aıtqanda Blınken kezekti joly Qytaıǵa salmaqty máselerlermen keldi. Reseımen qarym-qatynas aldynda Qytaıǵa tańdaý jasaý qıynǵa soǵýda. Sondyqtan Blınkenniń ýájin tyńdaǵysy kelmegen tarap oǵan túrli dıplomatıalyq sıgnaldar arqyly qysym jaratty.
Beıjińdegi Qytaı Syrtqy ister ýnıversıtetiniń profesory Lı Haıdýn BAQ-qa mynadaı pikirimen bólisipti: «Biz AQSH sheneýnikteriniń Qytaımen baılanysty qatynasty jaqsartý úshin kelýin quptaımyz. Biraq Blınken Qytaıǵa últımatým qoıý úshin kelgen syńaıly. Biz oǵan berilmeımiz jáne negizgi máselelerimizde ymyraǵa kelmeımiz». Bul pikirden Beıjińniń Blınken saparyna qaratqan kózqarasy ańǵarylady.
26 sáýirde Blınken Qytaı basshysy Sı Szınpınniń qabyldaýynda boldy jáne SİM jetekshisi Van Imen kezdesti. Van I Qurama Shtattardy Qytaıdyń damýyna tosqaýyl qoıyp otyr dep aıyptasa, Blınken Qytaıdy Reseıdiń Ýkraındaǵy soǵysyn ashyq qoldady dep synǵa aldy. Pikir kereǵarlyǵan qarap AQSH-Qytaı qarym-qatynasy tipti de tereń qaıshylyqqa ulasqanyn ańǵarýǵa bolady.
