الماتىدا مەملەكەت باسشىسىنىڭ «تازا قازاقستان» جالپىۇلتتىق ەكولوگيالىق باستاماسى اياسىندا ۇيىمداستىرىلعان «ۇزدىك جاسىل بالاباقشا» جانە «ۇزدىك جاسىل كوللەدج» قالالىق بايقاۋلارى جەڭىمپازدارىن ماراپاتتاۋ ءراسىمى ءوتتى، - دەپ حابارلايدى alnews.
بايقاۋدى الماتى قالاسىنىڭ ءبىلىم باسقارماسى ۇيىمداستىردى.
بايقاۋلار ءبىلىم بەرۋ ۇيىمدارىندا ەكولوگيالىق مادەنيەتتى دامىتۋعا، بالالار مەن جاستاردىڭ قورشاعان ورتاعا جاۋاپكەرشىلىكپەن قاراۋىن قالىپتاستىرۋعا، سونداي-اق كوگالداندىرۋ جانە ەكولوگيالىق تاربيە سالاسىنداعى پراكتيكالىق باستامالاردى قولداۋعا باعىتتالعان.
«ۇزدىك جاسىل بالاباقشا» بايقاۋىنا الماتى قالاسىنىڭ مەكتەپكە دەيىنگى ۇيىمدارى قاتىستى. اۋداندىق كەزەڭدە ءبىلىم بەرۋ ۇيىمدارى جوبالارىن تانىستىرىپ، ۇزدىك باستامالار قالالىق كەزەڭگە جولداما الدى.
بايقاۋ جۇمىستارىن باعالاۋ كەزىندە اۋماقتى كوگالداندىرۋ دەڭگەيى، تاربيەلەنۋشىلەردىڭ قاتىسۋىمەن ەكولوگيالىق جوبالاردى جۇزەگە اسىرۋ، سونداي-اق ۇسىنىلعان باستامالاردىڭ پراكتيكالىق ماڭىزى ەسكەرىلدى.
بايقاۋ قورىتىندىسى بويىنشا جۇلدەلى ورىندار بىلاي ءبولىندى:
ءى ورىن — الاتاۋ اۋدانىنداعى №31 بوبەكجاي-بالاباقشا؛
ءىى ورىن — اۋەزوۆ اۋدانىنداعى №186 بوبەكجاي-بالاباقشا؛
ءىىى ورىن — مەدەۋ اۋدانىنداعى №125 بوبەكجاي-بالاباقشا.
قالالىق مەكتەپكە دەيىنگى رەسۋرستىق ورتالىقتىڭ باسشىسى ناتاليا كاراسيەۆانىڭ ايتۋىنشا، «ۇزدىك جاسىل بالاباقشا» بايقاۋى الماتىدا العاش رەت وتكىزىلىپ، ەكولوگيالىق تاربيە سالاسىنداعى پراكتيكالىق تاجىريبە الماسۋ الاڭىنا اينالدى.
«باعالاۋ تالاپتارى كوپ بولدى. ولاردىڭ قاتارىندا بالاباقشالاردىڭ لاندشافتىق ديزاينى دا، بالالارمەن جۇرگىزىلەتىن ەكولوگيالىق تاربيە باعىتىنداعى جوبالىق جۇمىستار دا بار»، — دەدى ناتاليا كاراسيەۆا.
بايقاۋ جەڭىمپازدارىنىڭ ءبىرى №31 بوبەكجاي-بالاباقشا. مۇندا «جاسىل بالاباقشا» باعدارلاماسى جۇزەگە اسىرىلىپ كەلەدى. ەكولوگيالىق باستامالارعا تاربيەلەنۋشىلەرمەن قاتار ولاردىڭ اتا-انالارى دا بەلسەندى قاتىسادى.
باعدارلاما اياسىندا بالالار قالدىقتاردى بولەك جيناۋ قاعيدالارىمەن تانىسىپ، سۋ مەن ەلەكتر ەنەرگياسىن ۇنەمدى پايدالانۋدى، وسىمدىكتەردى كۇتىپ-باپتاۋدى جانە جىلىجايلاردا كوكونىس داقىلدارىن ءوسىرۋدى ۇيرەنەدى.
«بالالار العاشقى كۇننەن باستاپ ەكولوگيا جانە قورشاعان ورتانى قورعاۋ باعىتىنداعى جوبالارمەن جۇمىس ىستەيدى. ولار قوقىستى سۇرىپتاۋدى ۇيرەنەدى، ال قايتا پايدالانۋعا بولاتىن زاتتاردى ارنايى شەبەرحانالاردا قولدانامىز»، — دەدى №31 بوبەكجاي-بالاباقشانىڭ مەڭگەرۋشىسى اينۇر باحتييەۆا.
ەكولوگيالىق تاربيەنىڭ پراكتيكالىق بولىگى باقشا مەن جىلىجايلاردى سۋارۋ ءۇشىن تامشىلاتىپ سۋارۋ جۇيەسىن پايدالانۋدى قامتيدى. ورگانيكالىق قالدىقتار ورگانيكالىق تىڭايتقىشقا اينالدىرىلادى. سونىمەن قاتار بالاباقشا اۋماعىندا جارىقتاندىرۋعا پايدالانىلاتىن كۇن پانەلدەرى ورناتىلعان.
الماتىدا العاش رەت تەحنيكالىق جانە كاسىپتىك ءبىلىم بەرۋ ۇيىمدارىنىڭ باسىن قوسقان «ۇزدىك جاسىل كوللەدج» قالالىق بايقاۋى دا وتكىزىلدى.
بايقاۋ قورىتىندىسى بويىنشا:
ءى ورىن — الماتى قازاق گۋمانيتارلىق-پەداگوگيكالىق كوللەدجى №1؛
ءىى ورىن — الماتى قۇرىلىس-تەحنيكالىق كوللەدجى؛
ءىىى ورىن — الماتى تەلەكوممۋنيكاسيا جانە ماشينا جاساۋ كوللەدجى.
الماتى قازاق گۋمانيتارلىق-پەداگوگيكالىق كوللەدجى №1-دە بايقاۋ اياسىندا «ەكو-كامپۋس»، «جاسىل كەڭىستىك» جانە «ەكولوگيالىق مادەنيەت» جوبالارى جۇزەگە اسىرىلدى. ستۋدەنتتەر مەن وقىتۋشىلار اۋماقتى كوگالداندىرۋعا، اعاش ەگۋگە جانە «ۇستازدار اللەياسىن» قۇرۋعا اتسالىستى. ەكولوگيالىق باستاماعا كوللەدج تۇلەكتەرى دە قوسىلدى.
ەكى قالالىق بايقاۋدىڭ جەڭىمپازدارى مەن جۇلدەگەرلەرى الماتى قالاسى ءبىلىم باسقارماسىنىڭ ديپلومدارىمەن ماراپاتتالدى.
