2026 جىلى 30 قاراشادان باستاپ Air Astana اۋە كومپانياسى الماتى – توكيو باعىتى بويىنشا تىكەلەي اۋە قاتىناسىن ىسكە قوسادى، - دەپ حابارلايدى alnews.
رەيستەردى اپتاسىنا ەكى رەت Airbus A321LR ۇشاعىمەن ورىنداۋ جوسپارلانعان. ۇشاقتار توكيونىڭ ناريتا حالىقارالىق اۋەجايىنا (NRT) قونادى.
تىكەلەي رەيستىڭ اشىلۋى قازاقستان مەن جاپونيا اراسىنداعى تۋريستىك جانە ىسكەرلىك بايلانىستى دامىتۋداعى ماڭىزدى قادام بولماق. جاڭا باعىت الماتىنى جاپون ساياحاتشىلارى ءۇشىن قولجەتىمدى ەتىپ، ەكى ەل اراسىنداعى تۋريستەر لەگىن ارتتىرۋعا قوسىمشا مۇمكىندىك بەرەدى.
جاڭا باعىتتىڭ ىسكە قوسىلۋى — الماتىنىڭ جاپونيا تۋريستىك نارىعىندا جۇرگىزىپ كەلە جاتقان جۇيەلى ماركەتينگتىك جۇمىسىنىڭ زاڭدى جالعاسى.
قىركۇيەك ايىندا الماتى توكيودا وتكەن ازياداعى ەڭ ءىرى حالىقارالىق تۋريستىك كورمەلەردىڭ ءبىرى Tourism EXPO Japan 2026 كورمەسىندە تانىستىرىلدى. Visit Almaty ستەندى كاسىبي اۋديتورياعا قالانىڭ تۋريستىك مۇمكىندىكتەرىن تانىستىردى. الماتى وكىلدەرى تۋروپەراتورلارمەن، تۋريستىك ۇيىمدارمەن، ءىرى كومپانيالارمەن جانە جاپون مەدياسالاسىنىڭ وكىلدەرىمەن 150-دەن استام ىسكەرلىك كەزدەسۋ وتكىزدى.
كورمەگە قاتىسۋ ىسكەرلىك بايلانىستى كەڭەيتۋگە، الماتىنىڭ تانىمالدىعىن ارتتىرۋعا جانە قالانى جاپونيا نارىعىندا ىلگەرىلەتۋدىڭ جاڭا باعىتتارىن ايقىنداۋعا مۇمكىندىك بەردى.
جاپونيا نارىعىمەن جۇرگىزىلگەن جۇمىستىڭ تاعى ءبىر ناقتى ناتيجەسى 30 قىركۇيەكتە Almaty Tourism Bureau مەن جاپوندىق Rakuten Sports اراسىندا مەموراندۋمعا قول قويىلۋى بولدى. ىنتىماقتاستىق اياسىندا سپورتتىق جانە وقيعالىق ءتۋريزمدى دامىتۋ، الماتىدا حالىقارالىق جارىستار وتكىزۋ مۇمكىندىگىن قاراستىرۋ جانە قالانى ءىرى سپورتتىق جوبالار ارقىلى تانىتۋ كوزدەلگەن.
وسىلايشا، الماتى – توكيو تىكەلەي رەيسىنىڭ اشىلۋى، شاھاردىڭ Tourism EXPO Japan كورمەسىندە تانىستىرىلۋى جانە جاپون بيزنەسىمەن سەرىكتەستىكتىڭ دامۋى الماتىنىڭ جاپونيا تۋريستىك نارىعىنا شىعۋىنا باعىتتالعان كەشەندى جۇمىستى قالىپتاستىرادى. بۇل جۇمىس قالانى تانىتۋدان جانە ىسكەرلىك بايلانىس ورناتۋدان باستاپ، تىكەلەي كولىك قاتىناسىن قامتاماسىز ەتۋگە دەيىنگى باعىتتاردى قامتيدى.
بۇگىندە الماتىدان 60-تان استام حالىقارالىق باعىتقا تىكەلەي رەيستەر ورىندالادى. قالا قازاقستاننىڭ ءىرى اۆياسيالىق جانە تۋريستىك حابى رەتىندەگى ورنىن ودان ءارى نىعايتىپ كەلەدى.
