الماتىنىڭ تۇركسىب اۋدانىندا بۇرىن بوس جاتقان ەكى اۋماق كوركەيتىلىپ، سەرۋەندەۋگە ارنالعان جولى، جارىقتاندىرۋ جۇيەسى مەن جاسىل جەلەگى بار جاڭا دەمالىس ورىندارى اشىلدى، - دەپ حابارلايدى alnews.
بۇل جوبالار «حالىق قاتىساتىن بيۋدجەت» باعدارلاماسى اياسىندا جاس قانات جانە جۇلدىز-1 شاعىناۋداندارىندا جۇزەگە اسىرىلدى. بۇل تۋرالى اۋدان اكىمدىگىنىڭ وكىلدەرى حابارلادى.
جوبالاردىڭ باستى ەرەكشەلىگى – بۇعان دەيىن تۇرعىنداردىڭ دەمالۋىنا ارنالماعان اۋماقتاردىڭ تولىققاندى قوعامدىق كەڭىستىككە اينالۋى. بۇرىن بوس جاتقان جەرلەردە جۇرگىنشىلەر جولى توسەلىپ، جارىقتاندىرۋ جۇيەسى ورناتىلدى، كوگالداندىرىلعان اۋماقتار مەن بەلسەندى دەمالىس ورىندارى جاسالدى.
اۋقىمدى جۇمىستار جاس قانات شاعىناۋدانىندا جۇرگىزىلدى. مۇندا 20 مىڭ شارشى مەتردەن استام اۋماق كوگالداندىرىلىپ، 6 مىڭ شارشى مەترگە جۋىق جەرگە تروتۋار پليتكاسى توسەلدى. سونىمەن قاتار اسفالت جولدار مەن رەزەڭكە جابىندىسى بار الاڭدار جاسالدى.
تۇرعىندار ءۇشىن 53 جارىق باعانى، ساندىك جارىق قۇرىلىمى، ورىندىقتار، قوقىس جاشىكتەرى مەن شاعىن ساۋلەت نىساندارى ورناتىلدى. بۇدان بولەك، سكەيت-الاڭ، پەرگولاسى بار دەمالىس ورنى جانە اۆتوماتتى سۋارۋ جۇيەسى جابدىقتالدى.
جۇلدىز-1 شاعىناۋدانىندا بۇرىن بوس جاتقان جەرگە 950 شارشى مەتر تروتۋار پليتكاسى، 550 شارشى مەتر اسفالت جانە 298 شارشى مەتر تارتان جابىندىسى توسەلدى. جاڭا كوگالدىڭ اۋماعى 2 530 شارشى مەتر. جاسىل جەلەكتى كۇتىپ-باپتاۋ ءۇشىن اۆتوماتتى سۋارۋ جۇيەسى قاراستىرىلعان.
سونداي-اق اۋماقتا جارىقتاندىرۋ جۇيەسى ورناتىلىپ، پەرگولا، ورىندىقتار، قوقىس جاشىكتەرى مەن شاعىن ساۋلەت نىساندارى قويىلدى.
جالپى، تۇركسىب اۋدانىندا «حالىق قاتىساتىن بيۋدجەت» باعدارلاماسى اياسىندا اۋلا، سكۆەر مەن باسقا دا قوعامدىق اۋماقتى كوركەيتۋگە باعىتتالعان 24 جوبا ماقۇلدانعان.