الماتىدا تەحنولوگيالىق بيزنەسكە، باعدارلامالىق ءونىم ازىرلەۋشىلەرگە، ستارتاپتار مەن زەرتتەۋشىلەرگە ارنالعان جاڭا ينفراقۇرىلىم قالىپتاسىپ جاتىر، - دەپ حابارلايدى alnews.
قالادا Almaty AI Hub جانە Almaty AI Park اتتى ەكى ءىرى جوبا جۇزەگە اسىرىلۋدا.
ەكى نىسان دا ءبىلىم بەرۋ، عىلىمي زەرتتەۋلەر، ستارتاپتاردى دامىتۋ، تەحنولوگيالىق كومپانيالاردىڭ قىزمەتى مەن سالالىق ءىس-شارالاردى وتكىزۋدى ءبىرتۇتاس ەكوجۇيەگە بىرىكتىرۋگە باعىتتالعان.
كوكتەم-3 شاعىناۋدانىندا Almaty AI Hub ورتالىعى قۇرىلىپ جاتىر. اۋدانى 9،4 مىڭ شارشى مەتردەن اساتىن عيمارات قايتا جاڭعىرتىلىپ، 556 جۇمىس ورنى بار كوپفۋنكسيونالدى ورتالىققا اينالادى. مۇندا IT جانە جاساندى ينتەللەكت كومپانيالارىنا، ستارتاپتار مەن ازىرلەۋشىلەرگە ارنالعان كەڭىستىكتەر، ءبىلىم بەرۋ الاڭدارى، كوۆوركينگتەر، كەڭسەلەر، كونفەرەنس-زالدار مەن ءىس-شارالار وتكىزۋ ايماقتارى ورنالاسادى.
حاب قۇرامىنا جاساندى ينتەللەكت مەكتەبى مەن AI Campus ينفراقۇرىلىمى دا كىرەدى. سونداي-اق روبوتوتەحنيكا ەكوجۇيەسىن قۇرۋ كوزدەلگەن. ونىڭ اياسىندا دەمونستراسيالىق ايماقتار، وقىتۋ جانە جاڭا تەحنولوگيالىق شەشىمدەردى ازىرلەۋگە ارنالعان مۇمكىندىكتەر قاراستىرىلادى. تەحنولوگيالىق كوماندالار مەن كومپانيالارعا كەڭسەلەر مەن بىرلەسىپ جۇمىس ىستەۋگە ارنالعان كەڭىستىكتەر ۇسىنىلادى. ال ءتۇرلى ءىس-شارالاردى وتكىزۋ ءۇشىن كونفەرەنس-زالدار مەن ارنايى الاڭدار جابدىقتالادى.
وسىلايشا، Almaty AI Hub ءبىلىم الۋ، العاشقى جوبالاردى ىسكە قوسۋ، ستارتاپتاردى دامىتۋ جانە تەحنولوگيالىق كومپانيالاردا جۇمىس ىستەۋ مۇمكىندىكتەرىن ءبىر كەڭىستىكتە بىرىكتىرەدى.
ەكىنشى جوبا – Almaty AI Park. ونى 4،9 گەكتار جەرگە سالۋ جوسپارلانعان. كەشەننىڭ جالپى اۋدانى شامامەن 76 مىڭ شارشى مەتر. جوبا ەكى كەزەڭدە جۇزەگە اسىرىلادى. ءبىرىنشى كەزەڭدى 2027 جىلى جەلتوقساندا، ال ەكىنشىسىن 2028 جىلى جەلتوقساندا اياقتاۋ كوزدەلگەن.
Almaty AI Park قۇرامىنا عىلىمي-زەرتتەۋ جانە جاساندى ينتەللەكت زەرتحانالارى، تەحنولوگيالىق كومپانيالاردىڭ كەڭسەلەرى، كوۆوركينگ، اكسەلەراتور مەن بيزنەس-ينكۋباتور، سونداي-اق ءبىلىم بەرۋ جانە ءىس-شارالار وتكىزۋ ينفراقۇرىلىمى كىرەدى. بۇدان بولەك، تەحنولوگيالىق كلاستەردىڭ وزىندە ماماندار دايارلايتىن ۋنيۆەرسيتەت اشۋ جوسپارلانعان.
جوبانىڭ تاعى ءبىر ماڭىزدى باعىتى – جاس كومپانيالاردى قولداۋ. ستارتاپتار ءۇشىن بىرلەسىپ جۇمىس ىستەۋگە، جوبالاردى تانىستىرۋعا جانە ينۆەستورلار الدىندا تانىستىرىلىم وتكىزۋگە ارنالعان ارنايى كەڭىستىكتەر قۇرىلادى. ال عىلىمي-زەرتتەۋ زەرتحانالارى جاڭا تەحنولوگيالىق شەشىمدەردى ازىرلەۋ مەن سىناقتان وتكىزۋ الاڭىنا اينالادى.
وسىلايشا، Almaty AI Hub جانە Almaty AI Park جوبالارى الماتىدا IT مەن جاساندى ينتەللەكت سالاسىن دامىتۋعا ارنالعان ءبىرىڭعاي ينفراقۇرىلىم قالىپتاستىرۋعا مۇمكىندىك بەرەدى. بۇل جۇيە ماماندار دايارلاۋدان جانە ستارتاپتاردى ىسكە قوسۋدان باستاپ، عىلىمي زەرتتەۋلەر جۇرگىزۋگە، جاڭا ونىمدەر جاساۋعا جانە تەحنولوگيالىق بيزنەستى تارتۋعا دەيىنگى بارلىق باعىتتى قامتيدى.
