الماتىدا اكىمشىلىك قۇقىق بۇزۋشىلىق جاساعانى ءۇشىن ۇستالىپ، كوممۋنالدىق ارنايى تۇراققا جەتكىزىلگەن كولىكتەردى ەۆاكۋاسيالاۋ جانە ساقتاۋ ءۇشىن اقى ەنگىزىلەدى، - دەپ حابارلايدى alnews.
جاڭا ءتارتىپ 4 قازاننان باستاپ كۇشىنە ەنەدى. بۇل تۋرالى الماتى قالاسىنىڭ جول قوزعالىسى جانە جولاۋشىلار كولىگىن ۇيىمداستىرۋ باسقارماسىنىڭ وكىلدەرى ايتتى.
4 قازاننان باستاپ كولىك قۇرالدارىن كوممۋنالدىق ارنايى تۇراقتارعا ەۆاكۋاسيالاۋ جانە ۋاقىتشا ساقتاۋ ءۇشىن تولەمنىڭ ءبىرىڭعاي ءتارتىبى قولدانىلادى. تولەم مولشەرى 2026 جىلى 18 قىركۇيەكتە الماتى قالاسى ءماسليحاتىنىڭ كەزەكتەن تىس سەسسياسىندا بەكىتىلدى.
ەۆاكۋاسيا قۇنى كولىكتىڭ بارلىق ساناتى ءۇشىن 3 اەك، ياعني 12 975 تەڭگە بولادى. جەڭىل اۆتوكولىكتى ارنايى تۇراقتا ساقتاۋ قۇنى العاشقى تاۋلىككە 2،5 اەك (10 812،5 تەڭگە)، كەيىنگى ءار تاۋلىككە 5 اەك (21 625 تەڭگە) مولشەرىندە بەلگىلەندى.
كولىك يەلەرىنە قۇقىق بۇزۋشىلىقتاردى جويىپ، اۆتوكولىكتەرىن 3 قازانعا دەيىن ارنايى تۇراقتان الىپ كەتۋ ۇسىنىلادى.
ايتا كەتەيىك، بۇل وزگەرىس بارلىق ەۆاكۋاسيا جاعدايىنا قاتىستى ەمەس. ول قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكستە كوزدەلگەن جاعدايدا ۇستالىپ، ارنايى تۇراققا جەتكىزىلگەن كولىك قۇرالدارىنا عانا قولدانىلادى.
