Almaty iskerlik týrızmniń halyqaralyq naryǵyndaǵy ornyn nyǵaıtyp, iri kongres, forým men konferensıa ótkizý múmkindigin keńeıtip keledi, - dep habarlaıdy alnews.
8-11 qarasha aralyǵynda Panama-Sıtıde ótken Halyqaralyq kongrester men konvensıalar qaýymdastyǵynyń (ICCA) 65-shi jyl saıynǵy kongresinde Almaty Tourism Bureau ókilderi megapolıstiń týrısik jáne iskerlik ınfraqurylymyn tanystyrdy. Bul týraly Almatynyń Týrızm basqarmasynyń ókilderi aıtty.
Bıylǵy kongreske 80-nen astam elden 1 myńnan astam maman jáne 100-den astam halyqaralyq qaýymdastyqtyń ókilderi qatysty. Mundaı basqosýlar halyqaralyq is-sharalardy qaı qalada ótkizý jóninde sheshim qabyldaıtyn uıymdarmen tikeleı baılanys ornatýǵa múmkindik beredi.
Almaty Tourism Bureau mamandary Visit Almaty brendimen sheteldik seriktestermen kezdesip, halyqaralyq konferensıalar men forýmdardy Almatyda ótkizý múmkindikterin tanystyrýda. Ásirese, medısına, ǵylym, tehnologıa, bıznes jáne ınovasıa salalaryndaǵy is-sharalardy qalaǵa tartýǵa basymdyq berilgen.
2025 jyldyń qorytyndysy boıynsha Almaty ICCA álemdik reıtıńinde birden 10 satyǵa joǵarylady. Qalada ótken halyqaralyq is-sharalardyń jalpy ekonomıkalyq áseri shamamen 2,94 mln AQSH dollary boldy. Ár is-shara qala ekonomıkasyna orta eseppen 327 myń dollar kiris ákelgen. Al halyqaralyq qatysýshylardyń árqaısysy orta eseppen 1 210 dollar jumsaǵan.
2027 jyly halyqaralyq kásibı qaýymdastyqtarmen baılanysty nyǵaıtyp, Almatyda ótkizýge bolatyn iri is-sharalardy anyqtaý jáne olardy qalada uıymdastyrýǵa ótinim berý josparlanyp otyr.
Jańa iskerlik is-sharalardy tartý sheteldik qonaqtar sanyn arttyryp, qonaq úıler men meıramhanalardyń qyzmetine suranysty kóbeıtýge, sondaı-aq qazaqstandyq jáne sheteldik mamandar arasyndaǵy kásibı baılanysty keńeıtýge jol ashady.