ءمۇعالىم كۇنى الماتىدا قالا پەداگوگتەرىن ماراپاتتاۋعا ارنالعان سالتاناتتى ءراسىم ءوتتى، - دەپ حابارلايدى alnews.
الماتى اكىمى دارحان ساتىبالدى ۇستازدار قاۋىمىن كاسىبي مەرەكەسىمەن قۇتتىقتاپ، مەملەكەتتىك ناگرادالاردى تابىستادى.
«سىزدەردى كاسىبي مەرەكەلەرىڭىز – ءمۇعالىم كۇنىمەن شىن جۇرەكتەن قۇتتىقتايمىن! مەملەكەت باسشىسى قاسىم-جومارت كەمەل ۇلى توقايەۆ ءوزىنىڭ «ادىلەتتى قوعامعا – شىنشىل ءسوز» اتتى ەڭبەگىندە: «ۇستازدار قاۋىمى ۇلتتىڭ جاڭا ساپاسىن قالىپتاستىرادى. ءمۇعالىم بولىپ، ۇرپاق تاربيەلەۋ – قاسيەتتى ميسسيا» – دەپ پەداگوگتەردىڭ قوعامداعى ءرولى مەن قىزمەتىنە ايرىقشا باعا بەرگەن بولاتىن. سيفرلىق داۋىرگە قادام باسقان تۇستا مۇعالىمدەرىمىزگە قويىلاتىن تالاپ تا جوعارى. جاساندى ينتەللەكت دامىپ، تەحنولوگيا ۇدايى جاڭارىپ، كاسىپ تۇرلەرى ءجيى وزگەرىسكە تۇسۋدە. ءبىراق بالا بويىنا ءبىلىم مەن جىگەردى، پاراسات پەن ىزگىلىكتى دارىتاتىن ۇستاز تۇلعاسى قاشاندا ءوز بيىگىندە قالا بەرمەك»، – دەدى الماتى اكىمى.
ول بۇگىندە قالانىڭ ءبىلىم بەرۋ جۇيەسىندە 42 مىڭنان استام پەداگوگ ەڭبەك ەتەتىنىن جەتكىزدى. الماتىلىق ۇستازدار قالانىڭ كورنەكتى پەداگوگتەرى سالعان سارا جولدى جالعاستىرىپ كەلەدى. اياگۇل تورە قىزى ميرازوۆا «قازاقستاننىڭ ەڭبەك ەرى» جوعارى اتاعىنا يە بولعان العاشقى پەداگوگ اتاندى. 2024 جىلى بۇل جوعارى اتاق №4 مەكتەپ-ينتەرناتتىڭ ماتەماتيكا ءپانى ءمۇعالىمى گۇلجانار مولداكەرىم قىزى نۇرپەيىسوۆاعا بەرىلدى. قازىرگى تاڭدا الماتىنىڭ 16 پەداگوگى «قازاقستاننىڭ ەڭبەك سىڭىرگەن ۇستازى» قۇرمەتتى اتاعىن يەلەندى.
«بۇل الماتىدا قالىپتاسقان مىقتى پەداگوگيكالىق مەكتەپتىڭ، ۇستازدىق ءداستۇر مەن كاسىبي ساباقتاستىقتىڭ ناقتى ناتيجەسى»، – دەدى دارحان ساتىبالدى.
مەملەكەت الدىنداعى ايرىقشا ەڭبەگى جانە ءبىلىم بەرۋ سالاسىنداعى ەلەۋلى جەتىستىگى ءۇشىن الماتىلىق ءتورت پەداگوگ «قۇرمەت» وردەنىمەن ماراپاتتالدى.
