Almaty qalasynyń ákimi Darhan Satybaldy OpenAI kompanıasynyń ókilderimen kezdesip, jasandy ıntellekt, bilim berý júıesin sıfrlandyrý, maman daıarlaý jáne qalanyń tehnologıalyq ekojúıesin damytý baǵytyndaǵy seriktestik múmkindikterin talqylady, - dep habarlaıdy alnews.
OpenAI delegasıasynyń quramynda kompanıanyń Eýropa, Taıaý Shyǵys jáne Afrıka óńirleri boıynsha bilim berý baǵytynyń jetekshisi Karlotta Revılo, «Elderge arnalǵan bilim berý» halyqaralyq baǵytynyń jetekshisi Valerı Fokke, EMEA jáne APAC óńirlerindegi bilim berý jáne memlekettik sektor boıynsha Solutions Engineering baǵytynyń jetekshisi Shaıg Abdýragımov, «Ekonomıkalyq yqpal jáne ózara is-qımyl» baǵytynyń jetekshisi Reıchel Braýn, Silkroad Innovation Hub bas dırektory Áset Ábdýálıev jáne Bilim Group kompanıasynyń ChatGPT Edu jobasynyń jetekshisi Maǵjan Amanǵazy boldy.
Kezdesý barysynda Darhan Satybaldy Almatynyń elimizdegi eń iri tehnologıalyq ári bilim berý ortalyǵy ekenin atap ótti. Onyń aıtýynsha, qalada jetekshi joǵary oqý oryndary, ǵylymı uıymdar, tehnologıalyq kompanıalar men startaptar shoǵyrlanǵan. Sondaı-aq, qala sıfrlyq ekonomıkany júıeli túrde damytyp, álemdik ozyq tehnologıany tartýǵa múddeli ekeni aıtyldy.
Taraptar Qazaqstandaǵy ChatGPT Edu jobasyn iske asyrý máselesine erekshe nazar aýdardy. Búginde Almaty bul platformany bilim berý uıymdaryna engizý boıynsha kóshbasshy qalalardyń biri sanalady. Jobaǵa qazirdiń ózinde 500-den astam bilim berý uıymy qosylyp, belsendirilgen lısenzıalar sany 5 myńnan asty.
Kezdesýge qatysýshylar jasandy ıntellekt tehnologıasyn bilim berý úderisinde, pedagogterdi daıarlaý men olardyń biliktiligin arttyrýda, ǵylymı zertteýler júrgizýde jáne memlekettik basqarý tıimdiligin kúsheıtýde qoldanýdyń jańa múmkindikterin talqylady.
Sonymen qatar Almatydaǵy jasandy ıntellekt ekojúıesin damytý máselesi sóz boldy. Darhan Satybaldy jalpy aýmaǵy 75 myń sharshy metrden asatyn Almaty AI Park jobasyn júzege asyrý josparymen bólisti. Jobanyń alǵashqy kezeńinde tehnologıalyq kompanıalardy, startaptardy, zertteý ortalyqtary men bilim berý uıymdaryn biriktiretin Almaty AI Hub iske qosylady.
Buǵan qosa, birlesken bilim berý jáne ǵylymı-zertteý baǵdarlamalaryn ázirleý, AI-zerthanalaryn ashý, hakatondar ótkizý, sondaı-aq memlekettik qyzmetshilerdiń, oqytýshylar men stýdentterdiń biliktiligin arttyrý baǵdarlamalaryn iske asyrý múmkindikteri qarastyryldy. Sonymen birge startaptardy qoldaý jáne jasandy ıntellekt negizindegi sheshimderdi qalalyq ekonomıkanyń túrli salalaryna engizý jaıy talqylandy.
Kezdesý sońynda taraptar jasandy ıntellekt salasyndaǵy yntymaqtastyqty odan ári damytýǵa jáne birlesken jobalardy júzege asyrýǵa daıyn ekenderin rastady.
OpenAI ókilderiniń sapary Qazaqstannyń bilim berý júıesine jasandy ıntellekt tehnologıasyn engizýge baǵyttalǵan ulttyq joba aıasynda júzege asýda. Atalǵan bastama aıasynda elimiz boıynsha 165 myń pedagog ChatGPT Edu platformasyna qol jetkizedi.
