الماتى اكىمى دارحان ساتىبالدى كوشەلەردى كوركەيتۋ جانە قوعامدىق كەڭىستىكتەردى دامىتۋ جوبالارىنىڭ جۇزەگە اسىرىلۋ بارىسى بويىنشا كەڭەس وتكىزدى، - دەپ حابارلايدى alnews.
جيىندا جۇمىستاردى ۇيىمداستىرۋ، بەلگىلەنگەن مەرزىمدى ساقتاۋ، قاۋىپسىزدىك تالاپتارى مەن جوبالاردىڭ ساپالى ورىندالۋىنا باسا نازار اۋدارىلدى.
دارحان ساتىبالدىنىڭ ايتۋىنشا، بيىل قالادا كوشەلەر مەن جاعالاۋلاردى كوركەيتۋ، جاڭا قوعامدىق كەڭىستىكتەر قۇرۋ، تۇرعىن ۇيلەردىڭ قاسبەتىن جوندەۋ جانە اۋماقتاردى كوگالداندىرۋ بويىنشا اۋقىمدى جۇمىستار جۇرگىزىلىپ جاتىر.
ونىڭ ايتۋىنشا، تۇرعىندار جالپى جۇرگىزىلىپ جاتقان جۇمىستارعا تۇسىنىستىكپەن قارايدى. ويتكەنى قالالىق ينفراقۇرىلىمدى جاڭارتۋ قاجەتتىگىن كورىپ وتىر. الايدا قۇرىلىس جۇمىستارىنىڭ قالاي ۇيىمداستىرىلعانىنا قاتىستى ماسەلەلەر بار.
«الايدا تۇرعىندار جۇمىستاردىڭ ۇيىمداستىرىلۋىنا قاتىستى نارازىلىق ءبىلدىرىپ وتىر. اتاپ ايتساق، ۇنەمى شاڭ-توزاڭ بولادى، تۇنگى ۋاقىتتا شۋ شىعادى، جۇمىس جۇرگىزىلىپ جاتقان اۋماقتا ءقاۋىپسىز وتكەلدەر جوق. كەيبىر جاعدايدى تۇسىنۋگە بولادى. ءبىراق كورىپ وتىرعانىمىزداي، بۇل جۇيەلى تۇردە قايتالانىپ وتىرعان زاڭبۇزۋشىلىقتار. دەمەك، جۇمىستى ۇيىمداستىرۋدا كەمشىلىكتەر بار»، – دەدى الماتى اكىمى.
شاھار باسشىسى كوركەيتۋ كەزىندە اعاشتاردىڭ زاقىمدانۋ جاعدايىنا دا توقتالدى.
«مىسالى، ارىق ناۋالارىن اۋىستىرۋ جانە سۋارۋ جۇيەلەرىن جۇرگىزۋ كەزىندە قولدانىستاعى جاسىل جەلەكتەردىڭ تامىرلارى زاقىمدالادى. بۇعان جول بەرۋگە بولمايدى»، – دەدى دارحان ساتىبالدى.
الماتى اكىمى قالا قۇرىلىسىن باقىلاۋ باسقارماسىنا جۇمىستاردىڭ ساپاسى مەن ورىندالۋ مەرزىمىن، قاۋىپسىزدىك تالاپتارىنىڭ ساقتالۋىن جانە قۇرىلىس ۇدەرىستەرىنىڭ ۇيىمداستىرىلۋىن تەكسەرۋدى تاپسىردى. اسىرەسە، كوشەلەردى «قاسبەتتەن قاسبەتكە دەيىن» قاعيداتى بويىنشا كەشەندى كوركەيتۋ جوبالارىنا ەرەكشە نازار اۋدارۋدى مىندەتتەدى.
سونىمەن قاتار «Eco Almaty» ج ش س مەن پوليسياعا كوركەيتۋ قاعيدالارى بۇزىلعان جاعدايدا، ونىڭ ىشىندە شاڭ-توزاڭ، قۇرىلىس قالدىقتارى جانە جاسىل جەلەكتىڭ زاقىمدانۋىنا بايلانىستى زاڭ بۇزۋشىلىقتار انىقتالسا، اكىمشىلىك شارالار قابىلداۋ تاپسىرىلدى.
«مەردىگەرلەر جۇمىستاردىڭ ساپاسى مەن دۇرىس ۇيىمداستىرىلۋىنا جاۋاپتى بولۋى كەرەك. كورىكتەندىرۋ قالالىق ورتانى جاقسارتۋعا باعىتتالۋعا ءتيىس، تۇرعىندارعا قوسىمشا قيىندىق تۋعىزىپ، قولدانىستاعى ينفراقۇرىلىم مەن جاسىل جەلەككە زيان كەلتىرمەۋى كەرەك. باسقارمالار تۇرعىنداردىڭ شاعىمدارىنا جاي عانا جاۋاپ بەرىپ قويماي، ناقتى شارالار قابىلداۋى قاجەت»، – دەدى الماتى اكىمى.
