Bir qaraǵanǵa saılaýdan keıingi kadrlyq aýys-túıis qalypty saıası úderis sıaqty. Biraq Sergeı Shoıgýdyń qyzmetten ketýi qalypty oqıǵa deı almaımyz.
Shoıgýdyń qorǵanys mınıstrliginen ketýine mynadaı faktorlar áser etti:
Birinshiden, Sergeı Shoıgý men jeke áskerı kompanıa "Vagnerdiń" negizin salýshy Evgenıı Prıgojın arasyndaǵy daý. Byltyr 23 mamyrda Evgenıı Prıgojın reseılik áskerlerdi vagnerlik jaýyngerlerge shabýyl jasady dep aıyptap, jaqtastaryn búlik shyǵarýǵa shaqyrǵan. Vagnerlikter 24 kúni tańerteń Rostov-na-Donýdaǵy áskerı nysandy alyp, Máskeýge attanýdy josparlaǵan. Biraq keshke Belorýs Prezıdenti Aleksandr Lýkashenkomen bolǵan kelissózden keıin bul raıynan qaıty. Sóıtip oǵan qarsy qozǵalǵan qylmystyq is 27 mamyrda toqtatyldy. Daýdyń negizgi sebebi eki áskerı basshy arasyndaǵy kelispeýshilik bolǵany sózsiz.
Ekinshiden, Sergeı Shoıgý uzaq ýaqyt qorǵanys salasyn basqardy. Sondyqtan adamı faktordy da eskergen jón. Ol 2012 jyldan beri kúshtiń qurylymnyń basynda boldy. Áskerı-saıası menedjer retinde salaǵa bereri taýsyldy. Damyǵan elderde sol úshin de saıasatkerler bir orynda uzaq otyrmaıdy.
Batystyq sarapshylar men BAQ Shoıgýdyń ketýin kútpegen oqıǵa dep jazdy. Bizdiń oıymyzsha, kútilgen, biraq keıinge shegerilgen saıası sheshim boldy. Ýkraınamen aradaǵy daǵdarys pen prezıdent saılaýy aldynda túbegeıli ózgeris jasaýǵa Kreml barmas edi.
Shoıgýdyń aldaǵy taǵdyry ne bolmaq?
Reseıdiń prezıdenti Vladımır Pýtın 12 mamyrda burynǵy qorǵanys mınıstrin Qaýipsizdik Keńesiniń Hatshysy qyzmetine taǵaıyndady. Biraq munymen oǵan degen suraq azaımaıtyn sıaqty.
Keshe, seısenbide mınıstrliktiń kadr bólimin basqarýshy general-leıtenant Iýrıı Kýznesovty arnaıy qyzmet ustady. Oǵan úlken kólemdegi sybaılas jemqorlyq jasady degen aıyp taǵylyp otyr. Bul sońǵy aıdaǵy ekinshi oqıǵa. Sáýirde Shoıgýdyń orynbasary Tımýr Ivanov ta týra osy aıyppen ustalǵan bolatyn.
Bular áskerı qylmys bolǵandyqtan jabyq rejımde is qaralatyny sózsiz. Dese de aldaǵy kúnderi Sergeı Shoıgýdyń da mınıstr bolǵan kezdegi jumysyna suraqtar týyndaýy múmkin. Sebebi Evgenıı Prıgojınniń búlikten keıin araǵa 2 aı salyp áýe apatynan qaıtys bolǵanyn eskergen jón.
