Resmı málimette M.Nurtileý óziniń ázerbaıjandyq jáne armenıandyq áriptesterimen eki jaqty qarym-qatynasty, saýda-ekonomıkalyq baılanystardy damytý máselelerin keńesken. Oǵan qosa taýar aınalymy men tranzıttik-kóliktik áleýet kólemin ulǵaıtý máselelerin, óńirlik ekonomıkalyq jáne kóliktik ózara baılanysty damytý taqyryptaryn talqylaǵan.
Ázerbaıjan SİM jetekshisi Djeıhýn Baıramov qazaqstandyq tarapqa Ázerbaıjan men Armenıa arasyndaǵy ekijaqty beıbitshilik prosesin ilgeriletý baǵytyndaǵy qoldaýy men belsendiligi úshin alǵysyn aıtqan. Ári búgingi kelissózder osy proseske óz úlesin qosatynyna senimin bildirgen.
Armenıa Syrtqy ister mınıstri Ararat Mırzoıan 1991 jylǵy Almaty deklarasıasynyń Ázerbaıjan men Armenıa arasyndaǵy qatynastardy retteý, onyń ishinde shekarany delımıtasıalaý prosesinde mańyzdylyǵyn eskere otyryp, Ázerbaıjan men Armenıa Syrtqy ister mınıstrleriniń Qazaqstandaǵy, atap aıtqanda Almaty qalasyndaǵy kezdesýiniń sımvoldyq sıpatyn atap ótken.
Aıta keteıik, mınıstr M.Nurtileý Ázerbaıjan men Armenıa taraptaǵy áriptesterimen qos taraptyń kelissózi aıasynda kezdesti. Buǵan deıin Qazaqstan taraby Almatyda Ázerbaıjan men Armenıanyń SİM basshylaryna kelissóz alańyn usynǵan bolatyn. Kelissóz kezdesýi búgin Almatyda ótip jatyr. Ońtústik Kavkaz óńirindegi beıbitshilik pen turaqtylyqqa qatysty bul kelissóz prosesine kóptegen elder nazar aýdarýda.
