Aımaqtaǵy jańa geosaıası jaǵdaıda iri elderdiń elimizge jáne bizdi qamtyǵan aımaqtaǵy syrtqy qatysýy belsendi bola tústi. Bul jaǵdaıdy elimiz saýda-ekonomıkalyq qarym-qatynastar negizinde tıimdi paıdalanýǵa tyrysyp keledi. Aıtalyq, bir apta buryn Qazaqstan men Germanıa arasynda jasasqan kelisimder de eldiń ınovasıalyq damýyna oń áserin bermek.
Elimizdiń geografıalyq ornalasýy Eýrazıa tórindegi asa mańyzdy strategıalyq artyqshylyqqa ıe. Bul artyqshylyq Qazaqstandy Orta Azıadaǵy eń iri saýda jáne logıtsıka ortalyǵyna aınaldyrýǵa eń basty múmkindikti túzip berip otyr. Sondyqtanda Shyǵys pen Batys arasynda qazir eń qysqa saýda joly retinde usynylyp kele jatqan "Orta dáliz" jobasyna da kóptegen taraptar qyzyǵýshylyq tanytady. Eýropaǵa jetetin eń qysqa dáliz tolyq júzege asqan jaǵdaıda Qazaqstan arqyly bul dálizden ótetin taýar mólsheri 10 mln tonnaǵa deıin jetedi degen boljamdar bar. Sondyqtan da elimiz óziniń bolashaq ekonomıkalyq ındýstrıaldy jáne ınovasıalyq damýyn mańyzdy saýda-ekonomıkalyq qarym-qatynastarmen, sondaı-aq, mańyzdy saýda dálizderimen baılanystyrady.
Bul baǵytta resmı Astana Eýropalyq odaq elderimen qarym-qatynastardy damyta otyryp Shyǵys pen Batys arasyndaǵy saýda-sattyqty tipti de damyta túsý úshin «Orta dálizdi» qazir qoldanystaǵy transeýropa kólik jelisimen jáne Eýropa Odaǵynyń «Jahan qaqpasy» bastamasymen ushtastyrýdy usynyp keledi. Ortalyq Azıa men Eýropany tutastyratyn mańyzdy saýda jolynyń ózara jalǵasýy úshin eń áýeli eki aımaq elderi arasyndaǵy ekonomıkalyq baılanystardyń qarqyndy damýy alǵy shart bolmaq.
Al Qazaqstan men Germanıa arasyndaǵy, soǵan ilese Germanıanyń aımaq elderimen saýda qatynastarynyń qarqyndy damýy osy baǵyttaǵy ındýstrıalyq maqsattardyń oryndalýyna jol ashyp keledi. Aıtalyq, jaqynda ótken "Qazaqstan-Germanıa" bıznes forýymynda eki el basshylary ózara taýar aınalymyn joǵarylatý, ónim óńdeý, aýyl sharýashylyǵy syndy naqtyy sektorlarda yntymaqtastyqty arttyrý týrasynda ortaq bastamalardy kóterdi. Ári ekijaqty mańyzdy kelisimderge qol qoıysty.
Osy jıynda Memleket basshysy Qasym-Jomart Toqaev: " Qazaqstan Eýrazıadaǵy jetekshi aqparattyq tehnologıalar ortalyǵyna aınalýdy kózdeıdi. Birikken Ulttar Uıymy Qazaqstandy sıfrlyq tehnologıalardy engizý jaǵynan úzdik 30 eldiń qataryna qosty. Biz ǵylymı-zertteý jobalary, startaptar, tehnıkalyq bilim berý jáne trenıńter uıymdastyrý, sondaı-aq jasandy ıntellekt salasyndaǵy jańa IT-jobalardy júzege asyrý arqyly yntymaqtastyqty barynsha keńeıtýge umtylamyz, – degen bolatyn.
Elimizdiń Germanıamen yntymaqtastyq negizinde birqatar naqty sektordy damytýdy kózdeıdi. Sonyń biri aýylsharýashylyǵy salasy. Qazaqstan – álemdegi eń iri bıdaı eksporttaýshylardyń biri. Degenmen, mol tabys ákeletin jáne jyldan jylǵa suranys arytyp kele jatqan salany damytýda elimiz agroónerkásip keshenin jańǵyrtýǵa múddeli bolyp otyr. Ásirese aýylsharýashylyǵy salasynda joǵary tehnologıalardy, agrotehnologıalyq ınovasıalardy engizýdi kózdeıdi. Qazaqstan Germanıamen «Asa mańyzdy shıkizatty ınvestısıa men tehnologıaǵa aıyrbastaý» pragmatıkalyq formýlasyna saı seriktestik ornatyp, eldiń ınovasıalyq damýyna jańa keńistik ashýdy kózdeıdi.
The Alnews
