سپورتتىق گيمناستيكادان ءۇش دۇركىن وليمپيادا چەمپيونى لي نين الماتىداعى №9 وليمپيادا رەزەرۆىنىڭ مامانداندىرىلعان بالالار-جاسوسپىرىمدەر مەكتەبىنە باردى. بۇل تۋرالى الماتى قالاسى سپورت باسقارماسىنىڭ وكىلدەرى حابارلادى.
كەزدەسۋ مەكتەپتىڭ جاتتىعۋ زالىندا ءوتتى. جاس سپورتشىلار ارنايى كورسەتىلىم ۇيىمداستىرىپ، سپورتتىق گيمناستيكانىڭ ءتۇرلى ەلەمەنتتەرىن ورىندادى. لي نين تاربيەلەنۋشىلەردىڭ دايىندىعىمەن تانىسىپ، ولاردىڭ جاتتىعۋ بارىسىن تاماشالادى.
وليمپيادا چەمپيونى جاس سپورتشىلارعا قول جەتكىزگەن جەتىستىكتەرىمەن شەكتەلمەي، جاتتىعۋدى جالعاستىرىپ، العا قويعان سپورتتىق ماقساتتارىنا تاباندىلىقپەن ۇمتىلۋعا تىلەكتەستىك ءبىلدىردى. كورسەتىلىمنەن كەيىن بالالار ايگىلى گيمناستتان قولتاڭبا الدى.
ساپار بارىسىندا لي نين بۇقارالىق اقپارات قۇرالدارىنىڭ وكىلدەرىمەن دە تىلدەسىپ، سپورت پەن ءوزىنىڭ كاسىبي مانسابىنا قاتىستى سۇراقتارعا جاۋاپ بەردى.
لي نين – قىتايدىڭ ەڭ تانىمال گيمناستارىنىڭ ءبىرى. ول 1984 جىلى لوس-اندجەلەستە وتكەن وليمپيادا ويىندارىندا بىردەن التى مەدال جەڭىپ الدى. ونىڭ ۇشەۋى – التىن. وسى ناتيجەسىمەن لي نين سول وليمپياداداعى ەڭ تابىستى گيمناستاردىڭ بىرىنە اينالدى.
الماتىلىق جاس سپورتشىلار ءۇشىن بۇل كەزدەسۋ وليمپيادا چەمپيونىمەن جۇزدەسىپ، الەمدىك گيمناستيكا تاريحىندا وزىندىك ءىز قالدىرعان سپورتشىمەن تىكەلەي تىلدەسۋگە مۇمكىندىك بەردى.
