الماتىدا پيلوتتىق جوبا اياسىندا كولىك قوزعالىسى كەزىندە اۆتوموبيلدەردەن بولىنەتىن زياندى زاتتاردىڭ مولشەرىن قاشىقتان ولشەيتىن تەحنولوگيا سىناقتان وتكىزىلە باستادى، - دەپ حابارلايدى alnews.
OPUS RSE جۇيەسى كولىكتى توقتاتپاي-اق پايدالانىلعان گاز قۇرامىنداعى لاستاۋشى زاتتاردىڭ ناقتى دەڭگەيىن انىقتايدى. بۇل تۋرالى الماتى قالاسى ەكولوگيا جانە قورشاعان ورتا باسقارماسىنىڭ وكىلدەرى ايتتى.
بۇعان دەيىن «Eco Almaty» ج ش س ماماندارى يسپانيالىق OPUS كومپانياسىمەن اۆتوكولىكتەرگە قاشىقتان ەكولوگيالىق مونيتورينگ جۇرگىزۋ تەحنولوگياسىن ەنگىزۋ ماسەلەسىن تالقىلاعان.
سىناق جۇرگىزۋ ءۇشىن كومپانيا قالانىڭ ءارتۇرلى اۋداندارىنداعى جولعا ورناتىلاتىن RSD6000 جىلجىمالى جابدىعىن ۇسىندى.
ولشەۋ جۇمىستارى ەكى اپتا ىشىندە 12 كۇن بويى جۇرگىزىلەدى. جۇيەنىڭ كولىك قوزعالىسى ءارتۇرلى قارقىنمەن جۇرەتىن جاعدايدا قالاي جۇمىس ىستەيتىنىن تەكسەرۋ ءۇشىن جابدىقتىڭ ورنالاسقان جەرى كۇن سايىن وزگەرتىلەدى. OPUS كومپانياسىنىڭ وكىلى تەحنيكالىق قولداۋ كورسەتىپ، جابدىقتى كاليبرلەۋدى جانە الىنعان دەرەكتەردىڭ دۇرىستىعىن تەكسەرۋدى قامتاماسىز ەتەدى.
سىناق قورىتىندىسى بويىنشا ماماندار اۆتوكولىكتەردەن بولىنەتىن زياندى زاتتاردىڭ دەڭگەيىن تالداپ، كورسەتكىشتەردى حالىقارالىق دەرەكتەرمەن سالىستىرادى. سونداي-اق قورشاعان ورتانى شامادان تىس لاستايتىن كولىك قۇرالدارىن انىقتاۋ كريتەرييلەرىن ۇسىنادى.
بۇعان قوسا، تۇراقتى مونيتورينگ جۇرگىزۋگە ارنالعان جابدىقتاردى ورناتۋعا ورىندار بەلگىلەنەدى.
پيلوتتىق جوبانىڭ ناتيجەسى تەحنولوگيانىڭ تيىمدىلىگىن باعالاۋعا جانە الماتىداعى اۆتوكولىكتەردىڭ ەكولوگيالىق تالاپتارعا سايكەستىگىن باقىلاۋ ءۇشىن الداعى ۋاقىتتا قولدانۋ مۇمكىندىگىن انىقتاۋعا كومەكتەسەدى. بۇل رەتتە، پيلوتتىق جوبا تەك زەرتتەۋ ماقساتىندا جۇرگىزىلىپ جاتىر.