الماتىنىڭ تۇركسىب اۋدانىنداعى «جاس قانات» شاعىناۋدانىندا جاڭا قالالىق كىتاپحانا جۇمىسىن باستادى. بۇل تۋرالى الماتى قالاسى مادەنيەت باسقارماسىنىڭ باسپا ءسوز قىزمەتى حابارلادى.
جاڭا كىتاپحانا مەملەكەت باسشىسى قاسىم-جومارت توقايەۆتىڭ قوعامدا كىتاپ وقۋ مادەنيەتىن دامىتۋعا جانە زياتكەرلىك الەۋەتتى ارتتىرۋعا باعىتتالعان «وقيتىن ۇلت» باستاماسى اياسىندا اشىلدى.
جاڭا قالالىق كىتاپحانا – تۇرعىنداردىڭ كىتاپ وقۋىنا، ءبىلىم الۋىنا جانە بوس ۋاقىتىن مازمۇندى وتكىزۋىنە ارنالعان زاماناۋي مادەني-اعارتۋشىلىق كەڭىستىك. كىتاپحانانىڭ جالپى اۋدانى 340 شارشى مەتر، ال كىتاپ قورى 10 مىڭنان استام باسىلىمدى قامتيدى.
مۇندا وقىرمانداردىڭ جاس ەرەكشەلىكتەرى مەن قىزىعۋشىلىقتارى ەسكەرىلىپ، قازاق، ورىس جانە شەت تىلدەرىندەگى كوركەم ادەبيەت، بالالار ادەبيەتى، تانىمدىق جانە عىلىمي-كوپشىلىك باسىلىمدار، سونداي-اق ءتۇرلى جانرداعى زاماناۋي كىتاپتار ۇسىنىلعان.
كەلۋشىلەر ءۇشىن جايلى وقۋ زالى، كىتاپتاردى ۇيگە الىپ وقۋعا مۇمكىندىك بەرەتىن ابونەمەنت ءبولىمى، بالالارعا ارنالعان ايماقتار، كومپيۋتەرلەرمەن جابدىقتالعان جۇمىس ورنى، ارنايى قۇرىلعىلار جانە كىتاپتاردى ءوز بەتىنشە الىپ، قايتارۋعا ارنالعان «اقىلدى سورەلەر» قاراستىرىلعان. زاماناۋي تەحنولوگيا كىتاپ الۋ جانە قايتارۋ ۇدەرىسىن وقىرماندار ءۇشىن بارىنشا ىڭعايلى ءارى جىلدام ەتەدى.
جاڭا مادەني كەڭىستىك اۋدان تۇرعىندارىنىڭ كىتاپ وقۋعا دەگەن قىزىعۋشىلىعىن ارتتىرۋعا، سونداي-اق ولاردىڭ مادەني جانە زياتكەرلىك دامۋىنا قولايلى جاعداي جاساۋعا باعىتتالعان.
مەكەنجايى: تۇركسىب اۋدانى، قونايەۆ اتىنداعى باۋ-باقشا كووپەراتيۆىنىڭ اۋماعى، 336/37.
جۇمىس ۋاقىتى: كۇن سايىن ساعات 09:00-دەن 20:00-گە دەيىن.
قازىرگى تاڭدا الماتىدا 32 قالالىق كىتاپحانا جۇمىس ىستەيدى. ونىڭ جەتەۋى تاۋلىك بويى، ياعني 24/7 رەجيمىندە قىزمەت كورسەتەدى.
سونىمەن قاتار تۇرعىنداردىڭ كىتاپقا قولجەتىمدىلىگىن ارتتىرۋ ماقساتىندا قالانىڭ ساۋدا ورتالىقتارىندا كىتاپ بەرەتىن ەكى پۋنكت، ال كەلۋشىلەر كوپ جينالاتىن ورىنداردا وزىنە-وزى قىزمەت كورسەتۋگە ارنالعان 32 اۆتونومدى كىتاپحانا جۇمىس ىستەيدى.
جاڭا كىتاپحانانىڭ اشىلۋى تۇركسىب اۋدانى تۇرعىندارى ءۇشىن ءبىلىم مەن مادەنيەتتى دامىتۋعا ارنالعان زاماناۋي كەڭىستىك قالىپتاستىرىپ، كىتاپحانا قىزمەتتەرىنىڭ قولجەتىمدىلىگىن ارتتىرۋعا مۇمكىندىك بەرەدى.
