Almaty qalasy ákiminiń orynbasary Abzal Núkenovtiń tóraǵalyǵymen Memlekettik rámizder jónindegi komısıanyń kezekti otyrysy ótti, - dep habarlaıdy alnews.
Jıynda Qazaqstan Respýblıkasynyń Memlekettik rámizderi kúnin merekeleýge daıyndyq barysy, memlekettik rámizderdiń qoldanylýyna júrgizilgen monıtorıń nátıjeleri jáne olardy keńinen nasıhattaý máseleleri qaraldy.
Otyrys barysynda memlekettik rámizderdiń el táýelsizdigi men memlekettiliginiń mańyzdy nyshandary ekeni atap ótildi. Memlekettik Tý, Eltańba jáne Ánurannyń mártebesine saı qoldanylýyn qamtamasyz etý, zań talaptarynyń saqtalýyn turaqty baqylaýda ustaý – barlyq memlekettik organdar men mekemelerdiń ortaq mindeti ekeni aıtyldy.
Jıyn qorytyndysy boıynsha aýdan ákimderiniń apparattaryna, Bilim jáne Densaýlyq saqtaý basqarmalaryna memlekettik rámizderdi paıdalaný barysynda anyqtalǵan zań buzýshylyqtardy joıý boıynsha qajetti sharalardy qabyldaý tapsyryldy. Sonymen qatar, İshki saıasat basqarmasyna memlekettik organdarmen birlesip qoǵamdyq monıtorıń jumystaryn jalǵastyrý mindetteldi.
Komısıa músheleri jastar arasynda patrıottyq tárbıeni kúsheıtý, memlekettik rámizderdiń máni men mańyzyn túsindirýge baǵyttalǵan is-sharalardy júıeli túrde ótkizýdiń mańyzdylyǵyn atap ótti.
Otyrys qorytyndysynda memlekettik rámizderdi qurmetteý mádenıetin qalyptastyrý, olardy paıdalaný talaptarynyń saqtalýyn qamtamasyz etý jáne turǵyndar arasynda keńinen nasıhattaý jumystaryn jalǵastyrý jóninde naqty tapsyrmalar berildi.
