Búgin Almatyda densaýlyq saqtaý júıesindegi Qazaqstannyń alǵashqy Sıfrlyq sheshimder quzyrettiligi ortalyǵy ashyldy, - dep habarlaıdy alnews.
Ortalyq qalalyq klınıkalyq aýrýhananyń Telemedısına ortalyǵy bazasynda qurylyp, qaladaǵy medısınalyq uıymdardy sıfrlandyrý jumysyn úılestiredi. Bul týraly Almaty qalasy Qoǵamdyq densaýlyq saqtaý basqarmasynyń ókilderi aıtty.
Ortalyqty qurý qajettiligi medısınalyq uıymdardyń ózara úılesimdi jumys isteı bermeıtin ártúrli sıfrlyq platformalardy paıdalanýyna baılanysty týyndady. Sonymen qatar keıbir uıymdar birdeı qyzmet atqaratyn júıelerdi bólek satyp alýy múmkin. Bul shyǵyndardyń qaıtalanýyna ákeledi.
Jańa ortalyq sıfrlyq sheshimderdiń biryńǵaı tizimin júrgizip, satyp alý rásimderi bastalǵanǵa deıin usynymdar berip, ádistemelik qoldaý kórsetedi. Bul qarajatty utymdy jumsaýǵa, jınaqtalǵan tájirıbeni eskerýge jáne ózara úılesimdi tehnologıany engizýge múmkindik beredi.
Josparlanǵan sıfrlyq sheshimdi tirkeýge bir jumys kúni, al ony qaraýǵa bes jumys kúnine deıin ýaqyt beriledi. Ortalyq jańa zańdy tulǵa qurmaı jáne qosymsha qarjy bólmeı, jumys istep turǵan Telemedısına ortalyǵynyń bazasynda ashyldy.
Eske salaıyq, Telemedısına ortalyǵy COVID-19 pandemıasy kezinde jumysyn bastap, sodan beri Almaty turǵyndary men medısınalyq uıymdar arasyndaǵy mańyzdy baılanys býynyna aınaldy.
Qala turǵyndary táýlik boıy jumys isteıtin 1312 nómirine habarlasyp, anyqtamalyq aqparat ala alady, medısınalyq kómekke qatysty máseleler boıynsha ótinish bildirip, shaǵym nemese alǵys qaldyra alady.
Alty jyl ishinde ortalyq 3,8 mıllıonǵa jýyq qońyraýdy qabyldap, 348 myń ótinishti tirkedi. COVID-19 juqtyrǵan 175 myń naýqas pen 37 myń júkti áıel medısınalyq baqylaýda boldy.
Qazir ortalyq mamandary júkti áıelderdiń, sondaı-aq stasıonardan shyǵarylǵan náresteler men balalardyń medısınalyq baqylaýǵa alynýyn qadaǵalaıdy.
Ortalyq jumysy qazirdiń ózinde nátıje berip otyr: memlekettik emhanalarǵa qatysty shaǵymdar sany 76%-ǵa azaıdy. Sonymen qatar stasıonardan shyǵarylǵan balalardy ýaqytyly tekserý jáne jańa týǵan nárestelerdi patronajdyq baqylaý kórsetkishteri jaqsardy.
Qala turǵyndary úshin bul medısınalyq uıymdar arasyndaǵy ózara is-qımyldyń úılesimdi bolýyn, aqparattyń jedel almasýyn, sondaı-aq zamanaýı sıfrlyq tehnologıanyń arqasynda medısınalyq kómektiń qoljetimdiligi men sapasynyń artýyn bildiredi.