Naýryzbaı aýdanynda «Halyq qatysatyn búdjet» baǵdarlamasy aıasynda aýlalardy kórkeıtýge, jaıly qoǵamdyq keńistik qalyptastyrýǵa jáne qalalyq ortany jaqsartýǵa baǵyttalǵan 35 joba júzege asyrylýda, - dep habarlaıdy alnews.
Nysandardyń bir bóligi aıaqtalsa, qalǵandarynda jumys jalǵasyp jatyr.
«Halyq qatysatyn búdjet» baǵdarlamasy aıasynda Taraz kóshesindegi avtoturaq aýmaǵyn kórkeıtý jumystary aıaqtaldy. Qurylys-montaj jumystary 2026 jylǵy sáýirden maýsymǵa deıin júrgizildi. Joba aıasynda aýmaq keshendi túrde retke keltirilip, turǵyndardyń qaýipsiz ári qolaıly paıdalanýyna beıimdeldi. 2 000 sharshy metr aýmaqqa jańa asfáltbeton jabyny tóselip, avtoturaq aımaǵynyń jaǵdaıy jaqsartyldy. Júrginshilerge qolaıly jaǵdaı jasaý úshin 300 sharshy metr trotýar salynyp, turǵyndardyń qaýipsiz júrip-turýyna múmkindik jasaldy.
Sonymen qatar jalpy uzyndyǵy 558 metr aryq jelisi salyndy. Ol jańbyr jáne erigen qar sýyn retimen buryp, aýmaqty tıisti jaǵdaıda ustaýǵa múmkindik beredi. Atqarylǵan jumystardyń nátıjesinde avtoturaq keńistigi kórkeıtilip, fýnksıonaldyq múmkindigi artty, al irgeles aýmaq kólik júrgizýshileri men júrginshiler úshin qolaıly bola tústi.
Aıaqtalǵan jobalardyń taǵy biri – Aıtmatov kóshesindegi balalar oıyn alańyn kórkeıtý. Qurylys-montaj jumystary 2026 jylǵy mamyrdan maýsymǵa deıin júrgizildi. Joba aıasynda alań aýmaǵy tolyq jańartyldy. Eski oıyn jabdyqtary men metal qorshaýlar alynyp, jańa negiz daıyndaldy jáne shamamen 385 sharshy metr asfáltbeton jabyny tóseldi. Balalarǵa jaıly ári qaýipsiz jaǵdaı jasaý úshin zamanaýı oıyn jabdyqtary ornatylyp, qalyńdyǵy 1,5 sm arnaıy tartan jabyny tóseldi. Sondaı-aq jıektastar ornatylyp, irgeles aýmaq kóriktendirildi jáne 60 tekshe metrge jýyq qurylys qaldyǵy shyǵaryldy.
Balalardyń qaýipsizdigine erekshe nazar aýdaryldy. Alań qorshaýmen jabdyqtalǵan, bul ata-analardyń balalaryn serýen kezinde alańsyz baqylaýyna múmkindik beredi. Nátıjesinde eskirgen alańnyń ornyna balalardyń oıyny men belsendi demalysyna arnalǵan zamanaýı, kórkeıtilgen jáne qaýipsiz keńistik paıda boldy. Qazir bul oryn otbasylyq demalys úshin suranysqa ıe alańdardyń birine aınaldy.
Dáýletkereı kóshesindegi aýmaq ta jańardy. Baǵdarlama aıasynda munda balalar oıyn alańy kórkeıtildi. Qurylys-montaj jumystary 2026 jylǵy maýsymnan tamyzǵa deıin júrgizildi. Joba aıasynda aýmaq keshendi túrde jańartylyp, jıektastar men jańa asfáltbeton jabyny tóseldi, zamanaýı sport jabdyqtary men shaǵyn sáýlet nysandary ornatyldy. Balalar men turǵyndardyń jaıly ári qaýipsiz demalysy úshin syrtqy jaryqtandyrý júıesi jasalyp, irgeles aýmaq retke keltirildi. Nátıjesinde jańartylǵan alań balalar oıynyna, sportpen aınalysýǵa jáne otbasylyq demalysqa arnalǵan fýnksıonaldy ári jaıly keńistikke aınaldy.
«Halyq qatysatyn búdjet» baǵdarlamasy aıasynda Nurly tań kóshesinde de zamanaýı balalar alańy salyndy. Qurylys-montaj jumystary 2026 jylǵy maýsymnan tamyzǵa deıin júrgizildi. Joba aıasynda aýmaq tolyq kórkeıtildi. Munda zamanaýı balalar oıyn jabdyqtary men shaǵyn sáýlet nysandary ornatylyp, qaýipsiz tartan jabyny tóseldi, syrtqy jaryqtandyrý men qorshaý jasaldy. Sondaı-aq irgeles aýmaq retke keltirilip, balalar men ata-analar úshin qolaıly ári qaýipsiz orta qalyptastyryldy. Joba nátıjesinde Nurly tań kóshesiniń turǵyndary balalardyń oıynyna, serýendeýine jáne belsendi demalysyna arnalǵan zamanaýı keńistikke ıe boldy.
Turǵyndardyń aıtýynsha, jańartylǵan alańdar qazirdiń ózinde otbasylyq demalys úshin suranysqa ıe orynǵa aınalǵan.
«Osy alańdy salýǵa atsalysqan barsha azamatqa alǵysymyz sheksiz. Atqarylǵan jumys úshin ákimdikke úlken raqmet. Balalarymyz úshin bul oıyn oınap, demalatyn tamasha oryn boldy. Munda bári yńǵaıly ári jan-jaqty oılastyrylǵan, qorshaýy da bar, sondyqtan balalardyń qaýipsizdigine alańdamaımyz. Olarǵa munda ýaqyt ótkizý shynymen qyzyqty. Biz, aýdan turǵyndary, óte rızamyz jáne osyndaı alań úshin úlken alǵysymyzdy bildiremiz», – dedi aýdan turǵyny.
