الماتى مۋزەيىندە قازاقستاننىڭ حالىق جازۋشىسى، ەڭبەك ەرى، اقىن، مەملەكەت جانە قوعام قايراتكەرى ولجاس سۇلەيمەنوۆتىڭ 90 جىلدىعىنا ارنالعان «تاۋلاردى الاسارتپاي، دالانى اسقاقتاتقان…» اتتى كورمە سالتاناتتى تۇردە اشىلدى، - دەپ حابارلايدى alnews.
كورمە الماتى قالاسى اكىمدىگىنىڭ قولداۋىمەن ۇيىمداستىرىلدى. ونى الماتى قالاسى مۋزەيلەر بىرلەستىگى يۋنەسكو قامقورلىعىنداعى مادەنيەتتەردى جاقىنداستىرۋ حالىقارالىق ورتالىعىمەن بىرلەسىپ وتكىزدى.
ەكسپوزيسيا كەلۋشىلەردى اقىننىڭ شىعارماشىلىق مۇراسى مەن قوعامدىق قىزمەتىمەن تانىستىرادى. كورمەگە ولجاس سۇلەيمەنوۆتىڭ جەكە زاتتارى، قولجازبالارى، ماراپاتتارى، كىتاپتارى، ارحيۆتىك قۇجاتتارى مەن سيرەك كەزدەسەتىن فوتوسۋرەتتەرى قويىلعان.
كورمەنىڭ ەرەكشە جادىگەرلەرىنىڭ ءبىرى – اقىننىڭ ءوز قولىمەن جازىلعان، كوپشىلىككە كەڭىنەن تانىمال «ازيا» كىتابىنىڭ العاشقى نۇسقاسىنان الىنعان ۇزىندىلەر.
سونىمەن قاتار ەكسپوزيسيادا ولجاس سۇلەيمەنوۆتىڭ انتيادرولىق قوزعالىستىڭ قالىپتاسۋىنا قوسقان قوعامدىق ۇلەسى دە كورىنىس تاپقان. بۇل تاقىرىپ سەمەي يادرولىق پوليگونىنىڭ جابىلعانىنا 35 جىل تولۋىنا وراي ۇسىنىلىپ وتىر.
كورمەنىڭ اشىلۋ سالتاناتىندا قازاقستان جازۋشىلار وداعىنىڭ ءتوراعاسى، «قۇرمەت» وردەنىنىڭ يەگەرى مەرەكە ابدەش ۇلى كورمەنىڭ اقىننىڭ شىعارماشىلىق مۇراسى مەن ازاماتتىق ۇستانىمىن تانىتۋداعى ماڭىزىنا توقتالدى.
«كورمەنى تاماشالاپ ءجۇرىپ، ولجاس سۇلەيمەنوۆتىڭ ءوزىن كورگەندەي بولامىز. ءتىپتى، ونىڭ سۋرەتىنە قاراعاننىڭ وزىندە، ءوز بولاشاعىڭدى، الدىڭداعى ۇلكەن ماقساتىڭدى كورگەندەي اسەر الاسىڭ»، – دەدى مەرەكە ابدەش ۇلى.
سالتاناتتى ءىس-شاراعا الماتى قالاسى مادەنيەت باسقارماسى باسشىسىنىڭ ورىنباسارى ارمان بەيسەنباي ۇلى، قازاقستان جازۋشىلار وداعىنىڭ ءتوراعاسى مەرەكە ابدەش ۇلى، يۋنەسكو قامقورلىعىنداعى مادەنيەتتەردى جاقىنداستىرۋ حالىقارالىق ورتالىعى ديرەكتورىنىڭ ورىنباسارى يگور ۆلاديميروۆيچ، فيلوسوفيا عىلىمدارىنىڭ دوكتورى، اكادەميك نۇر سەرىك ۇلى، تاريح عىلىمدارىنىڭ دوكتورى زاينيدين كارپەك ۇلى، ولجاس سۇلەيمەنوۆتىڭ قارىنداسى جىبەك ابدۋالييەۆا، شىعارماشىلىق زيالى قاۋىم وكىلدەرى، مادەنيەت جانە ونەر قايراتكەرلەرى، ب ا ق وكىلدەرى، سونداي-اق الماتى تۇرعىندارى مەن قالا قوناقتارى قاتىستى.
«تاۋلاردى الاسارتپاي، دالانى اسقاقتاتقان…» كورمەسى ەكى اپتا بويى الماتى مۋزەيىندە وتەدى.
مەكەنجايى: الماتى قالاسى، قابانباي باتىر كوشەسى، 132.
