داريعا بادىقوۆا بۇرىن-سوڭدى بولماعان وبرازدا: «سوڭىرادان» نە كۇتەمىز؟

داريعا بادىقوۆانى كومەديالىق رولدەرىنەن عانا تانىپ جۇرگەن كورەرمەن بۇل جولى اكتريسانى مۇلدە باسقا قىرىنان كورە الادى. «تاپتىم-اۋ سەنى» فيلمىندەگى ەر مىنەزدى قىز بەن «كەلىنجان» تەلەحيكاياسىنداعى ايسارانىڭ بەينەسىنە ۇيرەنگەن جۇرت ءۇشىن «سوڭىرا» توسىنسىي بولعالى تۇر. بىردەن ەسكەرتە كەتەيىك: فيلمنەن كەيىن كوزىڭىزگە جاس الۋىڭىز ابدەن مۇمكىن.

وتاندىق كينودا توتەنشە جاعدايلار قىزمەتكەرلەرىنىڭ، سونىڭ ىشىندە ءورت سوندىرۋشىلەردىڭ ءومىرى مەن كاسىبىنە ارنالعان تۋىندىلار كوپ كەزدەسە بەرمەيدى. ال داريعا بادىقوۆا بۇل جولى كورەرمەن نازارىن كۇن سايىن ءومىرىن قاتەرگە تىگىپ، وزگەنى قۇتقارۋعا اسىعاتىن جانداردىڭ تاعدىرىنا اۋدارعان. فيلم كوپشىلىك بىلە بەرمەيتىن وسى ماماندىقتىڭ تاساسىندا قانداي ءومىر جاتقانىن كورسەتەدى.

ءبىز ءورت سوندىرۋشىلەردىڭ ەرلىگى تۋرالى ءجيى ەستيمىز. ءبىراق ولاردىڭ قىزمەتتەن تىس تىرشىلىگى، وتباسىنداعى ماسەلەلەرى مەن جان دۇنيەسىندەگى سەزىمدەرىنە ۇڭىلە بەرمەيمىز. «سوڭىرا» ءفيلمىنىڭ باستى ەرەكشەلىگى – كەيىپكەرلەردى تەك باتىر رەتىندە ەمەس، ءوز ۋايىمى، ارمانى، جاقىندارى مەن شەشىلمەگەن ماسەلەلەرى بار قاراپايىم ادامدار رەتىندە كورسەتۋىندە. ءبىر قىزىعى، وزگەلەردىڭ ءومىرىن اراشالاپ جۇرگەن جانداردىڭ وزدەرى دە كەيدە كومەك پەن قولداۋعا مۇقتاج. سوعان قاراماستان، ولار كۇن سايىن قاۋىپكە باس تىگىپ، بىرەۋدىڭ ءومىرىن ساقتاپ قالۋ ءۇشىن وتقا كىرەدى. وزگەنىڭ بالاسىن قۇتقارۋعا ۇمتىلعان ادامنىڭ ءوز بالاسىنا امان ورالاتىنىنا ەشكىم كەپىلدىك بەرە المايدى. فيلم وسى شىندىقتى كورەرمەنگە اسەرلى جەتكىزەدى.

تۋىندىدا تەك ءورت سوندىرۋشىلەردىڭ تاعدىرى عانا ەمەس، باسشىلىق قىزمەتتەگى ادامداردىڭ جاۋاپكەرشىلىگى دە ءسوز بولادى. بىلىكسىزدىك، مانساپقورلىق پەن اتاققا دەگەن قۇمارلىقتىڭ سوڭى قانداي جاعدايعا اكەلۋى مۇمكىن؟ ادام ومىرىنە تىكەلەي جاۋاپ بەرەتىن قىزمەتكە كاسىبي دايىندىعى جەتكىلىكسىز ادام تاعايىندالسا، ونىڭ زاردابىن كىم تارتادى؟ فيلم وسى ساۋالداردى كورەرمەننىڭ ويىنا سالادى. ويتكەنى كەز كەلگەن سالادا باسشىنىڭ بىلىمىمەن قاتار ادامگەرشىلىگى مەن پاراساتى دا ماڭىزدى. كەيبىر قىزمەتتەگى قاتەلىكتىڭ قۇنى اقشامەن ولشەنسە، ەندى بىرىندە ادام ومىرىمەن ولشەنەدى.

