Ulytaý oblysy elimizde jańa formattaǵy Smart Point sıfrlyq HQKO iske qosylǵan alǵashqy óńir boldy. Bul – memlekettik qyzmetterdi alýdyń sapasyn jańa deńgeıge kóterýge baǵyttalǵan zamanaýı ári ınovasıalyq keńistik, - dep habarlaıdy alnews.
Joba halyqtyń sıfrlyq saýattylyǵyn arttyrýǵa, elektrondyq qyzmetterdi ózdiginen paıdalaný mádenıetin qalyptastyrýǵa jáne azamattar men memleket arasyndaǵy ózara is-qımyldyń yńǵaıly, zamanaýı ári tehnologıalyq ortasyn damytýǵa baǵyttalǵan.
Atalǵan oqıǵanyń mańyzdylyǵyn arttyra túsetin jaıt – Ulytaý oblysy halyqqa qyzmet kórsetýdiń osy ozyq formatyn engizgen Qazaqstandaǵy alǵashqy óńir boldy. Ortalyqtyń ashylýy eldegi sıfrlyq transformasıa úderisteriniń aldyńǵy qatarynda bolýǵa degen óńirdiń talpynysyn aıqyndaı tústi.
Jańa ortalyqtyń jumysymen tanysý maqsatynda «Azamattarǵa arnalǵan úkimet» Memlekettik korporasıasy Basqarma Tóraǵasy Arman Shoqanuly Kenjeǵalıev, Ulytaý oblysynyń ákimi Dastan Adaıuly Ryspekov jáne Ulytaý oblysynyń sıfrlyq tehnologıalar basqarmasynyń basshysy Ermek Jazylhanuly arnaıy bardy.
«Biz tek jańa býyndaǵy halyqqa qyzmet kórsetý ortalyqtaryn ashyp jatqan joqpyz. Biz memleket pen azamat arasyndaǵy baılanystyń jańa mádenıetin qalyptastyryp jatyrmyz. Bul ashyqtyqqa, zamanaýılyqqa jáne adamǵa baǵdarlanǵan jańa format. Sonymen qatar jumysymyzdyń basty qaǵıdaty ózgermeıdi. Ol memlekettik qyzmetterdiń ár azamat úshin qoljetimdi bolýy. Aldaǵy ýaqytta Apple Store úlgisindegi mundaı ortalyqtar elimiz boıynsha kezeń-kezeńimen engiziledi. Infraqurylymnyń daıyndyǵyna qaraı Astana men Pavlodar qalalarynda da iske qosýdy josparlap otyrmyz», – dedi Memlekettik korporasıanyń Basqarma tóraǵasy Arman Kenjeǵalıev.
Smart Point – azamattarǵa operatorlardyń kómeginsiz memlekettik qyzmetterdi óz betinshe alýǵa múmkindik beretin zamanaýı joǵary tehnologıalyq keńistik. Mundaı tásil kútý ýaqytyn edáýir qysqartyp qana qoımaı, memlekettik sıfrlyq servısterdi qolaıly ári tıimdi paıdalanýǵa jańa múmkindikter ashady.
Ortalyq birneshe fýnksıonaldyq aımaqtan turady. Olardyń árqaısysy zamanaýı paıdalanýshylardyń qajettilikterin eskere otyryp jasaqtalǵan.
Ekspress-aımaqta memlekettik qyzmetterdi ózdiginen alýǵa arnalǵan termınaldar ornatylǵan. Sonymen qatar qujattardy messendjerler men basqa da sıfrlyq baılanys arnalary arqyly jedel joldaýǵa múmkindik qarastyrylǵan.
Sıfrlyq aımaq symsyz qýattaý qurylǵylarymen jáne joǵary jyldamdyqty skanerlermen jabdyqtalǵan. Bul kelýshilerge qajetti qujattardy jedel sıfrlandyryp, memlekettik aqparattyq júıelerge júkteýge múmkindik beredi.
Saraptamalyq aımaq kúrdeli memlekettik qyzmetterdi mamandardyń súıemeldeýimen alýǵa arnalǵan.
Erekshe nazar sıfrlyq saýattylyqty arttyrý aımaǵyna aýdarylǵan. Munda ınteraktıvti ekran jáne oqyp-úırenýge ári demalýǵa qolaıly keńistik qarastyrylǵan. Turǵyndar bul jerde sıfrlyq daǵdylaryn tegin jetildirip, jańa elektrondyq servısterdi meńgerip, sıfrlyq memlekettiń múmkindikterin senimdi paıdalana alady.
Búginde Smart Point – bul tek qyzmet kórsetýdiń jańa formaty ǵana emes, tehnologıalar men adamdardyń arasyn jaqyndatatyn, al memlekettik qyzmetterdi barynsha yńǵaıly, qoljetimdi ári tıimdi etetin keńistik. Osyndaı jobalardy iske asyrý azamattardyń ómir súrý sapasyn arttyrýǵa, qoǵamdaǵy sıfrlyq mádenıetti nyǵaıtýǵa jáne sıfrlyq Qazaqstandy odan ári damytýǵa berik negiz qalyptastyrýǵa yqpal etedi.
