Almatyda Qazaqstan Respýblıkasynyń Prezıdenti Qasym-Jomart Toqaevtyń «Ádiletti qoǵamǵa – shynshyl sóz» atty jańa kitabyn talqylaýǵa arnalǵan dóńgelek ústel ótti, - dep habarlaıdy alnews.
İs-shara Dostyq úıinde uıymdastyrylyp, oǵan ǵylym, ádebıet jáne memlekettik qyzmet salalarynyń kórnekti ókilderi qatysty.
Saraptamalyq kezdesýdi Almaty qalasy ákiminiń orynbasary, saıası ǵylymdar kandıdaty Abzal Núkenov júrgizdi. Jıyndy ashqan ol Prezıdent eńbeginiń aıryqsha qundylyǵyna toqtalyp, Memleket basshysynyń ishki jáne syrtqy saıasat salasyndaǵy tereń tájirıbesi kitapta baıandalǵan árbir tujyrymǵa erekshe salmaq beretinin atap ótti. Ákim orynbasarynyń aıtýynsha, kitapta basqarý isinde týyndaıtyn kóptegen ózekti máselelerge jaýap berilgen jáne mańyzdy sheshimder qabyldaýda senimdi baǵdar bola alady. Sondaı-aq ol bul eńbekti zerdeleý memlekettik reformalardyń logıkasy men eldiń tarıhı damý jolyn tereńirek túsinýge múmkindik beretinin atap ótti.
Sóziniń sońynda ákim orynbasary negizgi oıdy bylaısha túıindedi:
– Bul sózderdi kitap betterindegi mátin kúıinde ǵana qaldyrmaýymyz kerek dep esepteımin. Olardy túrli salalarda is júzinde qoldaný mańyzdy. Bul oılar barlyq jastaǵy adamdarǵa, ásirese jastarymyz ben mamandarymyzǵa baǵdar bola alady. Sondaı-aq atalǵan eńbektiń joǵary qoldanbalyq mańyzyn, ony tájirıbede qoldanýdyń erekshe qundylyǵyn atap ótken jón.
Talqylaýdy belgili memleket jáne qoǵam qaıratkeri, Qazaqstan Jazýshylar odaǵynyń múshesi Nurlan Orazalın jalǵastyrdy. Ol óz sózinde saıası kóshbasshynyń halyq taǵdyry men qoǵamǵa degen kózqarasynyń qalyptasýy men evolúsıasy týraly oı-pikirlerimen bólisip, muraǵattarda saqtalǵan tarıhı oqıǵalardy da eske aldy.
– Kitaptan bolashaq el kóshbasshysynyń tálimgerlik pen ótken jyldardaǵy oqıǵalar arqyly qatań qaǵıdattar men tarıhı tájirıbeni boıyna sińirgenin kórýge bolady. Bul úderis onyń Qytaıdaǵy qyzmet etken kezinen bastaý alady.
1995 jyly «Egemen Qazaqstan» gazetinde redaktor bolyp jumys istegen kezimdi eske ala otyryp, Qasym-Jomart Toqaevtyń jaýapkershiliginiń joǵary bolǵanyn atap ótkim keledi. Demokratıa qalyptasyp jatqan kezeńde Syrtqy ister mınıstri qyzmetine kelgen ol meniń ótinishime birden qulaq asyp, gazetimizge arnalǵan baǵdarlamalyq maqalany jedel daıyndap bergen edi, – dep esteligimen bólisti Nurlan Orazalın.
Dóńgelek ústel aıasyndaǵy pikirtalasta kezdesýge qatysqan basqa da bedeldi tulǵalar sóz sóıledi. Olardyń qatarynda akademık Zeınep Bazarbaeva, Qazaqstandaǵy PEN-klýb prezıdenti Bıgeldi Ǵabdýllın, Ahmet Baıtursynuly atyndaǵy Til bilimi ınstıtýtynyń dırektory Anar Fazyljan jáne basqa da sarapshylar boldy.
Eske salaıyq, 5 tamyzda Memleket basshysynyń 1994 jyldan búgingi kúnge deıingi sóılegen sózderi, baıandamalary men oı-tolǵaýlary qamtylǵan aýqymdy jınaq jaryq kórdi. Kitap 21 bólimnen turady. Onda memlekettik basqarý, zań ústemdigi, sıfrlandyrý, jastar saıasaty, ekologıa jáne «Taza Qazaqstan» bastamasy sıaqty mańyzdy taqyryptar qamtylǵan. Eńbek qazirgi Qazaqstan tarıhyna qyzyǵýshylyq tanytatyn qalyń oqyrmanǵa arnalǵan.
