Almatynyń Bas jospary týraly aqparattyń qoljetimdiligin arttyrý jáne qala turǵyndarymen tikeleı baılanys ornatý maqsatynda «Almatybasjospar» turǵyndardyń ótinishin qabyldaıtyn baılanys ortalyǵyn iske qosty, - dep habarlaıdy alnews.
Jańa baılanys formatynyń negizgi mindeti – qala turǵyndaryna Almatynyń damýy, Bas jospardyń negizgi erejeleri jáne onyń naqty aýmaqtarǵa yqtımal áseri týraly túsinikti ári senimdi aqparat usyný.
Turǵyndar baılanys ortalyǵyna tikeleı habarlasyp, Bas josparǵa qatysty suraq qoıa alady, naqty aýmaqtar boıynsha aqparatty naqtylap, jyljymaıtyn múlik pen jer telimine qatysty qujattarǵa baılanysty týyndaıtyn máseleler jóninde túsinikteme ala alady.
«Bas jospar búkil qalanyń damýyna áser etetin kúrdeli qala qurylysy qujaty ekenin túsinemiz. Turǵyndarmen ótken kezdesýlerden keıin kóptegen alańdaýshylyqtyń Almatynyń damýyna qarsylyqtan emes, Bas josparda naqty ne qarastyrylǵany jáne onyń belgili bir aýmaqqa qalaı áser etýi múmkin ekeni týraly túsinikti ári naqty aqparattyń jetkiliksizdiginen týyndaıtynyn baıqadyq», – dedi «Almatybasjospar» bas dırektory Asqat Sadýov.
Onyń aıtýynsha, áleýmettik jelilerde Bas jospar týraly qala qurylysy salasynda kásibı bilimi joq adamdar taratatyn aqparat kóp. Sonyń saldarynan kúrdeli máseleler keıde tym qarapaıym túrde túsindirilip nemese aqparat burmalanyp beriledi. Bul turǵyndardyń alańdaýshylyǵyn odan ári kúsheıtedi.
«Sondyqtan ár adam resmı derekkózden aqparat ala alatyn tikeleı ári qoljetimdi baılanys arnasyn qurýdy mańyzdy dep sanaımyz. Sonymen qatar ár otbasynyń ózindik naqty jaǵdaıy bolýy múmkin ekenin túsinemiz. Sol sebepti baılanys ortalyǵynda jalpy túsindirmelermen qatar, jer ýchaskeleri men jyljymaıtyn múlikke qatysty qujattar boıynsha jeke keńes te beriledi. Bizdiń mindetimiz – turǵyndarǵa jaǵdaıyn túsinýge, qolyndaǵy qujattardy anyqtaýǵa, qandaı máseleler qosymsha rásimdeýdi nemese naqtylaýdy qajet etetinin bilýge jáne olardy sheshý úshin qaıda júginý kerektigin túsindirýge kómektesý», – dedi Asqat Sadýov.
Baılanys ortalyǵynyń jumysymen qatar turǵyndarmen túsindirý kezdesýleri, jeke keńes jáne halyqtyń Bas jospar men onyń júzege asyrylýy týraly habardarlyǵyn arttyrýǵa baǵyttalǵan ózge de is-sharalar ótkiziledi.
Turǵyndarǵa yńǵaıly bolý úshin «Almatybasjospardyń» áleýmettik jelilerdegi resmı paraqshalarynda sońǵy aqparat, túsindirmeler jáne jıi qoıylatyn suraqtarǵa jaýaptar jarıalanyp otyrady.
Baılanys ortalyǵy:
WhatsApp: +7 705 653 8357
Instagram: @almaty_genplan
TikTok: @almatygenplan
Threads: @almaty_genplan
«Almatybasjospar» turǵyndardy Bas jospar týraly aqparatty resmı derekkózderden alýǵa jáne týyndaǵan suraqtar boıynsha tikeleı habarlasýǵa shaqyrady. Bul túsinbeýshiliktiń aldyn alýǵa, taralyp jatqan aqparattyń durystyǵyn tekserýge jáne árbir naqty jaǵdaıǵa qaraı túsindirme alýǵa múmkindik beredi.
