الماتىدا اشىق ارىق جەلىسىن ساقتاۋ، قالپىنا كەلتىرۋ جانە كەڭەيتۋ جۇمىستارى جۇيەلى تۇردە جۇرگىزىلىپ كەلەدى، - دەپ حابارلايدى alnews.
جىل سايىن قالا اۋماعىندا قولدانىستاعى ارىقتار جاڭارتىلىپ، جاڭا جەلىلەر سالىنادى.
بيىل بۇل جۇمىستار قالانىڭ ورتالىق، شىعىس جانە باتىس بولىكتەرىن قامتىدى. اتاپ ايتقاندا، ورتالىق بولىكتە 76،6 شاقىرىم، شىعىستا 30،7 شاقىرىم، ال باتىستا 37 شاقىرىم ارىق جەلىسىن سالۋ جانە قايتا جاڭعىرتۋ جۇمىستارى جۇرگىزىلدى.
قالانىڭ 2040 جىلعا دەيىنگى تۇزەتىلگەن باس جوسپارىندا اشىق ارىقتاردى ساقتاۋعا ەرەكشە ءمان بەرىلگەن. قۇجاتقا سايكەس، ارىقتاردى قۇبىرلارعا اۋىستىرۋعا تىيىم سالىنادى. اشىق ارىق سالۋعا تەحنيكالىق مۇمكىندىك جوق كەيبىر ۋچاسكەلەردە عانا قۇبىر پايدالانۋعا رۇقسات ەتىلەدى.
«الماتىدا ارىق جەلىسىن قىسقارتۋ ەمەس، كەرىسىنشە كەڭەيتۋ كوزدەلىپ وتىر. 2030 جىلعا دەيىن كەمىندە 100 شاقىرىم ارىق قالپىنا كەلتىرىلىپ، ءال-فارابي جانە اباي داڭعىلدارىنىڭ بويىندا جاڭا ماگيسترالدىق ارنالار سالىنادى. ال 2040 جىلعا قاراي اشىق سۋ بۇرۋ جەلىسىنىڭ ۇزىندىعىن قازىرگى 290 شاقىرىمنان 483 شاقىرىمعا دەيىن جەتكىزۋ جوسپارلانعان. سونىمەن قاتار ۇزىندىعى 357 شاقىرىم بولاتىن جابىق نوسەر كارىزى سالىنادى. بۇل جۇيە قولدانىستاعى ارىقتاردى الماستىرمايدى، كەرىسىنشە ولاردىڭ جۇمىسىن تولىقتىرادى. جاڭا كارىز جەلىلەرى نوسەر جاۋىن كەزىندە ويپاڭ اۋماقتار مەن كۇردەلى جول قيىلىستارىندا جينالاتىن سۋدى ءتيىمدى بۇرۋعا مۇمكىندىك بەرەدى»، – دەپ حابارلادى قالا اكىمدىگىنىڭ وكىلدەرى.
اكىمدىكتە اشىق ارىقتار مەن وزەندەردىڭ قالانىڭ ەكولوگيالىق جاعدايىن جاقسارتۋداعى ماڭىزىنا دا توقتالدى. ولار اسىرەسە تۇنگى ۋاقىتتا اۋانى تابيعي جولمەن سالقىنداتىپ، اعاشتار مەن جاسىل جەلەكتەردى ىلعالمەن قامتاماسىز ەتەدى. وسىعان بايلانىستى الماتىنىڭ جاڭا باس جوسپارىندا اشىق ارىق جەلىلەرىن قالانىڭ سۋ جانە جاسىل ينفراقۇرىلىمىنىڭ اجىراماس بولىگى رەتىندە ساقتاپ، ودان ءارى دامىتۋعا باسىمدىق بەرىلگەن.