Almatyda shaǵyn jáne orta bıznes nysandarynan bólinetin zıandy shyǵaryndylardy azaıtý jumystary jalǵasýda, - dep habarlaıdy alnews.
«Eco Almaty» JSHS mamandary dámhana, káýaphana, monsha jáne tehnıkalyq qyzmet kórsetý stansıalarynyń ıelerine jańa ekologıalyq talaptardy túsindirý jumysyn júrgizip jatyr.
Kómir, otyn jáne suıyq otyndy paıdalanýǵa erekshe nazar aýdarylýda. Olardy jaqqan kezde tútin, kúıe jáne basqa da zıandy zattar bólinip, atmosferaǵa taralady. Bul jaqyn mańdaǵy turǵyn úılerdiń aýa sapasynyń nasharlaýyna ákelýi múmkin.
«Eco Almaty» JSHS mamandarynyń málimetinshe, túsindirý jumystary barysynda mamandar kásipkerlik nysandarynda qandaı otyn qoldanylatynyn anyqtap, kásipkerlerge Atmosferalyq aýany qorǵaý qaǵıdalarynyń jańa talaptaryna aldyn ala daıyndalý qajettigin túsindiredi.
Atap aıtqanda, qujatta shyǵaryndylar deńgeıi tómen aımaqtardyń (LEZ) gazdandyrylǵan bólikterinde óndiristik maqsatta qatty jáne suıyq otyndy paıdalanýǵa shekteý qarastyrylǵan. Sondaı-aq atmosferany lastaıtyn turaqty kózderden bólinetin shyǵaryndylardy tazartýǵa qoıylatyn talaptar belgilengen.
Qaǵıdalardyń keıbir erejesi 2027 jyly qańtarda kúshine enedi. Olardy LEZ aýmaǵynda is júzinde qoldaný úshin aımaqtyń shekarasy ákimdiktiń jeke qaýlysymen bekitilýge tıis.
Kásipkerlerge tabıǵı gazǵa kóshýdi aldyn ala qarastyrý, jabdyqtardyń jaı-kúıin tekserý jáne qajet bolǵan jaǵdaıda shyǵaryndylardy tazartý júıelerin ornatý usynylady.
Aqparattyq-túsindirý jumystary Almatynyń ártúrli aýdandarynda júrgizilip jatyr. Bul sharalar kásipkerlerdi jańa ekologıalyq talaptarǵa daıyndaýǵa jáne atmosferalyq aýanyń lastanýyn azaıtýǵa baǵyttalǵan.