«Qazaqtelekom» AQ Korporatıvtik bıznes dıvızıony jyl saıynǵy International Carrier Meeting 2026 kezdesýin ótkizdi, - dep habarlaıdy alnews.
İs-shara China Telecom, China Unicom, China Mobile, «MegaFon», «Rostelekom», Arelion Sweden, IBasis, PCCW Global, RETN jáne basqa da jetekshi sheteldik baılanys operatorlary men salanyń negizgi seriktesteri arasynda dıalog ornatýǵa arnalǵan alańǵa aınalǵan.
İs-shara aıasynda jahandyq sıfrlyq ekojúıeni damytýǵa, halyqaralyq baılanysty keńeıtýge jáne elder arasyndaǵy yntymaqtastyqty nyǵaıtýǵa eleýli úles qosqan kompanıalardy marapattaý rásimi ótti.
Marapat ıegerleri qatarynda Qytaı, Reseı, Ortalyq Azıa jáne Eýropa elderiniń telekomýnıkasıa salasynyń ókilderi bar.
Kezdesýdi ashqan Korporatıvtik bıznes dıvızıonynyń bas dırektory Asqar Qaırov halyqaralyq operatorlarmen turaqty seriktestik qatynastardy damytýdyń mańyzdylyǵyn atap ótti.
«Búginde telekomýnıkasıa salasy erekshe qarqynmen damyp keledi jáne jetistik kóp jaǵdaıda kompanıalardyń saraptamany, tehnologıalar men ınfraqurylymdyq múmkindikterdi biriktire alý qabiletine baılanysty. «Qazaqtelekom» úshin halyqaralyq seriktestikti damytý – strategıalyq basymdyqtardyń biri. Biz álemniń jetekshi operatorlarymen ózara is-qımyldy júıeli túrde keńeıtip, Qazaqstannyń Eýrazıanyń sıfrlyq haby retindegi rólin kúsheıtýge múmkindik beretin ınfraqurylymdy damytyp kelemiz», – dep atap ótti Asqar Qaırov.
İs-shara barysynda «Qazaqtelekom» sheteldik seriktesterine sıfrlyq ınfraqurylym men derekterdiń halyqaralyq tranzıtin damytý baǵytyndaǵy jumystyń nátıjelerin tanystyrdy. Qatysýshylar salanyń ózekti úrdisterin, ózara is-qımyldy keńeıtý múmkindikterin, jańa jobalar men halyqaralyq telekomýnıkasıalyq ınfraqurylymdy damytýdyń basym baǵyttaryn talqylady.
Eýropa men Azıa arasyndaǵy negizgi arnalardyń qıylysynda ornalasqan Qazaqstannyń biregeı geografıalyq jaǵdaıy zamanaýı magıstraldyq ınfraqurylymnyń damýymen ushtasa otyryp, derekterdi berýdiń tıimdi tranzıttik baǵyttaryn qalyptastyrýǵa jaǵdaı jasaıdy. Kompanıa halyqaralyq ózara is-qımyldy júıeli túrde keńeıtip, jetekshi sheteldik baılanys operatorlarymen jańa jelilik túıisýler qurý boıynsha jobalardy iske asyrýda. Bul ınfraqurylymnyń ótkizý qabiletin arttyrýǵa, halyqaralyq arnalardyń turaqtylyǵyn qamtamasyz etýge jáne derekterdi berý kezindegi kidiristerdi azaıtýǵa múmkindik beredi.
International Carrier Meeting 2026 telekomýnıkasıalyq kompanıalar arasyndaǵy tikeleı dıalogtyń mańyzdylyǵyn taǵy bir márte kórsetip, jańa birlesken bastamalardy talqylaýǵa arnalǵan alańǵa aınaldy. Halyqaralyq baılanystardy nyǵaıtý jáne transshekaralyq sıfrlyq ınfraqurylymdy damytý Qazaqstannyń Eýrazıadaǵy negizgi sıfrlyq jáne tranzıttik ortalyqtardyń biri retindegi áleýetin odan ári ilgeriletýge yqpal etedi.
Al 2026 jylǵy 3–4 qyrkúıekte «Qazaqtelekom» AQ Almaty qalasynda ótken jetekshi telekomýnıkasıalyq kompanıalar, baılanys operatorlary, tehnologıalyq seriktester men sıfrlyq naryq qatysýshylarynyń ókilderin biriktirgen CIS GCCM 2026 VIII jyl saıynǵy konferensıasyna qatysty. Talqylaýlardyń negizgi taqyryptary sıfrlyq ınfraqurylymdy damytý, 5G tehnologıalaryn engizý, jasandy ıntellektini qoldaný, kıberqaýipsizdik jáne jańa baılanys arnalarynyń damýyna arnaldy. Kompanıa ókilderi halyqaralyq operatorlarmen birqatar iskerlik kezdesýler ótkizip, seriktestik qatynastardy keńeıtý jáne jańa marshrýttardy damytý perspektıvalaryn talqylady.
Osy kezdesýler aıasynda «Qazaqtelekom» kompanıasynyń ázerbaıjandyq seriktesi AzerTelecom Int. birlesip júzege asyryp jatqan strategıalyq joba – Kaspıı teńiziniń túbimen talshyqty-optıkalyq baılanys jelisin (TOBJ) salý jobasy boıynsha jańartylǵan aqparat usynyldy.
«Jobanyń tehnıkalyq bóligi logıkalyq aıaqtalý kezeńine jaqyndady. Atap aıtqanda, marshrýttyń teńiz bóligin tóseý jumystary aıaqtaldy, qazirgi ýaqytta kabeldi jerústi ınfraqurylymymen jalǵaý jumystary júrgizilýde. Marshrýtty tolyq komersıalyq paıdalanýǵa 2027 jyldan bastap berýdi josparlap otyrmyz», – dep atap ótti DKB Halyqaralyq kelisimder departamentiniń dırektory Aınur Baıbatyrova.
