الماتى كۇنىنە وراي «الاتاۋ» ءداستۇرلى ونەر تەاترى XI تەاتر ماۋسىمنىڭ شىمىلدىعىن ءتۇردى، - دەپ حابارلايدى alnews.
جاڭا ماۋسىم اياسىندا كورەرمەن نازارىنا «Mamluk. سۇلتان بەيبارىس» سپەكتاكلى ۇسىنىلدى.
سۇلتان بەيبارىس ءوز زامانىنىڭ ۇلى باسقارۋشىسى، ماملۇك ەلىن بىرىكتىرۋشىسى تۇلعا رەتىندە ەل ەسىندە. بىلىكتى كوشباسشى مىسىر ەلىن نىعايتىپ، تۇراقتى ەلگە اينالدىرا الدى. ساۋندراما جانرىنداعى قويىلىمدا سۇلتان بەيبارىستىڭ ءومىر جولى، جاۋىنگەرلىك ەرلىگى مەن ەل باسقارۋداعى پاراسات-پايىمى باياندالادى.
قويىلىمدا دىبىستىق جانە حورەوگرافيالىق شەشىمدەر، ەتنو-فولكلورلىق اۋەندەر مەن جاۋىنگەرلىك رۋحتى جەتكىزەتىن ساحنالىق ەلەمەنتتەر ءوزارا ۇيلەسىم تاپقان. رەجيسسەرلىك شەشىم ارقىلى تاريحي تۇلعانىڭ جاۋىنگەرلىك بولمىسىمەن بىرگە ادامي قىرى دا اشىلادى. وتكەن مەن بۇگىندى ساباقتاستىرا وتىرىپ، سپەكتاكل كورەرمەندى ۇلتتىق مۇراعا جاڭاشا كوزقاراسپەن قاراۋعا جەتەلەيدى.
XI ماۋسىمنىڭ باستى جاڭالىقتارىنىڭ ءبىرى – 26 جانە 27 قىركۇيەكتە كورەرمەنگە العاش ۇسىنىلعان «قورلان» سپەكتاكلىنىڭ پرەمەراسى.
«قورلان» – بەلگىلى ءانشى ءارى اقىن ەستاي مەن اڭىزعا اينالعان قورلاننىڭ ءمولدىر ماحابباتىن ارقاۋ ەتكەن جاڭا ساحنالىق تۋىندى. الايدا سپەكتاكل ءبىر عانا ماحاببات حيكاياسىمەن شەكتەلمەي، ۇلت تاعدىرى، تاريحي جادى، ايەل تاعدىرى، نازىكتىك پەن قايسارلىقتىڭ ۇيلەسىمى سەكىلدى تاقىرىپتاردى كەڭىنەن قوزعايدى.
قويىلىمداعى قورلان بەينەسى ءبىر ادامنىڭ تاعدىرىنان الدەقايدا اۋقىمدى. ول مىڭداعان قازاق ايەلىنىڭ، انانىڭ، جار مەن قىزدىڭ تاعدىرىن بويىنا جيناقتاعان وبراز رەتىندە كورىنەدى. ونىڭ تاعدىرىنان اشارشىلىق قاسىرەتى، قۋعىن-سۇرگىن زارى مەن سوعىستىڭ قارالى ءىزى اڭعارىلادى. سوعان قاراماستان قورلان – تاعدىر تاۋقىمەتىنە مويىماعان، جانى جارالانسا دا رۋحى سىنباعان قازاق ايەلىنىڭ بەينەسى.
وسىلايشا، «الاتاۋ» ءداستۇرلى ونەر تەاترى XI تەاتر ماۋسىمىن جاڭا قويىلىمدارمەن باستاپ، ۇلتتىق ونەردى زاماناۋي ساحنالىق شەشىمدەر ارقىلى كورەرمەنگە ۇسىندى. الداعى ۋاقىتتا تەاتر رەپەرتۋارىنداعى كورەرمەن ىقىلاسىنا بولەنگەن باسقا دا سپەكتاكلدەر كورسەتىلىپ، جاڭا ماۋسىم اياسىندا كورەرمەن نازارىنا ۇسىنىلا بەرەدى.
