Reseı prezıdenti Vladımır Pýtın Soltústik Koreıaǵa saparlaı bardy. Bul onyń shırek ǵasyrdan bergi alǵashqy sapary deýge bolady. Búgin, 19 maýsym kúni eki el áskerı yntymaqtastyqty tereńdetý kelisimine qol qoıysty. Bul elisim bir tarap shabýylǵa ushyraǵan jaǵdaıda ekinshi taraptyń kómek kórsetý ýádesin de óz ishine qamtıdy.
Kelisimnen keıin eki el qarym-qatynasyn KHDR basshysy "Odaq" dep atasa, Reseı prezıdenti qorǵanys elementterin qamtıtyn «jan-jaqty strategıalyq seriktestik» dep málimdedi.
Jahandyq shıelenis qyzyp turǵan jaǵdaıda Máskeý men Pıońáń (Phenán) qarym-qatynasynyń bulaı damýy Batys elderin alańdatary anyq. Sebebi, kezdesý barysynda Pıońáń Ýkraınadaǵy soǵysta Reseıdi tabandy qoldaıtynyn ashyq ańǵartty.
Al Ýkraınany qoldaýshy Batys elderi úshin bul alańdatarlyq jaǵdaı. Batys elderi Soltústik Koreıanyń ıadrolyq nemese balıstıalyq zymyrandary Ýkraınadaǵy soǵysqa aralasyp kete me dep qaýiptenedi.
Máskeý-Pıońáń baılanysynyń jedel damýy, ásirese, Seýl men Vashıngtondy alańdatady. Qos tarap ta Pýtınniń KHDR saparyn qalt jibermeı qadaǵalap otyr.
Koreı Halyqtyq Demokratıalyq Respýblıkasynyń eń joǵary basshysy Kım Joń Ýn (Kım Chen Yn) ádette sheteldik lıderlermen sırek kezdesedi. Bul ret Reseı basshysyn qarsy alý sharasy asa dabyraly, ári saltanatty ótti. Bul eki el ózara múddelerin toǵystyryp, tereń yntymaqtastyqqa bet burǵanyn kórsetetin bir ǵana belgi.
Dıplomatıalyq is-qımyldar men resmı málimdemege qaraı otyryp, Reseı men Soltústik Koreıa qorǵanys salasyn negiz etken berik yntymaqtastyq qurýǵa basa nazar aýdaratyny túsinikti boldy. Al qos eldiń bul qadamy qalaı da olardyń strategıalyq báselesterine zor áserin beredi. Ári bul jahandyq shıelenistiń tipti de kúsheıe túskenin túsindiredi.
