Almatyda ashyq aryq jelisin saqtaý, qalpyna keltirý jáne keńeıtý jumystary júıeli túrde júrgizilip keledi, - dep habarlaıdy alnews.
Jyl saıyn qala aýmaǵynda qoldanystaǵy aryqtar jańartylyp, jańa jeliler salynady.
Bıyl bul jumystar qalanyń ortalyq, shyǵys jáne batys bólikterin qamtydy. Atap aıtqanda, ortalyq bólikte 76,6 shaqyrym, shyǵysta 30,7 shaqyrym, al batysta 37 shaqyrym aryq jelisin salý jáne qaıta jańǵyrtý jumystary júrgizildi.
Qalanyń 2040 jylǵa deıingi túzetilgen Bas josparynda ashyq aryqtardy saqtaýǵa erekshe mán berilgen. Qujatqa sáıkes, aryqtardy qubyrlarǵa aýystyrýǵa tyıym salynady. Ashyq aryq salýǵa tehnıkalyq múmkindik joq keıbir ýchaskelerde ǵana qubyr paıdalanýǵa ruqsat etiledi.
«Almatyda aryq jelisin qysqartý emes, kerisinshe keńeıtý kózdelip otyr. 2030 jylǵa deıin keminde 100 shaqyrym aryq qalpyna keltirilip, ál-Farabı jáne Abaı dańǵyldarynyń boıynda jańa magıstraldyq arnalar salynady. Al 2040 jylǵa qaraı ashyq sý burý jelisiniń uzyndyǵyn qazirgi 290 shaqyrymnan 483 shaqyrymǵa deıin jetkizý josparlanǵan. Sonymen qatar uzyndyǵy 357 shaqyrym bolatyn jabyq nóser kárizi salynady. Bul júıe qoldanystaǵy aryqtardy almastyrmaıdy, kerisinshe olardyń jumysyn tolyqtyrady. Jańa káriz jelileri nóser jaýyn kezinde oıpań aýmaqtar men kúrdeli jol qıylystarynda jınalatyn sýdy tıimdi burýǵa múmkindik beredi», – dep habarlady qala ákimdiginiń ókilderi.
Ákimdikte ashyq aryqtar men ózenderdiń qalanyń ekologıalyq jaǵdaıyn jaqsartýdaǵy mańyzyna da toqtaldy. Olar ásirese túngi ýaqytta aýany tabıǵı jolmen salqyndatyp, aǵashtar men jasyl jelekterdi ylǵalmen qamtamasyz etedi. Osyǵan baılanysty Almatynyń jańa Bas josparynda ashyq aryq jelilerin qalanyń sý jáne jasyl ınfraqurylymynyń ajyramas bóligi retinde saqtap, odan ári damytýǵa basymdyq berilgen.