بۇل جولى داريعا بادىقوۆا ءورت ءسوندىرۋ ءبولىمىنىڭ كاپيتانىن سومدايدى. ونىڭ كەيىپكەرى – قاراماعىنداعى قىزمەتكەرلەرىن تۇسىنە بىلەتىن، ماسەلەنى ايقايمەن ەمەس، اقىلمەن شەشەتىن، قاجەت كەزىندە وزگەنىڭ قاتەلىگى ءۇشىن دە جاۋاپكەرشىلىك الۋدان قاشپايتىن سالماقتى ايەل. اكتريسا بۇل ءرولى ارقىلى كورەرمەنگە ءوزى بۇرىننان تانىس كومەديالىق وبرازداردان وزگەشە قىرىن تانىتادى. كەيىپكەردىڭ بولمىسى مەن فيلمدەگى جاعىمسىز وبرازدىڭ قاراما-قايشىلىعى ارقىلى ناعىز باسشى مەن مانساپ قۋعان ادامنىڭ ايىرماشىلىعى ايقىن كورىنەدى.

دارحان سۇلەيمەنوۆتىڭ اكتەرلىك شەبەرلىگىن دە ەرەكشە اتاپ وتكەن ءجون. ول سومداعان جاعىمسىز كەيىپكەر كورەرمەننىڭ اشۋىن تۋدىرىپ، ءار ارەكەتىمەن ىزالاندىرادى. كەيىپكەردى كورەرمەنگە سونشالىقتى نانىمدى ءارى جەككورىنىشتى ەتىپ كورسەتە ءبىلۋ – اكتەردىڭ شەبەرلىگىنىڭ بەلگىسى. جالپى، ءفيلمنىڭ العاشقى مينۋتتارىنان-اق وقيعاعا ەنىپ كەتەسىز. سيۋجەت قارقىندى ءوربىپ، كورەرمەندى جالىقتىرمايدى.

داريعا بادىقوۆانىڭ شىعارماشىلىعىنداعى تاعى ءبىر جاقسى ءۇردىس – جاس اكتەرلەرگە مۇمكىندىك بەرىپ، جاڭا ەسىمدەردى تانىتۋى. «سوڭىرا» فيلمىندە دە بۇل ءداستۇر جالعاسىن تاپقان. سولاردىڭ ءبىرى – جاس اكتريسا تاماباي نارقىز. ول وزىنە بەرىلگەن ءرولدى ءساتتى الىپ شىققان. اسىرەسە قازبەك تولەنمەن بىرگە سومداعان ماحاببات جەلىسى ەرەكشە اسەر قالدىرادى. ەكى جاستىڭ اراسىنداعى نازىك سەزىم مەن شىنايى قارىم-قاتىناستى اكتەرلەر تابيعي جەتكىزە بىلگەن.

«جاقىنىڭنىڭ ءومىرىن جارىق قىلامىن دەپ، ءوزىڭنىڭ جارىعىڭدى ءسوندىرىپ الما». فيلم افيشاسىنداعى وسى ءبىر سويلەم تۋىندىنىڭ نەگىزگى ويىن تولىق اڭعارتادى. كەيدە جاقىندارىمىزعا كوڭىل ءبولۋدى، جاقسى كورەتىنىمىزدى ايتۋدى، بىرگە ۋاقىت وتكىزۋدى كەيىنگە قالدىرىپ جاتامىز. ءوز باقىتىمىزدى دا ەرتەڭگە ىسىرا بەرەمىز. «سوڭىرا ايتامىن»، «سوڭىرا كەزدەسەمىز»، «سوڭىرا باقىتتى بولامىز» دەگەن سوزدەردى ءجيى قولدانامىز. ءبىراق سول «سوڭىرانىڭ» كەلەتىنىنە كىم كەپىل؟

«سوڭىرا» – ءورت سوندىرۋشىلەر تۋرالى عانا ەمەس، ادامگەرشىلىك، پارىز، جاۋاپكەرشىلىك جانە ءومىردىڭ ءقادىرى جايلى فيلم. بۇل – وزگەنىڭ ءومىرىن ساقتاپ قالۋدى مىندەتىنە اينالدىرعانىمەن، كەيدە ءوز جاقىندارىنا ۋاقىت بولۋگە ۇلگەرمەيتىن جانداردىڭ تاعدىرى تۋرالى تۋىندى.

ەگەر داريعا بادىقوۆانىڭ كومەديالىق رولدەرىنەن شارشاپ، كينوتەاتردان تەرەڭ وي مەن شىنايى ەموسيا ىزدەسەڭىز، «سوڭىرانى» كورۋگە كەڭەس بەرەمىز. فيلم 19 قاراشادان باستاپ كينوتەاترلاردا كورسەتىلەدى.

الدىڭعى
ۆ الماتى راسسموترەلي 11 ينۆەستيسيوننىح پروەكتوۆ نا 142 ملرد تەنگە

سوڭعى جاڭالىقتار:

ىزدەۋ