مەملەكەتتىك ناگراداعا 53 جىلدىق ەڭبەك ءوتىلى بار رەسپۋبليكالىق فيزيكا-ماتەماتيكا مەكتەبىنىڭ فيزيكا ءپانى ءمۇعالىمى سابىر تۇياقبايەۆ، 50 جىلىن ءبىلىم بەرۋ سالاسىنا ارناعان ەڭبەك ارداگەرى توقتار ابايلدا، 37 جىلدىق ەڭبەك ءوتىلى بار №138 گيمنازيانىڭ باستاۋىش سىنىپ ءمۇعالىمى ەلميرا ءابدىراسىلوۆا جانە ءبىلىم بەرۋ سالاسىندا 33 جىلدان بەرى ەڭبەك ەتىپ كەلە جاتقان №7 ارنايى مەكتەپ-ينتەرناتتىڭ لوگوپەد ءمۇعالىمى الما سەكسەنوۆا يە بولدى.
№87 جالپى ءبىلىم بەرەتىن مەكتەپتىڭ اعىلشىن ءتىلى ءپانى ءمۇعالىمى، 47 جىلىن پەداگوگيكالىق قىزمەتكە ارناعان ناتاليا زۋبەنكو «ەرەن ەڭبەگى ءۇشىن» مەدالىمەن ماراپاتتالدى.
تاعى بەس پەداگوگ قالا اكىمىنىڭ العىس حاتىمەن ماراپاتتالدى. ولاردىڭ قاتارىندا «الماتى دارىنى» ورتالىعى ءبولىمىنىڭ مەڭگەرۋشىسى جىبەك سىبانبايەۆا، №178 مامانداندىرىلعان ليسەي ديرەكتورىنىڭ ورىنباسارى گۇلنافيس داۋلەتبايەۆا، №136 مەكتەپ-گيمنازيانىڭ قازاق ءتىلى مەن ادەبيەتى ءپانى ءمۇعالىمى نۇرگۇل جۇمانبەك، №44 مەكتەپ-گيمنازيانىڭ اعىلشىن ءتىلى ءپانى ءمۇعالىمى سۋساننا زەينالوۆا جانە №174 مەكتەپ-گيمنازيانىڭ ماتەماتيكا ءپانى ءمۇعالىمى دامەن ساعاتبەك بار.
سونداي-اق ءراسىم بارىسىندا جاس پەداگوگتەر اراسىنداعى ءداستۇرلى «الماتى ۇستازى – 2026» قالالىق بايقاۋىنىڭ جەڭىمپازدارى ماراپاتتالدى. بايقاۋدا ۇزدىك اتانعان جەتى پەداگوگ قىتايدا حالىقارالىق تاعىلىمدامادان وتەتىن بولدى. ولار الماتى مەكتەپتەرىندە تاريح، گەوگرافيا، بيولوگيا، قازاق ءتىلى مەن ادەبيەتى، فيزيكا، اعىلشىن ءتىلى جانە حيميا پاندەرىنەن ساباق بەرەدى.
«الماتى ۇستازى – 2026» بايقاۋىنىڭ باس جۇلدەسىن №92 مامانداندىرىلعان ليسەيدىڭ حيميا ءپانى ءمۇعالىمى مىقتىبەك تاڭىربەرگەن باقىتجان ۇلى يەلەندى. جەڭىمپازعا 5 ملن تەڭگە كولەمىندەگى سەرتيفيكات جانە قىتايدا حالىقارالىق تاعىلىمدامادان وتۋگە ارنالعان سەرتيفيكات تابىستالدى.
بايقاۋ فينالىنا قالا مەكتەپتەرى مەن ءتۇرلى پاندىك باعىتتاردى تانىستىرعان جەتى پەداگوگ شىقتى. جاس مامانداردى قولداۋ، ۇستاز ماماندىعىنىڭ بەدەلىن ارتتىرۋ جانە پەداگوگتەردىڭ كاسىبي دامۋىنا جاعداي جاساۋ الماتىنىڭ ءبىلىم بەرۋ جۇيەسىندەگى باسىم باعىتتاردىڭ ءبىرى بولىپ قالا بەرەدى.
