الماتىدا قالا اكىمى دارحان ساتىبالدىنىڭ تاپسىرماسىنا سايكەس زاڭسىز قۇرىلىس نىساندارىنا باقىلاۋ كۇشەيتىلدى. اسىرەسە، نىسانالى ماقساتى جەكە تۇرعىن ءۇي سالۋعا ارنالماعان، ونىڭ ىشىندە باعباندىق نەمەسە جەكە قوسالقى شارۋاشىلىق جۇرگىزۋگە بەرىلگەن جەر تەلىمدەرىندەگى قۇرىلىسقا ەرەكشە نازار اۋدارىلۋدا.
قۇرىلىس جۇمىستارى باستالعان ساتتەن باستاپ نىسان پايدالانۋعا بەرىلگەنگە دەيىنگى بارلىق كەزەڭ باقىلاۋدا بولادى.
قالا قۇرىلىسىن باقىلاۋ باسقارماسىنىڭ مالىمەتىنشە، جىل باسىنان بەرى الماتىدا زاڭسىز سالىنعان 52 نىسان تولىق نەمەسە ءىشىنارا بۇزىلعان.
باسقارما وكىلدەرىنىڭ ايتۋىنشا، 2026 جىلى 1 شىلدەدەن باستاپ قازاقستان رەسپۋبليكاسىنىڭ جاڭا قۇرىلىس كودەكسىنىڭ كۇشىنە ەنۋىنە بايلانىستى مەملەكەتتىك ساۋلەت-قۇرىلىس باقىلاۋى مەن قاداعالاۋ تەتىكتەرى دە وزگەردى.
بۇعان دەيىن جەكە تۇرعىن ءۇي قۇرىلىسىنا جەڭىلدەتىلگەن ءتارتىپ قولدانىلىپ، مۇنداي نىساندار باسقا قۇرىلىس نىساندارى سەكىلدى تولىق باقىلاۋمەن قامتىلمايتىن. جاڭا زاڭناما بۇل تالاپتاردى وزگەرتتى. ەندى رۇقسات بەرۋ راسىمدەرىنە، قۇرىلىس الدىنداعى جانە جوبالىق دايىندىققا قويىلاتىن تالاپتار جاڭارتىلدى.
بۇل ماسەلە الماتى ءۇشىن وتە وزەكتى. قالادا نىسانالى ماقساتى جەكە تۇرعىن ءۇي قۇرىلىسىن قاراستىرمايتىن جەر تەلىمدەرىندە تۇرعىن ءۇي سالۋ فاكتىلەرى كەزدەسەدى.
«جەر تەلىمىنىڭ بولۋى وندا كەز كەلگەن ماقساتتاعى نەمەسە كەز كەلگەن پارامەتردەگى نىساندى سالۋعا اۆتوماتتى تۇردە قۇقىق بەرمەيدى. قۇرىلىس جەر تەلىمىنىڭ نىسانالى ماقساتىنا، قالا قۇرىلىسى رەگلامەنتتەرىنە جانە قولدانىستاعى زاڭناما تالاپتارىنا سايكەس بولۋعا ءتيىس»، – دەدى قالا قۇرىلىسىن باقىلاۋ باسقارماسىنىڭ وكىلدەرى.
