الماتىدا 4 قازاندا قازاقستان-بريتان تەحنيكالىق ۋنيۆەرسيتەتىنىڭ الاڭىندا Recycle بىرگە ەكولوگيالىق اكسياسى ءوتتى، - دەپ حابارلايدى alnews.
قالا تۇرعىندارى قايتالاما شيكىزاتتى سۇرىپتاۋعا وتكىزىپ، ءوزارا زات الماسىپ، ەكولوگيالىق باستامالارمەن تانىسا الدى. بۇل تۋرالى «Eco Almaty» ج ش س وكىلدەرى حابارلادى.
اكسيانىڭ نەگىزگى باعىتتارىنىڭ ءبىرى – زاتتاردى قايتا پايدالانۋ بولدى. قاتىسۋشىلار وزدەرىنە قاجەت بولماي قالعان كيىم-كەشەك پەن باسقا دا زاتتاردى وزگەلەرگە بەرىپ، ولاردىڭ پايدالانۋ مەرزىمىن ۇزارتۋعا جانە قالدىق كولەمىن ازايتۋعا مۇمكىندىك الدى.
سونداي-اق الاڭدا كەيىننەن سۇرىپتاۋ ءۇشىن قايتالاما شيكىزات قابىلداۋ ۇيىمداستىرىلدى. قاتىسۋشىلارعا قالدىقتاردى بولەك جيناۋ جانە ولاردى ءتيىمدى باسقارۋ قاعيداتتارى ءتۇسىندىرىلدى.
Recycle بىرگە جوباسى الماتىدا 2019 جىلدان بەرى جۇزەگە اسىرىلىپ كەلەدى. وسى ۋاقىت ىشىندە قالادا قالدىقتاردى بولەك جيناۋعا، زاتتاردى قايتا پايدالانۋعا جانە جاۋاپتى تۇتىنۋعا باعىتتالعان ەكولوگيالىق اكسيالار وتكىزىلدى.
ءىس-شارا «تازا قازاقستان» رەسپۋبليكالىق ەكولوگيالىق اكسياسى اياسىندا المالى اۋدانى اكىمدىگى مەن قازاقستان-بريتان تەحنيكالىق ۋنيۆەرسيتەتىنىڭ قولداۋىمەن ۇيىمداستىرىلدى. بيىل اكسيا المالى اۋدانىنىڭ 90 جىلدىعىنا دا ورايلاستىرىلدى.
قازان ايىنداعى كەزدەسۋ اشىق قالالىق الاڭداردا وتكەن Recycle بىرگە ءىس-شارالارى ماۋسىمىن قورىتىندىلادى. كۇزگى-قىسقى كەزەڭنىڭ باستالۋىنا بايلانىستى جوبانىڭ ەكولوگيالىق جۇمىسى الداعى ۋاقىتتا باسقا فورماتتاردا جالعاسادى.
