Astanada ótken "Qazaqstan-Germanıa" bıznes forýmyna qatysqan Memleket basshysy Qasym-Jomart Toqaev qazaq-german qatynasynyń jańa kezeńi bastalǵanyn málimdedi. Ol Germanıa kansleri Olaf Sholstyń kezekti sapary osy jańa kezeńniń shymyldyǵyn ashqanyn atap ótti.
Forýmnan buryn memleket basshylary energetıka, mashına jasaý, logıstıka, taý-ken metalýrgıasy jáne aýyl sharýashylyǵy salalaryndaǵy qazaq-german birlesken jobalaryna arnalǵan kórde bolǵan. Forým barysynda eki el basshysy strategıalyq yntymaqtastyqtyń damýyna oń baǵa berdi.
Bıznes forýmynda Prezıdent Toqaev qazaq-german strategıalyq yntymaqtastyǵyn damytý boıynsha «Asa mańyzdy shıkizatty ınvestısıa men tehnologıaǵa aıyrbastaý» pragmatıkalyq formýlasyn negiz etetinin, oǵan saı tabıǵı resýrstardy óndirý jáne óńdeý isin birlesip damytýdy usyndy.
«Bizdiń mıneraldy-shıkizat qorymyzda áli barlanbaǵan bes myńnan astam ken orny bar. Bul kenishterdiń quny trıllıondaǵan dollarǵa baǵalanady. Búginde biz Eýropa Odaǵynyń ekonomıkasy úshin asa mańyzdy 34 sırek kezdesetin materıaldyń 19 túrin óndiremiz. Osyǵan oraı Mıneraldyq resýrstar jónindegi nemis agenttigi (DERA) men qazaq seriktesteri mańyzdy shıkizat saýdasy boıynsha konsorsıým quryp jatyr. Biz bul bastamanyń taıaý arada naqty iske asýyn asyǵa kútip otyrmyz. Budan bólek, HMS Bergbau kompanıasynyń Shyǵys Qazaqstanda lıtıı elementin qaıta óńdeıtin zaýyt salý úshin barlaý jumystaryn júrgizý týraly josparyn quptaımyz. Bul jobaǵa salynatyn ınvestısıa kólemi – 500 mıllıon dollar. Elimizdiń baı resýrs qory ónerkásip salasyndaǵy yntymaqtastyǵymyzdy keńeıte túsýge mol múmkindik beredi", – degen Prezıdent.
"Qazaqstan-Germnaıa" bıznes forýmynda taraptar 12 qol qoıylǵan qujattarmen almasty. Olar:
1.Qazaqstan Respýblıkasy Ónerkásip jáne qurylys mınıstrligi men Germanıa ekonomıkasy Shyǵys komıteti arasyndaǵy Tehnıkalyq retteý salasyndaǵy yntymaqtastyq boıynsha Qazaqstan-Germanıa bastamalarynyń Jol kartasy;
2. Qazaqstan Respýblıkasy Ǵylym jáne joǵary bilim mınıstrligi men Svevind Energy kompanıasy arasyndaǵy «Jasyl sýtegi» jobasyna baılanysty zertteý júrgizý boıynsha yntymaqtastyq týraly memorandým;
3. QR Ekologıa jáne tabıǵı resýrstar mınıstrligi, QR Sıfrlyq damý, ınovasıalar jáne aeroǵarysh ónerkásibi mınıstrligi men «Siemens» jaýapkershiligi shekteýli seriktestigi arasyndaǵy ózara túsinistik týraly strategıalyq memorandým;
4. «Samuryq-Qazyna» aksıonerlik qoǵamy men «Siemens Central Asia» jaýapkershiligi shekteýli seriktestigi arasyndaǵy strategıalyq seriktestik týraly kelisim;
5. Qazaqstan Respýblıkasy Kólik mınıstrligi men «SKYHANSA» jaýapkershiligi shekteýli seriktestigi arasyndaǵy Halyqaralyq júk jáne jolaýshylar áýejaıynyń qurylysy boıynsha jobany birlesip iske asyrý jónindegi negizgi kelisim;
6. «Báıterek» UBH» AQ men «HORSCH Maschinen GmbH» arasyndaǵy yntymaqtastyq týraly kelisim;
7. «Báıterek» UBH» AQ men «KfW Bankengruppe» arasyndaǵy ózara túsinistik týraly memorandým;
8. «Báıterek» UBH» AQ men «CLAAS Global Sales GmbH» arasyndaǵy yntymaqtastyq týraly kelisim;
9. «Ulttyq tehnologıalyq boljaý ortalyǵy» RMK jáne GFR Geoǵylymdar men tabıǵı resýrstardyń federaldyq ınstıtýty (BGR) arasyndaǵy nıet týraly memorandým;
10.«Qazaqstan damý banki» AQ men Deutsche Bank arasyndaǵy mandattyq hat;
11. «Qazaq Kalium Ltd.» AQ jáne KfW Bankengruppe, Euler Hermes Group arasyndaǵy «Batys Qazaqstan oblysyndaǵy «Sátimola» ken orny bazasyndaǵy kalıı tuzdary men bor qyshqylyn óndiretin baıytý-óndiristik keshenin salý» jobasy boıynsha ózara yntymaqtastyq týraly memorandým;
12. «Agromashholdıng» AQ jáne Amazonen-werke h. Dreyer Se & Co.Kg. arasyndaǵy Qostanaı oblysynda «Condor» sepkishterin birlesip óndirý boıynsha jobany iske asyrý jónindegi kelisim.
Budan tys eki eldiń túrli ortalyq jáne jergilikti memlekettik organdary, bıznes qurylymdary arasynda 23 qujatqa qol qoıdy.
