Almatyda jańa úlgidegi aqyldy qalalyq kómekshi iske qosyldy

Almatyda qalany tanyp-bilýge, kórikti jerlerdi tabýǵa, mádenı is-sharalar týraly aqparat alýǵa jáne qajetti málimetterdi bilýge kómektesetin Jerry atty jańa sıfrlyq servıs iske qosyldy, - dep habarlaıdy alnews.

Bul kóshelerde ornatylǵan ınteraktıvti smart taqtalar. Qalalyq týrızm basqarmasynyń málimetinshe, jobany qazaqstandyq CITIX kompanıasy Visit Almaty uıymymen birlesip júzege asyrdy.

Qazirgi ýaqytta Almatyda 31 smart taqta ornatylǵan. Olar Terenkýrda, Respýblıka saraıynyń mańynda, 28 gvardıashy-panfılovshylar saıabaǵynda, Panfılov jáne Tóle bı kóshelerinde, Esentaı men Kishi Almaty ózenderiniń jaǵalaýlarynda, metro beketteriniń, Ortalyq ámbebap dúkeni men Ortalyq memlekettik mýzeıdiń janynda ornalasqan. Jaqyn arada taǵy tórt qurylǵy ornatý josparlanyp otyr.

Smart taqtalar arqyly jaqyn mańdaǵy dámhana, dárihana, mýzeı, dúkender men qoǵamdyq kólik aıaldamalaryn tabýǵa bolady. Júıe qurylǵynyń ornalasqan jerin eskerip, qajetti baǵytty, oǵan deıingi qashyqtyq pen jolǵa ketetin ýaqytty kórsetedi.

Týrıserge arnalǵan daıyn serýen baǵyttary, kórikti oryndar toptamasy jáne qaladaǵy konsertter, spektáklder, kórmeler men festıválder týraly aqparat usynylǵan. Servıs qazaq, orys jáne aǵylshyn tilderinde qoljetimdi. Ony paıdalaný tegin ári tirkelýdi qajet etpeıdi.

Smart taqtalarda Almaty tarıhyna arnalǵan jeke bólim de bar. Qalam Media-men birlesip ázirlengen joba aıasynda qalanyń arhıvtik fotosýretteri sol oryndardyń qazirgi kórinisimen salystyrylǵan. Osy arqyly kelýshiler tanys kósheler men ǵımarattardyń ondaǵan jyl ishinde qalaı ózgergenin kóre alady.

Sondaı-aq smart taqtalardan 102, 103 jáne 112 shuǵyl qyzmetteriniń baılanys nómirleri, qujat joǵalǵan jaǵdaıda ne isteý kerektigi jáne medısınalyq kómek alý tártibi týraly aqparat tabýǵa bolady. Ekrandarda aýa raıy men aýa sapasy týraly málimetter de kórsetiledi. QR-kod arqyly baǵyttar men ózge de aqparatty smartfonǵa jiberý múmkindigi qarastyrylǵan.

Almaty qalasy Týrızm basqarmasynyń basshysy Ǵalıa Toqseıtovanyń aıtýynsha, týrıser sanynyń artýyna baılanysty sıfrlyq servısterdi damytý ózekti bola túsken.

«Biz úshin joǵary kórsetkishterdi saqtap qana qoımaı, shahar qonaqtaryna budan da qolaıly jaǵdaı jasaý mańyzdy. Týrıser sanynyń artýyna baılanysty zamanaýı týrısik ınfraqurylym men qoljetimdi sıfrlyq servısterdi damytý aıryqsha mánge ıe. Jerry jobasy týrıserge kórikti jerlermen óz betinshe tanysýǵa, serýen baǵyttaryn josparlaýǵa jáne Almatyny aralaý kezinde qajetti aqparatty sol jerde alýǵa múmkindik beretin qosymsha quralǵa aınalady», – dedi Ǵalıa Toqseıtova.

2025 jyldyń qorytyndysy boıynsha Almatyǵa 2,5 mıllıonǵa jýyq týrıs kelgen. Onyń ishinde 754 myńy – sheteldik qonaqtar. 2026 jyldyń alǵashqy jartyjyldyǵynda Ulttyq statısıka búrosynyń málimetinshe, qala qonaq úıleri 1,14 mıllıon adamǵa qyzmet kórsetken. Al osy salanyń kirisi 53,1 mıllıard teńgege jetken.

Aldyńǵy
V Astane podvelı ıtogı perekrestnogo Goda kúltýry Kazahstana ı Kıtaıa
Kelesi
V Almaty poıavılsá ýmnyı gorodskoı pomoshnık novogo formata

Sońǵy jańalyqtar:

İzdeý