2025 جىلدىڭ قورىتىندىسى بويىنشا الماتىدا كرەاتيۆتى يندۋستريا سالاسىندا 21،5 مىڭ كاسىپكەرلىك سۋبەكتىسى تىركەلگەن، - دەپ حابارلايدى alnews.
سالانىڭ جالپى قوسىلعان قۇنى 672 ملرد تەڭگەگە جەتىپ، بيۋدجەتكە 49،4 ملرد تەڭگە سالىق ءتۇستى. ال نەگىزگى كاپيتالعا سالىنعان ينۆەستيسيا كولەمى 4،5 ەسە ارتىپ، 65 ملرد تەڭگە بولدى. بۇل تۋرالى الماتى قالاسى تۋريزم باسقارماسىنىڭ وكىلدەرى حابارلادى.
كرەاتيۆتى يندۋستريا مۋزىكا، كينو، ديزاين، ءسان، ساۋلەت، مەديا، سيفرلىق كونتەنت جانە ءىس-شارالار سالالارىن قامتيدى. باسقارما مالىمەتىنشە، سالانىڭ ەكونوميكالىق كورسەتكىشتەرىمەن قاتار، قالاداعى مادەني كەڭىستىكتەر مەن ءىرى شىعارماشىلىق جوبالاردىڭ سانى دا ارتىپ كەلەدى.
2025 جىلى قىركۇيەكتە الماتىدا اۋماعى 10 مىڭ شارشى مەتردەن اساتىن Almaty Museum of Arts اشىلدى. سونداي-اق «سەليننىي» زاماناۋي مادەنيەت ورتالىعى جۇمىسىن باستادى. شاھاردا حالىقارالىق دەڭگەيدەگى كونسەرتتەر مەن فەستيۆالدەر دە وتكىزىلىپ كەلەدى.
كرەاتيۆتى يندۋستريا سالاسىنداعى الداعى ماڭىزدى شارالاردىڭ ءبىرى – 11 قاراشادا Almaty Arena-دا وتەتىن THE ICONIC CREATOR AWARDS 2026. بيىل پرەميا العاش رەت قازاقستان، قىرعىزستان جانە وزبەكستاننىڭ كرەاتيۆتى يندۋستريا وكىلدەرىن ءبىر الاڭدا توعىستىرادى.
الماتىدا اۆتورلار، ارتيستەر، رەجيسسەرلەر، ديزاينەرلەر، كاسىپكەرلەر، پروديۋسەرلەر، ساۋلەتشىلەر، مەديا جانە digital-يندۋستريا وكىلدەرى باس قوسادى. سىيلىق مۋزىكا، كينو جانە بەينەلەۋ ونەرىنەن باستاپ ساۋلەت، ويىن يندۋسترياسى مەن كرەاتيۆتى تەحنولوگياعا دەيىن 15 باعىتتى قامتيدى. بارلىعى 100 نەگىزگى جانە توعىز ارنايى ماراپات تابىستالادى.
كرەاتيۆتى يندۋستريا سالاسىنداعى ءىرى حالىقارالىق ءىس-شارالاردى وتكىزۋ الماتىداعى وقيعالى ءتۋريزمدى دامىتۋدىڭ ماڭىزدى باعىتتارىنىڭ ءبىرى رەتىندە دە قاراستىرىلىپ وتىر. مۇنداي ءىس-شارالار قالاعا شەتەلدەن قاتىسۋشىلار مەن قوناقتاردى تارتىپ، ورتالىق ازيانىڭ كرەاتيۆتى يندۋستريا وكىلدەرى اراسىندا جاڭا سەرىكتەستىك ورناتۋعا جول اشادى.
