Alataý dástúrli óner teatrynda belgili qazaq aqyny Marfýǵa Aıtqojanyń 90 jas mereıtoıyna arnalǵan «Jyr aqqýy – Marfýǵa» atty shyǵarmashylyq kesh ótti, - dep habarlaıdy alnews.
Mereıtoı ıesin quttyqtaýǵa jazýshylar, aqyndar, belgili óner qaıratkerleri men shyǵarmashylyq zıaly qaýym ókilderi jınaldy. İs-shara Almaty ákimdiginiń qoldaýymen uıymdastyryldy.
Marfýǵa Aıtqoja – Memlekettik syılyqtyń laýreaty, Qazaqstannyń halyq jazýshysy, Qazaqstannyń eńbek sińirgen qaıratkeri, Almaty qalasynyń Qurmetti azamaty, «Barys», «Parasat» jáne «Qurmet» ordenderiniń ıegeri. Týǵan jer, mahabbat, adam sezimi men halyq taǵdyryn arqaý etken shyǵarmalary qazaq poezıasynda aıryqsha oryn alady.
Mereıtoı keshin dırıjer Jeksen Aısynnyń jetekshiligimen Qurmanǵazy atyndaǵy Qazaq memlekettik akademıalyq halyq aspaptar orkestri ashty. Mýzykalyq qoıylymdar aqynnyń ómiri men shyǵarmashylyǵyn tanystyrǵan poezıalyq kompozısıalarmen alma-kezek órilip otyrdy.
Keshte Qazaqstannyń halyq artısi Shahımardan Ábilov, Qazaqstannyń eńbek sińirgen qaıratkerleri Mahmut Toıkenov, Gúlzat Dáýirbaeva, Ádilet Jeksenbı, Tilebek Qojanuly, Erkin Shúkiman, Qabylash Ábikeıuly jáne halyqaralyq baıqaýlardyń laýreaty Nursultan Sabırov óner kórsetti.
Baǵdarlamadaǵy erekshe qoıylymdardyń biri akter Bolat Ábdilmanov oryndaǵan «Abaı amanaty» monology boldy. Al «Alataý» teatrynyń artıseri «Aqqý júrek» atty poezıalyq kompozısıa usyndy.
Kesh qonaqtarynyń qatarynda Almaty qalasy ákiminiń orynbasary Abzal Núkenov pen Qazaqstan Jazýshylar odaǵy tóraǵasynyń orynbasary Ǵalym Qalıbekuly boldy. Olar aqyndy mereıtoıymen quttyqtady.
Kesh sońynda Marfýǵa Aıtqoja kórermenderge alǵys bildirdi. Sondaı-aq Almaty ákimdigine, uıymdastyrýshylarǵa, óner kórsetken artıserge jáne mereıtoı qýanyshyn birge bólisýge kelgen barsha qaýymǵa rızashylyǵyn jetkizdi.